Ẹsta

9 Ikpẹdẹ eha yan ugie vbe uki nogie eha na tie ẹre Sivan, ẹre emwi na sunu. E Modẹkai keghi tie avbe ọgbenbe ọba, ọ na talọ ẹmwẹ ne iran gha gbẹnnẹ ye ebe gie avbe Ivbi e Ju, ma iran gha gbẹnnẹ ye otọ, kevbe gie avbe ni khaevbisẹ, avbe eghaẹvbo, kevbe iran ne ẹwae ọba ni rre iyaẹvbo ihinrọn yan iyehan ni ke India ya sẹ e Sudan. 10 E Modẹkai keghi ya ẹvbo ne iran zẹ gbẹnnẹ ọnrẹn gie dọmwadẹ iyaẹvbo, kevbe vbene iran ya gbẹn ebe iran. Ọ keghi vbe gbẹnnẹ gie avbe Ivbi e Ju vbe ẹvbo ne iran zẹ kevbe vbene iran ya gbẹnnẹ emwi yotọ hẹ, vbe eni e Kzakzis, ọ keghi vbe mu ama asẹ ọghe ọba gbẹe. 11 Ebe na keghi kha wẹẹ, ọba gha kue ne Ivbi e Ju ku obọ gbe, avbe otu otu vbe dọmwadẹ ehe ne iran ye, ne iran ya gbinna ne egbe iran. Adeghẹ ivbi ẹvbo ke ẹvbo nọ rhirhi a gha khin ghi do hẹ rhu uwa ke iran kevbe emwi igbinna vbe obọ, wa ghi gu iran gbinna, ne uwa rẹnkhẹn iran rua, kevbe amwẹ iran, kevbe ivbi iran. Iran sẹtin wa gbele iran vbene ọkpa i ghi na vbe kẹ vbọ, iran ghi vbe viọ emwi ne iran mwẹ. 12 Ẹmwẹ na, te a wẹẹ na muẹn sẹ la otọ Arriọba e Pẹsia hia, vbe ẹdẹ ne iran mwamwa ye otọ ne iran ya gbele Ivbi e Ju, ọni ọre ikpẹdẹ nogie iweha ọghe uki Ada nọ re uki nogie iweva. 13 Te a ra yae wewe zẹvbe uhi, a ghi vbe tae ma emwa hia ni rre dọmwadẹ otọ arriọba, ne Ivbi e Ju miẹn ehe na rria avbe eghian iran ikhi vbe ọ gha sẹ ẹdẹ ne ẹdẹrriọ. 14 Ugbẹnvbe ọba ghi tae nẹ, iran ni hin ẹsin keghi viọ ẹsin ọba, iran na vin la odẹ vbe ulẹ ọbanban. A keghi vbe wewe uhi na vbe adesẹ orere Susa ne igiogbẹ otọ nii. 15 Emwi ne Modẹkai hẹ ye egbe ladian vbe ẹguae kegha re ẹwu ọba na ya eto ovbiohuẹ ododo se, ọ keghi vbe mu ẹde igoru ne mose mose rhuẹ. Orere Susa hia na gha wee ne oghọghọ. 16 Ẹko Ivbi e Ju keghi vuọn ne oghọghọ ọghe a fe vbe iwe, ọyẹnmwẹ kevbe akhọnmiotọ. 17 Ehe na rhirhi na tie ẹmwẹ ne ọba tae na, vbe avbe orere nikhua kevbe iyaẹvbo, Ivbi e Ju ghi zobọ vbe iwinna, iran ghi ya oghọghọ titi ẹre deba ọyẹnmwẹ. Vbe ẹmwata, emwa nibun ọvbehe kegha tie egbe iran Ivbi e Ju rhunmwuda te ohan iran ghi gha mu iran.