Psalm

31 I rre do lẹgbinna ruẹ Jehova, ghẹ gi obọ gba mwẹ ẹdẹ. Osanobua ẹmwata wẹ khin, lahọ miẹn mwẹ fan. 2 Họn urhu mwẹ, miẹn mwẹ fan nian. Gha re ugue nọ gha degue mwẹ. Ọmwa nọ gbinna mẹ, nọ ra miẹn mwẹ fan. 3 Wẹ ọre ugue kevbe nọ gbinna mẹ. Dia mwẹ ne u vbe gha su mwẹ khian, zẹvbe ne u yan rẹn. 4 Degue mwẹ hin obọ ifi na rhuẹ yotọ khẹ mwẹ, tan ifuẹn gue mwẹ hin ẹbe rre. 5 Obọ ruẹ ẹre l mu orhiọn mwẹ yi. U na vbe miẹn mwẹ fan, eo Jehova, ne Osa ọghe ẹmwata. 6 Mẹ khuiwu iran ni ga ẹbọ ọghe ohoghe, sokpan mẹ mu ẹtin yan ruẹ. 7 I gha sẹ ọyẹnmwẹ, I ghi vbe gha ghọghọ rhunmwuda ahoẹmwọmwa ruẹ nẹi beghe. U miẹn oya ne I re, u rẹn ọlọghọmwa mwẹ. 8 U ma gi obọ eghian mwẹ gba mwẹ. U rhie ẹtin mẹ, ne I khian sẹ ehe nọ khọn mwẹ. 9 Tohan mwẹ Jehova, rhunmwuda mẹ rre uwu ibavbaro; te aro mwẹ ghi viẹn ba ẹmwẹ eve ne I viẹ, te I ghi wa luẹluẹ. 10 Egbe wọọ mwẹ rhunmwuda akhiẹ. Eve fian ẹdẹ mwẹ kanmwa. Ọlọghọmwa ne I ye guọghọ mwẹ egbe yotọ. Avbe ugboloko mwẹ ma ghi wegbe. 11 Te avbe eghian mwẹ hia, katekate ni rre ẹdogbo mwẹ, ghi sọnnọ mwẹ. Te ohan mwẹ ghi mu iran ni rẹn mwẹ; iran gha dekun mwẹ vbe orere, iran ghi lẹẹ. 12 Te emwa hia ghi mianmian mwẹ, vbe na ghee ọmwa nọ wu nẹ, I yevbe emwi na fi fua. 13 I họn ewẹwẹwẹ ne avbe eghian mwẹ ta; iran wa khuan khẹ mwẹ, iran gha si uma ne iran gbe mwẹ uan. 14 Sokpan, I mu ẹtin yan ruẹ Eo Jehova. Uwẹ ọre Osanobua mwẹ. 15 Uwẹ ẹre ọ gbaroghe mwẹ vbe ẹghẹ hia. Miẹn mwẹ fan vbe obọ eghian mwẹ, kevbe obọ iran ni kpokpo mwẹ. 16 Ya aro itohan ghee ọguọmwadia ruẹ, ya ahoẹmwọmwa ruẹ nẹi beghe miẹn mwẹ fan. 17 I tu tie ruẹ Jehova, ghẹ gi iran fa mwẹ rua. Efaa ẹre ọ gha rruan emwa dan, te iran hia khian wulo, iran ghi lae idin. 18 Gu avbe ọhọnhoghe unu, iran ni tọn egbe mu kevbe ni hio, iran ni ya ukpẹ iran sakaan avbe emwa ẹmwata. 19 U miẹn vbe ehia mose hẹ, ighẹ avbe emwi esi ne u hẹ yotọ khẹ iran ni ya ọghọ nuẹn. Agbọn hia rẹn vbene u maan hẹ. A miẹn vbe u viọ iran ni mu ẹtin yan ruẹ lẹre hẹ khuankhuankhuan. 20 U gha viọ iran lẹre ye eke ne ẹbe i ye vbe ehe ne u ye, hin uma ne emwa si rre. U viọ iran lẹre ye irhu ne ẹbe i ye, hin ihẹn ne avbe eghian ọghe iran tie rre. 21 Wa rho e Jehova, u miẹn vbe ọ rhie ahoẹmwọmwa nọ mwẹ ghee mwẹ ma hẹ, vbe odẹ ọghe ọyunnuan, vbe iran ghae ga mwẹ gha gu mwẹ gbinna. 22 Afianma te gha fian mwẹ, I te gha roro wẹẹ, ọ khu mwẹ fua hin ehe ne irẹn ye rre nẹ. Sokpan, ọ họn utumwẹ mwẹ, vbe I kpee tie ẹre nọ iyobọ. 23 Wa hoẹmwẹ e Jehova, wa ne emwa rẹn ni gia mu ẹtin yan, e Jehova ẹre ọ degue ọmwa nọ gia mu ẹtin yan, sokpan, ọ ghi gha rhie ere nọkhua ne emwa ni tọn egbe mu. 24 Wa wegbe, ne uwa vbe din, wa hia ni diakhẹ Jehova