Psalm
17 E Jehova, danmwehọ erinmwian ne l rinmwian wẹẹ, na bu ohiẹn ẹmwata mẹ; zẹ ye utumwẹ ne I tu ne I ya nọ iyobọ, danmwehọ erhunmwu mwẹ nọ ke ekhọe mwẹ rre. 2 Wẹ gha bu ohiẹn mẹ, rhunmwuda wẹ rẹn emwi nọ kere. 3 U gba ekhọe mwẹ, wẹ ka bu mwẹ rre yi vbe asọn, u gualọ otọ mwẹ fo fẹẹrẹ. U ma vbe miẹn iho emwi dan vbe uwu ekhọe mwẹ, I ma ta ẹmwẹ dan. 4 Zẹ vbene emwa eso ru, I ru zẹ vbene u yi ẹre iyi, I ma vbe khian vbe odẹ ọghe ọkhọ. 5 Odẹ ruẹ ẹre I la khian ẹdẹ, I ma he bibi odẹ hin rre ẹdẹ. 6 Rhunmwuda ne u na họn urhu mwẹ, ẹre I na na erhunmwu ghee ruẹ Osanobua; rhunmwuda ọni nian, werriẹ aro rre, ne u danmwehọ ẹmwẹ mwẹ. 7 Rhie ahoẹmwọmwa ọghe ọyunnuan ruẹ ma, ne u miẹn ima fan. Mẹ ghaa rre ehe ne u ye, mẹ fe vbe obọ avbe eghian mwẹ. 8 Degue mwẹ, zẹvbe ne u gha ru ovbi aro ruẹ, rhie mwẹ lẹre, ye aghọnghọn ifuẹn ruẹ. 9 Gbogba ga mwẹ vbe obọ emwa dan ni gu mwẹ khọn, vbe obọ avbe eghian mwẹ ni lẹga mwẹ. 10 Iran i mwẹ itohan, iran wa vbe rhuọ. 11 Iran wa lẹga mwẹ nian, vbe ehe ne I rhirhi a mu aro daa. Iran gha gualọ ehe ne iran gha na si mwẹ gbotọ. 12 Iran yevbe oduma, iran gha khẹ mwẹ, iran gha khẹ ne iran yanghan mwẹ ukhiọnmwẹ ukhiọnmwẹ. 13 Gha dee, Jehova, gu avbe eghian mwẹ gbinna, ne u khọn miẹn iran otọ, ya umozo ruẹ fan mwẹ hin obọ iran ne emwa dan. 14 Ya ekuabọ ne olọ ruẹ miẹn mwẹ fan Jehova, vbe obọ emwa dan ni rre agbọn na, ni hoo ne iran gha mwẹ emwi hia ne iran gualọ nian, iran ne u viọ avbe emwi ni maan ne u kpemehe ẹre na, ni vbe sẹ ukhu rae yotọ khẹ emọ nibun ne iran mwẹ. 15 Sokpan, mẹ gha miẹn uwẹ aro, rhunmwuda, I ma ru khọọ. I gha rhiọrre, ẹko mwẹ gha vuọn ne oghọghọ rhunmwuda ighẹ wẹ rre evba.