Nehimaia
27 Ẹghẹ na na ya ekẹn na gbe lẹga e Jerusalẹm fi ohan, a keghi ya viọ avbe Ivbi e Livai ke ehe ne iran rhirhi gha ye rre, ne iran deba ugie a ya fi ohan nii, vbene iran gha na so ihuan ekpọnmwẹ deba isẹ kevbe akpata na kpee. 28 Uniẹn avbe Ivbi e Livai ni so ihuan keghi ke ehe ne iran ye vbe ọkpẹn e Jerusalẹm gha dee, kevbe avbe ẹvbo ni lẹga e Nẹtofa, 29 kevbe Betgigal, e Geba kevbe Azmavẹt. 30 Avbe ohẹn kevbe avbe Ivbi e Livai keghi kpee egbe iran huan, iran na vbe kpee emwa nii huan kevbe avbe onurho kevbe ekẹn ẹvbo nii. 31 I keghi si avbe ọkaolotu e Juda koko vbe uhunmwu ekẹn nii, I keghi ghae emwa nii ye otu nikhua eva viọ ne iran, ne iran gbe ukpukpẹ lẹga ẹvbo nii, ne iran gha kpọnmwẹ Osanobua. Otu nokaro keghi gbe ẹre la obọ erha ọmwa vbe uhunmwu ekẹn nii ghee odẹ Urho Iku. 32 E Hosiaia keghi lele iran ni so ihuan odiyeke, vbene obọ ọkpa vbe a gha waa avbe ọkaolotu e Juda ye ihe eva, na lelẹe. 33 Avbe ohẹn ni gha kpe okpe keghi lele iran iyeke, Azaraia, Ẹzra, e Mẹsiulam, e Juda, e Bẹnjamin, 34 e Siemaia kevbe Jerimaia. Ọmwa nọ ghi lele iran nii kegha re Zẹkaraia ne ovbi e Jonatan kevbe eyẹ ọghe Siemaia. 35 (Usun avbe erhae odede ẹre iran vbe ye ighẹ e Matanaia, e Mikaia kevbe Zako ne uniẹn Asaf.) 36 Emwa ẹwae ẹre ọvbehe keghi vbe lelẹe, avbe Siemaia, Azarẹl, e Milali, e Gilalai, e Maai, e Netanẹl, e Juda kevbe Hanani, iran na hia keghi viọ emwi na kpee mwẹ obọ, egbe ne Devid ne ọba ne ọmwa Osanobua ghaa kpee. Ẹzra nọ rẹn ebe dinmwi ẹre ọ viọ iran na mwẹ obọ gha khian. 37 Iran ghi sẹ Urho Uhunmwu Ẹzẹ, iran keghi hin ikpawẹ nọ rrie Ẹvbo e Devid, iran keghi gberra ẹguae Devid, iran na dọlegbe do hin ekẹn nii vbe Urho Amẹ vbe odẹ ahọ ẹvbo nii. 38 Otu nọkpa nọ vbe kpọnmwẹ keghi la ghee obọ iye ọmwa lele uhunmwu ekẹn nii, mẹ keghi lele obọ ọkpa vbe uwu iran na gha khian. Ma keghi si ukpukpẹ gberra Owa Ọkhẹ ne geletee ọghe Aroewu kevbe ya sẹ Ekẹn Negbadaa. 39 Ma keghi ke evba ya la Urho Ifreim gberra, Urho e Jesiana, Urho Ehẹn, Owa Ọkhẹ Ne geletee ọghe Hananẹl, kevbe Owa Ọkhẹ ne geletee ọghe iran ne Iyisẹn ya sẹ Urho Ohuan. Ma keghi do muẹn ye otọ vbe ọkpẹn Urho Ọgua Osa.