Psalm

44 Osanobua, ma ya ehọ ima họẹn nẹ, avbe erha mwa odede vbe tae ma ima, ighẹ avbe emwi ọyunnuan ne uwẹ ru vbe ẹghẹ iran vbe ẹghẹ nẹdẹ. 2 Vbene u tobọ ruẹ khulo avbe ni ga ẹbọ ladian hẹ, u na gbe emwa ruẹ ẹkun sotọ ye otọ iran. Vbene u rri avbe agbẹnvbo nikẹre oya hẹ, u na gi agbọn ma iran ne emwa ruẹ. 3 Ẹ i re umozo ọghe iran, ẹre avbe emwa ruẹ ya khọn avbe otọ nii. Ẹ i re ẹtin iran ẹre iran ya khọnmiotọ, ẹtin kevbe iwegbe ruẹ ẹre nọ, vbene u na gi iran rẹn ighẹ u gu iran rrọọ, nọ vbe rhie ma ighẹ u hoẹmwẹ iran. 4 Wẹ ọre Ọba mwẹ kevbe Osanobua mwẹ, wẹ ẹre ọ rhie akhọnmiotọ ne emwa ruẹ. 5 Ẹtin ruẹ ẹre ima ya khọn eghian ima muotọ. Eni ruẹ ma khian ya rhilo emwa ni gu ima khọn ginna otọ. 6 Mẹ ma mu ẹtin yan uhanbọ mwẹ ra umozo mwẹ, nọ miẹn mwẹ fan. 7 Sokpan, wẹ miẹn ima fan vbe obọ avbe eghian ima nẹ, u keghi vbe khọn iran ni khuiwu ima muotọ. 8 Ma gha rho ruẹ vbe ẹghẹ hia, ma ghi vbe gha rhie ekpọnmwẹ nuẹn rhinrin ẹdẹ. 9 Sokpan, banbanna nian, wẹ he ima yotọ nẹ, u na gi iran khọn miẹn ima otọ, u i lele ivbiyokuo ima gbe usun ladian. 10 U gi ima lẹẹ ne avbe eghian ima, iran keghi viọ emwi ni te re ọghe ima, ya khian ọghe iran. 11 U gi iran lọkọ ima rua zẹvbe ohuan, u zagha ima kua lele ẹvbo ẹrrẹe. 12 U khiẹnnẹ emwa ruẹ ọpuẹkẹ kua vbene a miẹn wẹẹ, ive tunnẹ ẹre u tie ye iran uhunmwu. 13 Emwa ni rre ẹdogbo ọghe ima miẹn vbene u ru ima hẹ, iran kegha ta ima giẹ, iran na gha giẹ ima. 14 U ya ima khian emwi igbogiẹ vbe uwu ẹbu agbẹnvbo nibun, iran gha fieghe uhunmwu iran daa ima vbe ọghe ozan. 15 Uwu efaa ẹre I ye vbe ẹghẹ hia, ekhue gba mwẹ egbe hia, 16 vbe I gha miẹn ihue ozan ne iran vin ighẹ avbe eghian mwẹ kevbe iran ni khuiwu mwẹ. 17 Ena hia ẹre ọ sunu vbe egbe ima, agharhemiẹn ighẹ ma ma mianmian ruẹ, ra ne ima rra ile ne u gu ima ta. 18 Ma ma he fi owẹ dọn ghee ruẹ, ma ma he rra iyi ne u yi. 19 Sevba, u sẹ ima rae ye eke ne avbe ekita oha dia; U na vbe sẹ ima rae ye uwu ebiebi, nọ so kankankan. 20 Adeghẹ te ima dobọ Osanobua mwa na ga yi, ma na ya gha na erhunmwu ghee ẹbọ ẹrrẹe, 21 Wẹ ma rẹn wẹẹ, Osanobua gha gualọ otọ re miẹn? Ọ rẹn emwi hia nọ rre ima ekhọe. 22 Sokpan, rhunmwuda ruẹ, ẹre ima na khian na ghi gbele rua vbe ẹghẹ hia, na na ru ima zẹvbe ohuan na ra gbele rua. 23 Rhiọrre Jehova, vbọzẹ ne u na vbiẹ yi? Guọnmwẹ egbe kpaegbe; ghẹ he ima ye otọ rhinrin ẹdẹ. 24 Vbua ghi na rhie aro lẹre ne ima hẹ yi? Ghẹ mianmian oya kevbe ukpokpo mwa. 25 Ma dele, a keghi lọkọ ima ginna otọ, ma lovbiẹ ye uwu ebubẹ na gbele ima yi. 26 Gha dee do yi ima obọ, rhunmwuda ahoẹmwọmwa ruẹ nẹi beghe, miẹn ima fan.