Job

26 Ẹre Job na wanniẹn wẹẹ, 2 “U miẹn iyobọ ne u ru mẹ na, mẹ ne ogue ne mitanmitan. 3 U ru ibude esi, u keghi vbe ghae vbe irẹnmwi ruẹ ne akpa vbene I ye na. 4 De ọmwa ne uwẹ roro ighẹ ọ gha họn ẹmwẹ uwẹ na hia? Gha ọ gua ekhọe ruẹ kpa ne u ya guan vbenian na? 5 “Orhiọn iran ni wulo nẹ gha guọ vbe uwu amẹ nọ rre ototọ otọ na. 6 Odaro Osanobua ẹre agbọn iran ni wulo nẹ ye. Emwi nọ degue ẹre hin ehe nọ ye rre i rrọọ. 7 Osanobua ẹre ọ tan iso nọ rre odẹ okuọ. Ọ na mu agbọn na rrọọ ye ideghedeghe. 8 Osanobua ẹre ọ ya amẹ vuọn ikpakpa iso, ọ ma vbe gi ukhuamwẹ ihẹ nọ mu, yae vẹẹ rua. 9 Ọ rhie uki nọ koo urro lẹre ye iyeke okuku amẹ. 10 Ọ ya uviẹn okhiokhi nọ vin ye okun, ọ ma vbe gi ukhuamwẹ ihẹ nọ mu, yae vẹẹ rua, wannọ uwanmwẹ hin ebiebi rre. 11 Ọ gha zẹ aro mu avbe orrẹ ni da iso yi, ohan ghi ya iran gha guọ, iran ghi vbe gha mian zẹghẹzẹghẹ. 12 Ẹtin ẹnrẹn ẹre ọ khọnmiotọ okun. Ẹwaẹn rẹn ẹre ọ ya fuẹn Rehab ne ugbogiorinmwi. 13 Uhiọnrọnmwẹ ọnrẹn ẹre ọ ya iso huan, obọ ọre ẹre ọ gbe ugbogiorinmwi nọ te ra lẹẹ fua. 14 Sokpan, ẹmwẹ nọ ya ha ọmwa ehọ, ẹre ena khin vbekpa ẹtin ẹnrẹn. Ewẹwẹwẹ nọ fi la ehọ. De ọmwa nọ gha sẹtin rẹn vbene ọ gele kpọlọ sẹ hẹ?”