Psalm

45 Ẹmwẹ ni rhiẹnrhiẹn wa vuọn ekhọe mwẹ, vbe I gbẹn ihuan na ne ọba zẹvbe ukeke ọgbenbe nọ guẹ. Aranmwẹ mwẹ, wa mu egbe ekharha yotọ. 2 Wẹ ẹre ọ ghi mose sẹ vbe uwu avbe ikpia hia, ọmwa ne ẹmwẹ ma ẹre unu ẹre u khin. Te Osanobua wa fiangbuẹ vbe ẹghẹ hia. 3 Rro umozo ruẹ mu ẹkun, ọba nọkhua, wẹ nọ vuọn ne ose kevbe uyi ọba. 4 Gha hin ẹsin khian ne u ya khọnmiotọ vbe igbinna oseghe ẹmwata, imuegberriotọ kevbe iruemwiẹse! Obọ erha ọmwa ruẹ gha ru emwi ọyunnuan nibun! 5 Ifẹnmwẹ ruẹ wa mu, iran ha ẹkokoudu eghian ruẹ gberra, avbe agbẹnvbo ghi gha dele ye owẹ ruẹ. 6 Arriọba ne Osanobua mu nuẹn, a gha rrọọ ẹdẹ kevbe ẹdẹdẹmwẹdẹ, wẹ ghi gha ya ẹmwata rri ọba yan avbe emwa ruẹ. 7 Wẹ hoẹmwẹ emwi nọ gbae, u keghi khuiwu emwi nẹi maan. Ọni ẹre ọ si ẹre ne Osanobua, Osanobua ruẹ na hannọ ruẹ zẹ, ọ na ya ọyẹnmwẹ we ruẹ sẹ avbe ọba nikpa hia. 8 Uwinhinmwẹ oziya kevbe aloe rre ukpọn ruẹ; avbe ikpezikẹn ghi gha ku nuẹn ghee, vbe uwu ẹguae ruẹ na ya akọn eni tee. 9 Avbe ivbi ọba nikhuo rre usun avbe ikhuo ni rre ẹrriẹ ruẹ, amwẹ ọba vbe mudia ye obọ erha ọmwa ẹkete ruẹ, vbe nọ na ya emwi itegbe ọghe igoru nọ maan sẹ han. 10 Ovbiọha ọba, danmwehọ ẹmwẹ ne I khian tama ruẹ, rhie ekhọe hin ẹmwẹ emwa ruẹ kevbe avbe etuẹn rre. 11 Ose ruẹ gha ya ọba hoẹmwẹ ruẹ, irẹn ọre arowa, rhunmwuda ọni, u ghi gha họn ẹmwẹ nẹẹn. 12 Ivbi e Taia gha ha oko guẹ, emwa nii ni fe ghi gha gualọ aro nọ maan ọghuẹ. 13 Ovbi ọba nokhuo rre uwu ẹguae, u miẹn vbene ọ mose hẹ, ukpọn nọ yọe, oru igoru ẹre a ya do ẹre. 14 A rhie ẹre gha rrie ẹguae kẹ kevbe ẹwu ẹre ne mose mose. lran ne eguọmwadia ẹre nikhuo vbe lelẹe, a na vbe viọ iran bu ẹre gha dee. 15 Iran hia keghi la uwu ẹguae ọba vbe oghọghọ kevbe ọyẹnmwẹ. 16 Wẹ ne ọba mwẹ u gha biẹlẹ emọ ikpia nibun ni gha rri ọba lele avbe erhaa odede, wẹ ghi vbe ya iran ru okoro yan uhunmwu otọ agbọn hia. 17 Ihuan mwẹ gha gi otiti ruẹ gha rrọọ rhinrin ẹdẹ, emwa hia ghi vbe gha rho ruẹ vbe ẹghẹ hia ẹdẹdẹmwẹdẹ.