Ẹsta

7 Ẹre ọba kevbe Haman na gba gha khian ne iran ya gu Ẹsta ne Oloi rri evbare ukpogieva. 2 Ehe ne iran na da ayọn nii, ọba keghi nọ rẹn ukpogieva wẹẹ, “Ẹsta ne Oloi, de emwi ne u hoo? Tama mwẹ, ọ gha sẹ ruẹ obọ, I gha sẹtin ghae otọ arriọba mwẹ, mu obọ ọkpa vbọ nuẹn.” 3 Ẹsta ne Oloi keghi wanniẹn wẹẹ, “Adeghẹ ọ yẹẹ ruẹ Umogun ne u ru mẹ vbene I nọ rẹn, emwi ne I hoo ọre wẹẹ na gi imẹ kevbe emwa mwẹ dia agbọn ya. 4 Ke imẹ kevbe emwa mwẹ, a khiẹnnẹ ima nẹ wẹẹ na gbele ima rua. Akpawẹ te a khiẹnnẹ ima kua ne ima gha re eviẹn emwa ọvbehe, I ghẹ zẹdẹ kpokpo ruẹ, I gha hẹko hunwan, sokpan, te a ghi ra fuẹn ima rua na, ne ima wa wu gbẹro.” 5 Ẹre Kzakzis ne ọba na nọ Ẹsta wẹẹ, “De ọmwa nọ ra din ru egbe emwi vberriọ yi? Nene ọmwa vbo yi?” 6 Ẹsta keghi wanniẹn wẹẹ, “Oghian ima nọ zẹ ima kpokpo ọre ọmwa dan na ighẹ Haman.” E Haman keghi ya ohan nọkhua bolo aro rua gha ghee ọba kevbe oloi.