1 Ọba

22 Ẹghẹ nii, ẹre Solomọn na ya mudia ye odaro ogiukpo ọghe Jehova, vbe ehe ne emwa hia ye. Ọ keghi viọ obọ daa odukhunmwu. 23 Ọ na na erhunmwu wẹẹ, ”‏E Jehova, Osanobua Izrẹl, ọba ọkpa nọ yevbe ruẹ i rrọọ vbe odukhunmwu vbe ẹrinmwi ra agbọn vbe ototọ! Te u ru vbene ile ne u tae khare, u ghi vbe gha mwẹ itohan nẹi fi werriẹ ghee emwa ruẹ ni ya ekhọe hia mu ẹmwẹ ruẹ sẹ. 24 U mu eyan ne u yan ma e Devid ne erha mwẹ ne ọguọmwadia ruẹ sẹ, ẹdẹnẹrẹ na nian, u ru zẹ vbene u yan rẹn. 27 “Osanobua gha gele dia uhunmwu otagbọn na ya ra? Avbe ẹrinmwi, uhiẹn ẹrinmwi ọghe avbe ẹrinmwi i khian sẹtin gua ruẹ; inu ghi nọ ne owa ne I bọe na?” 31 “A gha kha wẹẹ orhunmwu ọkpa ru ọmwa ọvbehe khọ, a na muẹn gha die ogiukpo vbe Ọgua Osa na nọ do vẹn ihẹn wẹẹ irẹn ma rẹn ọkpa ọ ma rẹn eva, 32 u ghi họn vbe ẹrinmwi ne u bu ohiẹn eguọmwadia ruẹ. Rri e nọ rri abe oya zẹ vbene ọ khẹke ẹre, ne u vbe zẹ orhue ne nọ ma ru khoọ gbe. 33 “Adeghẹ eghian ghi khọn emwa ruẹ ne Ivbi Izrẹl miotọ, rhunmwuda ne iran na rukhọ ghee ruẹ, iran na werriegbe bu ruẹ gha dee, ne iran do rho ruẹ kevbe ne iran vbe na erhunmwu ghee ruẹ vbe Ọgua Osa na, ne u yabọ iran, 34 u ghi danmwehọ iran vbe ẹrinmwi, ya orukhọ ọghe emwa ruẹ bọ iran, ne u vbe viọ iran werriegbe gha die otọ ne u mu ne erha iran odede. 35 Adeghẹ emwa ruẹ rra iyi ruẹ, u na rri iran oya vbene u ma na ghi gi amẹ rhọọ ne iran, iran na fiwerriẹ, iran mu aro da Ọgua Osa na, iran na na erhunmwu, iran na rho ruẹ, 36 u ghi danmwehọ iran vbe ẹrinmwi, u ghi ya orukhọ ọghe Ivbi Izrẹl bọ iran. Ma iran vbene a yin ẹse hẹ, ne u gie amẹ rhọọ ye otọ ruẹ, ne u mu ne emwa ruẹ nọ gha re ọghe iran ẹdẹdẹmwẹdẹ. 37 “Adeghẹ te ukhunmwu ghi fi vbe otọ nii, ra te okpemianmwẹ ghi rrọọ, ra te okpe ẹhoho ghi dunmwu emwiokọ rua, ra deghẹ te eghian ọghe iran ghi zagha avbe emwa ruẹ kua, ra deghẹ te emianmwẹ ke emianmwẹ la iran egbe, 38 u ghi danwehọ erhunmwu iran. Adeghẹ emwi na gha ba so ọmwaikọmwa vbe uwu Ivbi Izrẹl ne emwa ruẹ, (rhunmwuda, dọmwadẹ ọghẹe ẹre ọ rẹn emwi nọ dae vbe orhiọn) iran na niẹn obọ daa Ọgua Osa na na erhunmwu, 39 u ghi họn erhunmwu iran. U ghi danmwehọ iran vbe owa ruẹ vbe ẹrinmwi, u ghi ya orukhọ bọ iran ne u guan yọ. Uwẹ ọkpa kẹkan ẹre ọ rẹn emwi nọ rre emwa hia ekhọe. Ru ne dọmwadẹ ọghẹe zẹvbe nọ khẹke ẹre. 40 Ne emwa ruẹ miẹn ehe na gha mu ohan ruẹ vbe ẹghẹ ne iran gha ya vbe otọ ne u mu ne avbe erha iran odede. 41 “Adeghẹ orhunmwuyẹn nọ rre ẹvbo nọ rree họn usi ruẹ, kevbe emwi ni kọnkọn ne u he ru ne emwa ruẹ, 42 ọ na gha dee do ga kevbe nọ vbe na erhunmwu vbe Ọgua Osa na, 43 u ghi họn erhunmwu ẹnrẹn vbe ehe ne u ye vbe ẹrinmwi, ne u vbe ru emwi nọ wẹẹ ne u ru, ne emwa ne agbọn hia miẹn ehe na rẹn ruẹ, ne iran vbe gha mu ohan ruẹ zẹ vbene emwa ruẹ mu ohan ruẹ. Iran ghi do rẹn wẹẹ, Ọgua Osa na ne I bọe na ọrọre ehe na na ga a.