Psalm

18 A miẹn vbene I hoẹmwẹ ruẹ hẹ Jehova, wẹ ọre ọmwa nọ gbinna mẹ. 2 E Jehova ọre nọ degue mwẹ, irẹn ọre owa ọkhẹ mwẹ nọ wegbe, irẹn ẹre ọ rhie mwẹ lẹre. Osanobua mwẹ ọre okuta mwẹ, irẹn ẹre I lẹẹ gbinna, Ọ degue mwẹ zẹvbe asa. Ọ gbinna mẹ, irẹn ọre ugue mwẹ. 6 Vbe uwu ibavbaro mwẹ, I da tie Jehova, I da tie Osanobua nọ do yọ mwẹ obọ. Ọ họn urhu mwẹ vbe uwu ọgua Osa ẹre. Ọ họẹn vbe I da tie ẹre nọ do yọ mwẹ obọ. 10 Ọ keghi hin iyeke avbe cherub, ọ na tin tuorre, ọ keghi lele ifuẹn ẹhoho gha rrie okhian. 16 Enọyaẹnmwa ke odukhunmwu niẹn obọ rre, ọ keghi da mwẹ yi, ọ na si mwẹ ladian hin uwu ogiamẹ rre. 17 Ọ miẹn mwẹ fan vbe obọ avbe eghian mwẹ ni wegbe, kevbe iran ni khuiwu mwẹ, iran te wegbe sẹ mwẹ gbe. 20 E Jehova san mwẹ ẹse, rhunmwuda, I ru emwi nọ kere, ọ fiangbe mwẹ rhunmwuda ighẹ I ma rri abe. 21 Mẹ mu uhi e Jehova sẹ nẹ, I ma fi iyeke gbe Osanobua mwẹ. 22 I ru nẹ zẹvbe ne uhi ẹre hia khare, I ma de iyi ẹre rhọkpa. 23 Irẹn rẹnrẹn wẹẹ abakuru i rrọọ mẹ kevbe wẹẹ, I bi egbe hin abakuru rre. 24 Te Jehova gha san mwẹ ẹse, rhunmwuda I ru vbene ọ kei yi. Rhunmwuda, irẹn rẹnrẹn wẹẹ I ma rri abe. 25 Uwẹ keghi mwẹ ẹkoata daa emwa ni ya ẹkoata ga ruẹ. U vbe ya obọ esi mu emwa ne obọ iran huanrẹn; 26 Uwẹ ọre ọmwa nọhuanrẹn ne emwa nọhuanrẹn, sokpan, u keghi gi emwa ni ru ero rẹn wẹẹ, umẹwaẹn ẹre u khin. 27 Wẹ miẹn iran ni mu egbe rriotọ fan sokpan, te uwẹ si iran ni tọn egbe mu kẹ otọ. 28 E Jehova, wẹ rhie uwanmwẹ mẹ, u keghi khu ebiebi mwẹ fua. 29 U rhie ẹtin mẹ ne I ya gu avbe eghian mwẹ gbinna, vbe ẹtin Osanobua I gha sẹtin san egbekẹn. 30 Te emwi hia ne Osanobua ọghe ẹmwata ru, wa gba; Ẹmwẹ ọghe Jehova hia gia mu ẹtin yan! Te irẹn yevbe asa ne iran hia ni lẹẹ gbinnaẹn. 31 De Osa ọvbehe nọ rrọọ vbọ gberra e Jehova? De ọmwa ọvbehe nọ vbe re okuta, vbọ gberra Osanobua mwa? 32 Irẹn ọre Osanobua nọ ya mwẹ wegbe, ọ ya odẹ mwẹ khian ne ẹbe i ye. 33 Ọ ya owẹ mwẹ khian nọ wo, vbe na ghee ọghe ẹrhuẹ, ọ keghi ya mwẹ gha rrọọ vbe a i mwẹ ẹbe, vbe uhunmwu oke. 34 Ọ ma mwẹ okuo na khọn, I gha sẹtin vbokho uhanbọ ọghe oze. 35 Wẹ ẹre ọ degue mwẹ, u na vbe miẹn mwẹ fan, obọ erhọmwa ruẹ ru iyobọ mẹ. Imuegberriotọ ruẹ ya mwẹ khian okpọmwa. 36 Wẹ ẹre ọ ma gi obọ gba mwẹ, mẹ ma he de ẹdẹ. 37 I khu avbe eghian mwẹ, obọ mwẹ keghi vba iran, I ma dobọ yi, I ke fuẹn iran rua. 38 I gbele iran ku otọ, iran i ghi sẹtin kpa, iran lovbiẹ vbe odaro vbene obọ mwẹ na gba iran. 39 U rhie ẹtin mẹ ya khọn nene okuo, kevbe akhọnmiotọ vbe uhunmwu eghian mwẹ. 46 E Jehova rrọọ, wa rho Okuta mwẹ, wa mu ẹmwẹ ukpọlọmwẹ ọnrẹn go, ighẹ Osanobua nọ miẹn mwẹ fan.