Psalm

148 Wa rho e Jah! Wa rho e Jehova ke ẹrinmwi rre, wa ni rre ehe nọ yo vbe odukhunmwu. 2 Wa rho ẹre, wa ne avbe odibosa, wa ne ivbiyokuo ẹrinmwi ẹnrẹn hia. 3 Wa rho ẹre, owẹn kevbe uki, wa rho ẹre, wa ne avbe orhọnmwẹ ni baa. 4 Wa rho ẹre, ẹrinmwi nọ yo sẹ, kevbe avbe amẹ ni rre odukhunmwu iso. 5 Gi iran hia rho eni e Jehova, irẹn gie uhunmwu, a keghi yi iran hia. 6 Zẹvbe nọ tae, a keghi rhie dọmwadẹ ọghẹe ye ihe ẹre vbe etẹbitẹ, iran i sẹtin fieghe uhunmwu. 7 Uwa ke agbọn rho e Jehova, avbe evbayi nikhua nii rre okun kevbe avbe odin amẹ hia. 8 Ayan kevbe amẹ nọ zeze, esia, isonorhọ, okuku amẹ kevbe avbe okpẹhoho ni ru vbe nọ khare. 9 Wa rho ẹre, avbe oke, kevbe oke ni yo, erhan ni mọ ọmọ kevbe avbe erhan e sida. 10 Aranmwẹ oha, aranmwẹ owa, avbe aranmwẹ ni hiọrọ vbe otọ kevbe avbe ahianmwẹ. 11 Wa rho ẹre, avbe ọba kevbe emwa kẹkan hia, avbe ivbi ọba kevbe irriegie nidekẹe hia. 12 Evbokhunvbi kevbe avbe adesusu, avbe ọmaẹn kevbe ibiẹka. 13 Gi iran hia rho eni e Jehova! Eni ẹnrẹn hin usi sẹ eni hia. Uyi ẹre yo sẹ agbọn vbe ẹrinmwi! 14 Ọ ya ẹvbo ẹre khian nọ wegbe, sẹrriọ wẹẹ te emwa rẹn hia rho ẹre, avbe Ivbi Izrẹl ni ghaan nẹẹn ẹsẹse. Wa rho e Jah!