Job

39 “Wẹ rẹn ẹghẹ ne ẹwe oke ya biẹ ra? Wẹ he bẹghe ẹrhuẹ vbe iran ghaa biẹ ra? 2 U vbe rẹn inu ẹghẹ ne iran mu ovbi iran la ra? U vbe rẹn ẹghẹ ne iran ya biẹ ra? 3 U rẹn ẹghẹ ne iran gha ya rhuẹ yotọ ra, ne iran biẹ ovbi iran ye agbọn? 4 Ivbi iran ghi waan, iran ghi wegbe vbe uwu oha, iran ghi kpa vbe ne iran i ghi na vbe dọlegbe rre. 5 Gha ọ rhie a yan egbe ọmwa ne ekẹtẹkẹtẹ oha yi? Gha ọ rhan iran kua ne iran ya gha hẹ yo hẹ rre? 6 Mẹ rhie ato ne iran, nọ gha re owa iran, I na wẹẹ ne iran vbe gha rre otọ nọ rriẹ ọghe umwẹ. 7 Iran ghi wa gban egbe ne orere ẹvbo, ni vuọn ne owogho, a i miẹn ọmwa nọ gha sẹtin rri iran, nọ ya iran gha winna. 8 Avbe oke nikhua ọre otọ ne iran na rria, ehe ne iran na gualọ emwi nọ rhirhi bi nunuunu ne iran gha re. 9 Ede gha winna ne uwẹ ra? Ọ he rre nọ do gbe asọn ọkpa vbe aza emwirri ruẹ ra? 10 U gha sẹtin ya irri dee ọkpa vbọ ra? Ne u we nọ do gha vulo otọ? 11 U gha sẹtin mu ẹtin yan ẹtin ẹnrẹn nọkhua ra, ne u gha khẹ ọre nọ do winna iwinna ruẹ nọ lọghọ? 12 Te u khẹ ọre nọ do viọ emwi orhọ ruẹ gha die owa ra, ra nọ do viọ ọka ruẹ hin ehe ne u na wiẹn ọka rre? 13 Vbe okhian a kẹ ifuẹn ugomugo sẹ hẹ yi? Sokpan ugomugo i tin utinmwẹ ahua. 14 Te ugomugo sẹ ekẹn ọnrẹn rae yotọ, ne otọ nọ mwẹ ọghae gha mwẹ ọghae muẹn. 15 Ọ ma rẹn wẹẹ, a sẹtin ya owẹ guọghọe rua, ra ne aranmwẹ oha guọghọ iran rua. 16 Ọ ghi gha ru vbene a miẹn wẹẹ, ẹ i re irẹn ẹre ọ yan ekẹn nii, a ma wẹẹ te ọ khian zẹyọ wẹẹ te a mu irẹn ẹghẹ rhia. 17 Mẹ ẹre ọ ru ẹre nọ kọn, ne I ma na vbe rhie ẹwaẹn nẹẹn. 18 Sokpan, ọ gha suẹn gha rhulẹ nẹ, te ọ ya ẹsin kevbe nọ hin ẹnrẹn gbe ogiẹ. 19 E Job, uwẹ ẹre ọ ru ẹre ne avbe ẹsin na wegbe sẹrriọ ra, u na vbe viọ eto ẹyaẹn ọghe iran ne yọyọyọ ne iran ra? 20 Uwẹ ẹre ọ ru ẹre ne iran gha san vbe irhiso ra, ne iran na vbe tin ihin ya runran emwa? 21 Te ọ bọbọ ẹre egbe vbe ọ gha hin oke ra iya, ẹtin ẹnrẹn hia ẹre ọ ya khọn la uwu okuo. 22 Iran ma rẹn emwi na ya ohan kha, umozo ọkpa i rrọọ nọ gha khu iran werriegbe.