Psalm
109 I rho ruẹ Osanobua, ghẹ hunwan! 2 Emwa dan kevbe avbe ọhọnhoghe gha gu mwẹ gbinna, iran gha ba mwẹ ohoghe khian; 3 iran vbe ta ẹmwẹ dan vbekpa mwẹ, iran gu mwẹ gbinna vbene I ma na ru emwi rhọkpa. 4 Iran ghi gha solo mwẹ owẹ, agharhemiẹn wẹẹ, mẹ hoẹmwẹ iran; Sokpan te I ye na erhunmwu. 5 Iran ya ọkhọ ha osa ye ọmaan mẹ, iran ya ikhuiwu ha osa ye ahoẹmwọmwa mẹ. 6 Zẹ ọbuohiẹn dan, nọ ya bu ohiẹn avbe eghian mwẹ, ne u gi ọkpa vbe uwu avbe eghian rẹn gu ẹre gui. 7 Te a gha bu ohiẹn ọnrẹn wẹẹ, ọ rri abe; erhunmwu nọ na, te a gha kha ighẹ a i ghẹ ru, ẹre ọ yae ru! 8 Gi ufomwẹ ẹdagbọn rẹn zẹgiẹ rre; ne ọmwa ọvbehe rhie ihe ẹre vbe iwinna! 9 Te ivbi ẹre gha khian emọ nẹi mwẹ erha, ne amwẹ ọnrẹn khian okhuo nọ dẹgbẹe! 10 Te avbe ivbi ẹre gha khian enikpolugho ni vbu evbare re; te a gha vbe khulo iran kua, vbe uwu itowa ne iran te vbe ye. 11 Te iran nọ rri ọre osa gha viọ emwi ẹnrẹn hia, te ẹrrẹe gha viọ ekhuan nọ khuaẹn hia. 12 A i miẹn ọmwa nọ gha tohan rẹn, ra nọ gha koko emọ nẹi mwẹ erha nọ sẹrae. 13 Te ivbi uniẹn ọnrẹn hia gha wulo, te eni ẹnrẹn gha gbẹro hin orre nọ dee rre. 14 Te Jehova gha ye orukhọ ọghe avbe erha odede ẹre rre, ẹ i khian ya orukhọ ọghe iyẹe bọe. 15 Te Jehova gha ye orukhọ iran rre rhinrin, sokpan, te a gha wa mianmian iran tobọ iran fẹfẹẹfẹ! 16 Oko nii ma zẹdẹ rẹn wẹẹ a vbe tohan ọmwa hiehie, ọ kegha khulo emwa na ya obọ yẹnyẹn ginna otọ, ivbiogue, kevbe emwa ne iro han rẹn nọ mieke na gbele iran rua. 17 Ihẹn na tie yẹẹ ọre, te ọ gha khian na fi ẹre unu! Ọ ma hoẹmwẹ erhunmwu afiangbe, a i khian miẹn ọmwa nọ gha na erhunmwu nẹẹn. 18 Ọ ya ihẹn na tie yọ ẹwu. Te iran ghi hihiẹ ye ọre egbe zẹvbe amẹ, ọ keghi rọn la uwu ugboloko ẹre zẹvbe ofigbọn! 19 Ihẹn nọ tie ghi gbalọ ẹre egbe khinkhian zẹvbe ukpọn kevbe ugbẹkun. 20 E Jehova, u ghi rria avbe eghian mwẹ ikhi vberriọ, iran ni wa ta egbe ẹmwẹ dan vberriọ ghee mwẹ! 21 Sokpan, Jehova ne Osanobua mwẹ, yọ mwẹ obọ zẹvbe ne u khare, ne u wọlọ mwẹ ladian rhunmwuda umamwẹ ọghe ahoẹmwọmwa ruẹ nẹi beghe. 22 Ovbiogue kevbe nẹi mwẹ iyobọ, ẹre imẹ khin; ẹko zughu mwẹ ya sẹ otọ ibiẹ. 23 Te a ghi khian ho mwẹ bẹkun na, zẹvbe aghọnghọn ota; a hoho mwẹ fua zẹvbe ovbi irhiso. 24 Te igbọn mwẹ ghi ye lughọlughọ rhunmwuda ohanmwẹ, I i ghi mwẹ egbe gberra uvẹ vbe ikpakpa. 25 Emwa gha bẹghe mwẹ, iran ghi fieghe uhunmwu ya gbe ọsọre mẹ. 26 Yọ mwẹ obọ, Eo Jehova ne Osanobua mwẹ; rhunmwuda ahoẹmwọmwa ruẹ nẹi beghe miẹn mwẹ fan.