Ẹzra

4 Ẹre emwa ni ka rre otọ nii dee, na suẹn gha ye egbe wọọ Ivbi e Ju, iran kegha ye ohan mu iran, iran na gha da iran obọ yi, ne iran ghẹ bọ owa nii. 8 Ye vbe deba ọni, e Rehum nọ khaevbisẹ kevbe Simsiai ne ọgbenbe, keghi gbẹn ebe gie Atakzaziz ne Ọgbaisi vbekpa e Jerusalẹm wẹẹ: 9 (E Rehum nọ khaevbisẹ, e Simsiai ne ọgbenbe ẹvbo, iran ne ihua mwa kevbe iran ni bu ohiẹn, kevbe avbe emwa ọvbehe ni rre asẹ, avbe emwa ni ke Erek rre, kevbe Babilọn kevbe Susa vbe otọ Elam, 10 do deba avbe emwa nekpa ne Asenapa ne okpọmwa munọ hin ẹvbo iran rre, ọ na ya viọ iran ye Sameria kevbe ehe ọvbehe vbe obọ orrie ọghe otọ ni lẹga e Yufretes, ẹre ọ gbẹn ebe na. 11 Ẹmwẹ nọ rre nene ebe ẹre ọna khin.) “Eguọmwadia ni rre obọ orrie ọghe otọ ni lẹga e Yufretes ẹre ọ gbẹn ebe na gie Atakzaziz ne Ọgbaisi: 12 Ma wẹẹ na guẹ rẹn Umogun wẹẹ avbe Ju ni ke otọ ruẹ nii rre, do yin e Jerusalẹm nian, iran gha dọlegbe bọ ẹvbo dan nọ sọtẹ nii. Iran suẹn gha gbe ekẹn nọ lẹga ẹre nẹ, ẹi ghi rree gbe, iran bọe fo. 13 Umogun, a gha miẹn wẹẹ, a dọlegbe bọ ẹvbo na kevbe ekẹn na gbe lẹga ẹre fo, emwa nii gha dobọ igho uhunmwu na zẹ mu guẹ, ẹghẹ nii, ẹfe ruẹ zẹvbe ọba ghi do dibu. 14 Banbanna nian, rhunmwuda ighẹ te ima rre asa ọghe uwẹ ne Umogun, ma ma hoo ne emwi vberriọ sunu, ẹre ima ghi na zọe vbe iro nian wẹẹ, 15 na ya gualọ uwu emwi ne avbe erhaa odede gbẹnnẹ yotọ. A gha ru ẹre vberriọ, u gha miẹn wẹẹ te ẹvbo na wa sọtẹ ẹdẹdẹmwẹdẹ, kevbe wẹẹ ke ẹkpo nẹdẹ gha dee, ukpokpo ẹre ọ rhie ne avbe ọba kevbe avbe ogie isi hia. Ivbi ẹvbo nii keghi re emwa nẹi gia kha yan. Ọni ẹre ọ si ẹre na na dunmwu ẹvbo nii rua. 16 Rhunmwuda ọni, aro ima dae wẹẹ, adeghẹ a dọlegbe bọ ẹvbo na, na vbe gbe ekẹn nọ lẹga ẹre fo, ẹtin ruẹ i ghi sọe Umogun wẹẹ ne u ye gha kha yan avbe otọ ẹvbo ni rre orrie ọghe Yufretes.” 17 Ọgbaisi keghi rhie ewanniẹn na gie iran: “E Rehum nọ khaevbisẹ, e Simsiai ne ọgbenbe ẹvbo, kevbe ihua ni rre Sameria kevbe otọ nekpa vbe odẹ orrie ọghe Yufretes, I giotuẹ uwa. 18 A tie ebe ne uwa gbẹn gu mwẹ nẹ, a vbe zedu ẹre ma mwẹ. 19 I vbe gie nẹ wẹẹ na gualọ otọ re, a keghi gele miẹn wẹẹ ke ẹkpo nẹdẹ gha dee, te Jerusalẹm wa sọtẹ daa avbe ọba, kevbe wẹẹ etẹ kevbe ọgbẹti ẹre a miẹn vbọ. 20 Avbe ọba ni mwẹ ẹtin ka vbe rri ọba vbe evba, iran na gha kha yan ehe ne otọ orrie ọghe Yufretes sẹ ke nọ rhanmwẹ hia, iran keghi vbe gha koko igho otọ. 21 Rhunmwuda ọni, uwa ya khama iran wẹẹ ne avbe emwa nii dobọ owa na dọlọ bọ nii yi, rhinrin I te vbe do gie uhunmwu rre. 22 Uwa ru emwi na ẹgiẹgiẹ, ne iran ghẹ ghi fi obọ yọ mwẹ unu.” 23 A ghi wa tie ebe ne Atakzaziz ne Ọgbaisi gbẹn rre na ma Rehum, e Simsiai kevbe ihua iran, iran keghi wa zẹgiẹ rhulẹ gha rrie Jerusalẹm, iran na ya da avbe Ivbi e Ju obọ yi vbe ẹvbo ne iran bọ. 24 Ẹghẹ nii ẹre a ghi ya da obọ iwinna yi vbe Ọgua Osa, ọ keghi dobọ yi rhinrin ya sẹ ukpo nogieva ne Dariọs ne Ọgbaisi e Pẹsia la ẹkete.