Psalm
22 Osanobua mwẹ, Osanobua mwẹ, vbọzẹ ne u na he mwẹ yotọ? Vbọzẹ ne u ma na miẹn mwẹ fan? Vbọzẹ ne u ma na vbe họn utumwẹ obalọ mwẹ? 2 Vbe ẹghẹ avan, mẹ datu tie ruẹ Osanobua mwẹ, sokpan, u ma khuẹnniẹn mwẹ. I tu tie ruẹ vbe asọn, sokpan, I ma miẹn ikẹtin. 3 Sokpan, wẹ ẹre ọ rre ẹkete zẹvbe ọmwa nọhuanrẹn, ọmwa ne Izrẹl rho. 4 Avbe erha mwa odede mu ẹtin iran yan ruẹ, iran mu ẹtin iran yan ruẹ, wẹ keghi miẹn iran fan. 5 Iran tu tie ruẹ, iran keghi lẹẹ ẹbe fe. Iran mu ẹtin yan ruẹ, wẹ ma vbe hiẹ iran. 6 Sokpan, mẹ i ghi re ọmwa, ọkhọe mẹ khin, ne emwa hia zaan, kevbe na kan fua. 7 Emwa ni miẹn mwẹ hia ya mwẹ gbogiẹ, iran yuo aranmwẹ ladian, iran gha rueghe uhunmwu iran. 8 Iran wẹẹ, “Ẹ i re te u mu ẹtin yan e Jehova, vbọzẹ nọ ma na ghi miẹn ruẹ fan nian? Adeghẹ ọ gele hoẹmwẹ ruẹ, vbọzẹ nọ ma na yi ruẹ obọ?” 9 Wẹ ẹre ọ zẹe ighẹ a biẹ mwẹ hẹnnẹdẹn. Ẹghẹ ne I na re ọmobọ, wẹ ẹre ọ rhie mwẹ lẹre. 10 Ke ẹghẹ na ya biẹ mwẹ gha dee, uwẹ ẹre ọ gbaroghe mwẹ; Ke obọ ne I ya rre uwu ako ọmọ ọghe iye mwẹ, uwẹ ọre Osanobua mwẹ. 11 Ghẹ khian rree mẹ rhunmwuda, ibavbaro sikẹ mwẹ, ọmwa nọ gha yọ mwẹ obọ i rrọọ. 12 Eghian nibun lẹga mwẹ zẹvbe ẹkhuia ẹmila. Iran hia wa lẹga mwẹ zẹvbe ẹkhuia ẹmila nọ khọọ, na miẹn vbe otọ e Basian. 13 Iran rhan unu iran zẹvbe oduma, iran viọ ihiẹn daa mwẹ. 14 Orhiọn mwẹ tin fua, ọ wirua zẹvbe amẹ na nọnọ yotọ. Ugboloko mwẹ hia lahin akhuẹn rre, ekhọe mwẹ yevbe ọdan na ranraẹn. 15 Ẹho mwẹ kae zẹvbe ikpekhae, aranmwẹ mwẹ, keghi sikan mu ighehe mwẹ. U sẹ mwẹ rae zẹvbe orinmwi ye uwu ebubẹ. 16 Otu emwa dan ghae ga mwẹ zẹvbe oghẹn ekita, iran mama rhu mwẹ. Iran hoo ne iran gua mwẹ obọ vbe owẹ rhie vbe na ghee oduma. 17 Te a ghi bẹghe ugboloko mwẹ hia. Avbe eghian mwẹ yan aro gha ghee mwẹ. 18 Iran yan uta ye ukpọn mwẹ, iran keghi ghae ehia gba obọ. 19 E Jehova, ghẹ khian rree mẹ. Wẹ ọre ẹtin mwẹ; zẹgiẹ gha dee, ne u do miẹn mwẹ fan! 20 Miẹn mwẹ fan hin umozo rre, vbe rhie arrọọ mwẹ nọ ghaan lẹre ne avbe ekita na. 21 Yuo mwẹ hin obọ avbe oduma na rre; mẹ i sẹtin ru emwi rhọkpa, vbe ehe ne avbe ẹmila oha na ye. 22 I gha ya eni ruẹ wewe ma etẹn mwẹ. I gha rho ruẹ vbe uwu iko. 23 “Wa ne eguọmwadia e Jehova, wa rho ẹre. Wa rhie ọghọ nẹẹn, wa ne ivbi uniẹn e Jekọb. Wa vbe gae, wa ne Ivbi Izrẹl. 24 Irẹn i mianmian ivbiogue, ra nọ fi aro rua vbe iran ghaa rri oya, ẹ i vbe fi iyeke gbe iran, sokpan, iran gha nọ iyobọ, ọ ghi khuẹnniẹn.” 25 I gha rho ruẹ ye emwi ne u ru, vbe adesẹ iko nọ gbae; I gha zọ ese emwi ne I ve, sirra iran hia ni mu ohan ruẹ. 26 Emwa ọmẹhẹ gha miẹn evbare re sẹ ọkẹn; Iran ni gualọ e Jehova gha rhie urhomwẹ nẹẹn. Te uwa gha sọyẹnmwẹ arrọọ vbe etẹbitẹ. 27 Agbẹnvbo hia gha ye Jehova rre, iran gha ke igienenẹ ọghe agbọn na, bu ẹre rre. Ivbi ẹvbo ughughan gha rho ẹre. 28 E Jehova ọre ọba, irẹn ẹre ọ kha yan avbe uhunmwu ẹvbo. 29 Emwa ni tọn egbe mu hia gha ya uhunmwu rhanmwẹ otọ nẹẹn. Emwa nọ sẹtin wu hia gha ya uhunmwu rhanmwẹ otọ nẹẹn. Iran rhọkpa i khian sẹtin miẹn egbe iran fan. 30 Avbe orre ni dee hia gha gae, emwa gha na iyẹn e Jehova ma avbe orre ni dee. 31 Iran gha rre, iran gha tama emwa vbekpa iruemwiẹse ọghẹe. A gha tama emwa na ma he biẹ hia emwi hia nọ he ru.