1 Ọba

16 E Jehova keghi gie Jehu ne ovbi e Hanani uhunmwu, ọ na wẹẹ nọ ya tama Baasia wẹẹ: 2 “A ma te rẹn ruẹ, sokpan, I na ya ruẹ khian ọkaolotu ọghe Ivbi Izrẹl ne emwa mwẹ, u keghi ru vbene Jẹroboam ru, u ru orukhọ nẹ, u na vbe silo emwa mwẹ obọ la orukhọ. Orukhọ ọghe iran ya ohu mu mwẹ nẹ nian. 3 Rhunmwuda ọni, I gha rhie ruẹ fua, deba ẹgbẹe ruẹ, zẹ vbene I vbe ru e Jẹroboam. 4 Ovbi ẹgbẹe ruẹ nọ wu vbe ore ẹvbo, avbe ekita ghi rri ọre. Iran ni wulo ye oha, avbe ahianmwẹ ghi rri iran.” 5 Emwi ọvbehe hia fẹẹrẹ ne Baasia ghi ru, kevbe iwinna udinmwẹ nọ winnaẹn, a gbẹnnẹ ọnrẹn ye ebe okha ọghe avbe ọba Izrẹl. 6 E Baasia keghi wu, a na re ẹre ye Tiza, ovbi ẹre ighẹ Ela keghi rri ọba lelẹe. 7 E Jehu keghi do ta ẹmwẹ ne Jehova tae vbekpa e Baasia, rhunmwuda orukhọ ne Baasia ru ghee Jehova. Ẹi re orukhọ nọ ru ọkpa ẹre ọ ya ohu mu e Jehova, zẹ vbene Jẹroboam ka vbe ru ẹre, sokpan rhunmwuda wẹẹ, ọ gbe Nadab ne ovbi e Jẹroboam rua. 30 Ọ keghi ru orukhọ ghee Jehova sẹ iran ni karo nẹẹn hia fẹẹrẹ. 34 Vbe ẹghẹ ọre, e Hiẹl ne ovbi e Bẹtẹl keghi dọlegbe bọ e Jẹriko. Zẹvbe ne Jehova la unu e Jọsua ne ovbi e Nọn tae yotọ, Abiram ne ovbi e Hiẹl nọdiọn keghi wu vbọ gbe ẹyotọ ọghe Jẹriko, ovbi ẹre nọ kotọ ighẹ Segub keghi vbe wu vbọ ghi bọ onurho ẹre.