Ẹzra

5 Vbe ẹghẹ na kha na, akhasẹ ighẹ Hegai kevbe akhasẹ ighẹ Zẹkaraia ne eyẹ Ido, keghi suẹn gha ta ẹmwẹ akhasẹ ma Ivbi e Ju ni rre Juda kevbe Jerusalẹm vbe eni ọghe Osanobua Izrẹl. 2 Ugbẹnvbe Zẹrubabẹl ne ovbi e Sitiẹl kevbe Jẹsua ne ovbi e Jehozadak ghi hon ẹmwẹ ne iran ta, iran keghi suẹn gha dọlegbe bọ owa ọghe Osanobua nọ rre Jerusalẹm. Avbe akhasẹ ọvbehe ni ghaa rre evba keghi vbe gha yi iran obọ. 3 Ọwarọkpa nii, ẹre Tatenai nọ khaevbisẹ yan otọ orrie ọghe Yufretes, e Sieta-Bozenai kevbe avbe emwa ni rre asẹ ne ihua iran, na gha die Jerusalẹm, iran keghi nọ wẹẹ, “Gha ọ rhie asẹ ne uwa ya bọ Ọgua Osa na, kevbe ne uwa vbe viọ emwi hia yọ?” 11 “Iran keghi wanniẹn wẹẹ, ‘Eguọmwadia Osanobua ẹrinmwi kevbe agbọn ẹre ima khin, te ima dọlegbe bọ Ọgua Osa ne ọba nọ mwẹ ẹtin ọghe Izrẹl bọe vbe ẹghẹ nọ kpẹẹ fua. 12 Sokpan, ugbẹnvbe avbe erha mwa odede ghi ya ohu mu Osanobua ẹrinmwi, ọ na gie Nebukadneza ne Ọba e Babilọn ya khọn iran, uniẹn Ivbi e Kialdia ẹre ọba na khin. Iran keghi guọghọ Ọgua Osa rua, iran na viọ emwa nii gha rrie imu vbe Babilọn. 13 Ẹre ọ ghi na sẹ ukpo nokaro ne Sairọs ne ọba la ẹkete zẹvbe ọgbaisi ọghe Babilọn, e Sairọs keghi gie wẹẹ na dọlegbe bọ Ọgua Osa nii. 14 Ọ na viọ iran werriegbe rre ighẹ avbe emwi na loo vbe Ọgua Osa, ọghe igoru kevbe ọghe esiliva ne Nebukadneza viọ vbe Ọgua Osa nọ rre Jerusalẹm gha rrie aro ẹbọ vbe Babilọn. E Sairọs ne Ọgbaisi keghi viọ avbe emwi na ne okpia ọkpa na tie ẹre Siẹsbaza ne irẹn ya ru nọ khaevbisẹ ọghe Juda. 15 Nọgbaisi nii keghi tama rẹn nọ viọ avbe emwi nii werriegbe gha rrie Ọgua Osa nọ rre Jerusalẹm, nọ vbe dọlegbe bọ Ọgua Osa ye ehe nọ te ka gha ye yi. 16 Ẹre Siẹsbaza na do gbe ẹyotọ ẹre, te a ghi bọe khian ke ẹghẹ nii gha dee do sẹ banbanna, sokpan a ma he ye bọe fo.’ 17 “Banbanna nian Umogun, adeghẹ ọ yẹẹ ruẹ, u sẹtin wẹẹ na gualọ otọ emwi na, vbe ehe na gbẹnnẹ ẹmwẹ ẹguae yi, na miẹn ehe na rẹn deghẹ e Sairọs gele wẹẹ na dọlegbe bọ Ọgua Osa nọ rre Jerusalẹm ra ọ ma kha vberriọ, vbe iyeke ọni, uwẹ ghi vbe gi ima rẹn vbene ẹmwẹ na ye hẹ vbe ekhọe ruẹ.”