1 Ọba

3 E Solomọn keghi kpe iku gie ọba ọghe Igipt, ọ na rhie ovbi ẹre nokhuo okpa rọnmwẹ. Ọ keghi rhie ẹre gha die ẹvbo e Devid ọ te do bọ ẹguae ẹre kevbe Ọgua Osa kevbe ekẹn nọ lẹga e Jerusalẹm fo. 2 A ma he bọ Ọgua Osa ne Jehova, rhunmwuda ọni, ihe ughughan nibun ẹre emwa na ye gha zọ ese. 3 E Solomọn keghi hoẹmwẹ e Jehova ọ keghi vbe gha ru vbene Devid ne erhae tama rẹn, sokpan, ọ na gha gbele aranmwẹ, ọ na gha ya iran zọ ese vbe ogiukpo ughughan. 4 Ọ ghi sẹ ẹghẹ ọkpa, ọ na gha rrie Gibiọn nọ ya zọ ese, rhunmwuda, evba nii ẹre ogiukpo nọ hin usi sẹ ghaa ye. Ọ ka vbe ya emwi izọese na giẹn rua iyisẹn iyisẹn zọ ese vbe evba nii yi, vbe ẹghẹ nọ gberra. 5 Vbe asọn nii, e Jehova keghi rhie egbe ma rẹn vbe imina, ọ nọ rẹn wẹẹ, “De emwi ne u hoo ne I ru nuẹn?” 6 E Solomọn keghi wanniẹn wẹẹ, “Erriọ ẹre u vbe gha hoẹmwẹ e Devid ne erha mwẹ, ọguọmwadia ruẹ, irẹn keghi wa vbe gha maan, ọ guobọ ruẹ, ọ na vbe gha re nọ gia mu ẹtin yan vbe emwi nọ ghaa ru vbe odaro ruẹ. U keghi yevbe gha hoẹmwẹ ọnrẹn khian, vbe ekpa ne u na rhie ọmọ okpia nẹẹn nọ rri ọba lelẹe. 7 E Jehova ne Osanobua mwẹ, u ya mwẹ rri ọba lele erha mwẹ nẹ, agharhemiẹn wẹẹ, ọvbokhan ẹre I khin, I ma vbe rẹn vbene a ya gbaroghe ẹvbo hẹ. 8 Ghee mwẹ nian vbe uwu ẹbu emwa ne u zẹẹ nọ gha re ọghuẹ, emwa na miẹn wẹẹ iran bun sẹrriọ wẹẹ, ai vbe sẹtin ka iran. 9 Rhunmwuda ọni, rhie ẹwaẹn mẹ ne I ya gha gbaroghe emwa na vbe na na ta ẹmwata kevbe na na rẹn emwi nọ maan hin nẹi maan rre. Adeghẹ ẹi re erriọ, vbe I a gha ya gbaroghe okpe emwa ruẹ na hẹ?” 10 Ẹko keghi rhiẹnrhiẹn e Jehova ye emwi ne Solomọn nọ rẹn na. 11 Ọ keghi tama rẹn wẹẹ, “Vbe na na miẹn wẹẹ ẹwaẹn ne u gha ya gha gbaroghe emwa ẹse, ẹre u nọ rẹn, u ma nọ wẹẹ na guẹ tọ ra ne u fe ra ne eghian ruẹ wulo, 12 I gha rhie emwi ne u nọ rẹn nuẹn. I gha rhie ẹwaẹn kevbe irẹnmwi nuẹn sẹ emwa hia ni ke aro nuẹn kevbe ni gha vbe rre vbe iyeke ruẹ. 13 I gha vbe rhie emwi ne u ma nọ ba ruẹ re, u gha mwẹ ẹfe kevbe usi vbe ẹdagbọn ruẹ hia sẹ ọba ke ọba nọ rhirhi gha khin. 14 Adeghẹ u ghi vbe ya ẹmwẹ mwẹ ru emwi, u na rhie uhi kevbe ilele mwẹ mwẹ, zẹ vbene Devid ne erhaa ru ẹre, I ghi rhie utọmwẹ ba ruẹ re.”