Job

28 “A miẹn uvun na ke zẹlẹ esiliva ladian vbe uwu otọ; a miẹn ehe na na ya erhẹn kpe igoru huan. 2 Uwu otọ ẹre emwa ke tọnnọ ematọn ladian, ọ ghi vbe ranran oze ke uwu okuta ladian. 3 Emwa ye gualọ otọ ehe nọ dinmwi vbe uwu otọ. Iran ghi gualọ otọ ehe nọ dinmwi vbe uwu otọ. Iran ghi gha tọnnọ gualọ okuta nikhua khian vbe ebiebi. 4 Ehe nọ wa rree ne ọmwa i ye, ra ne owẹ ọmwa ma he rhanmwẹ ẹdẹ, emwa ghi tọnnọ uvun na ke zẹlẹ emwi ighobioye ladian, iran ghi sikan mu irri vbe uwu uvun nii. 5 Uwu otọ ẹre evbare ke zọ ladian, sokpan, vbe ototọ ẹre ighẹ nene otọ na, a yanghan emwi hia rua, a keghi vbe rẹnkhẹn ehia rua. 6 E safaya rre uwu okuta ni rre otọ, igoru vbe rre ebubẹ ni rrọọ. 7 Ahua i miẹn ehe na la la uvun emwi ighobioye vbe uwu otọ, ugu i vbe tin la uhunmwu iran gberra. 8 Oduma ra aranmwẹ dan ọvbehe, nọ la odẹ nọ divbiẹ nii i rrọọ. 9 “Emwa ye tọnnọ uwu okuta nọ wegbe sẹ, iran tọnnọ oke nikhua la ẹzi hẹ kua. 10 Ehe ne iran na tọnnọ uvun zẹ odẹ la uwu okuta gberra nii, iran ghi gha miẹn avbe okuta ighobioye. 11 Iran tọnnọ uvun ya sẹ ehe ne ẹzẹ na suẹn. Iran wọlọ otọ emwi ni rhie egbe lẹre ladian. 12 “Sokpan de ehe na gha na miẹn ẹwaẹn? De ehe na gha na ruẹ vbene a ya miẹn ẹwaẹn? 13 A i miẹn ẹwaẹn vbe uwu ẹbu emwa, ọmwa nọ mobọ rẹn igho ẹre, ẹ i rrọọ. 14 Odin avbe okun kevbe ẹzẹ nikhua tae wẹẹ, a i ra miẹn ẹwaẹn vbe evba. 15 A i sẹtin ya esiliva ra igoru dọe. 16 Igoru nọ ghi maan sẹ, ra ikpẹrọnmwọ ighobioye i sẹtin vba igho ẹre. 17 Igho ẹre sẹ ọghe igoru, sẹ ovbiukpu itegbe ra ukpu nọ ghi mose sẹ ehia. 18 Igho ẹwaẹn kpọlọ sẹ igho ivie ra ekristal ra e rupi. 19 Etopaz nọ mose sẹ kevbe igoru nọ huan sẹ ehia, i zẹdẹ re na ya gie ive ẹwaẹn. 20 “De ehe ne ẹwaẹn ghi ke rre yi khekherriọ? De ehe ne ima gha na ya ruẹ vbene a ya rẹn otọ emwi hẹ? 21 Emwi na yi ọkpa nọ gha sẹtin bẹghe ẹre i rrọọ, ya sẹ egbe ahianmwẹ nọ tin khian. 22 Uwu kevbe ọfuan tobọ iran miẹn kue wẹẹ, ‘Awẹawẹ ẹre iran he họn vbekpa ẹre.’ 23 Osanobua ọkpa ẹre ọ rẹn nene odẹ. Ọ rẹn ehe na gha na miẹn ẹwaẹn. 24 Rhunmwuda, te irẹn bẹghe ehe ne agbọn sẹ. Ọ bẹghe emwi hia, ni rre ototọ iso. 25 Ẹghẹ ne Osanobua na rhie ẹtin ẹhoho nẹẹn, nọ na vbe mwa vbene okun gha kpọlọ sẹ hẹ, 26 ẹghẹ ne Osanobua na ta ehe ne amẹ gha rhọọ yi, kevbe odẹ ne avanukhunmwu gha khian la, 27 ẹghẹ nii ẹre irẹn na miẹn ẹwaẹn, ọ na mwa inu igho ẹre ghee—irẹn keghi ya obọ yọ vberriọ. 28 Osanobua keghi tama emwa nagbọn wẹẹ, ‘Deghẹ uwa hoo ne uwa gha waan, wa ghi gha ya ọghọ ne Jehova. Ne uwa miẹn ehe na rẹn otọ emwi, te uwa gha fi werriẹ hin ọkhọ rre.’