1 Ọba

10 Ọba okhuo ọghe Siẹba keghi họn otiti e Solomọn zẹvbe nọ ya dekaẹn eni e Jehova, ọ na gha rrie Jerusalẹm nọ mu ibo gie ẹre san. 2 Ọ keghi rre, ke irẹn kevbe eguọmwadia nibun, deba avbe ekẹtẹkẹtẹ na kun emwi ni winhin yan, kevbe igoru ọrhẹnrhẹn. Iran ghi vba egbe, okhuo nii keghi nọ rẹn ọta nibun ni lọghọ, nọ ghi yerre hia. 3 Irẹn keghi rhie ewanniẹn ye ehia; a ma miẹn emwi ọkpa nọ lọghọ gbe nọ ma gi ẹre rhie ewanniẹn yi. 4 Ẹmwẹ ẹwaẹn ẹnrẹn nọkhua keghi wa la okhuo nii aro, deba ẹguae nọ bọe, 5 evbare nọ mu yotọ, kevbe ewọe ni winna vbe ẹguae ẹre, owa esiesi nọ bọlọe ne emwa iwinna rẹn, iguemwi kevbe ukpọn esiesi ne eguọmwadia ẹre hẹ ye egbe, iran ni sa ayọn nẹẹn kevbe ese nọ zọ vbe Ọgua Osa. Ose avbe emwi na hia keghi gbe okhuo nii fi otọ. 6 Irẹn keghi tama e Solomọn wẹẹ, “Ẹmwẹ ne I họẹn vbe ẹvbo mwẹ vbekpa ruẹ kevbe ẹwaẹn ruẹ, ẹmwata nọ. 7 Sokpan, I ma yaeyi I te rre do tobọ mwẹ ya aro mwẹ miẹn ọnrẹn. Sokpan, I ma kue họn sẹ ukhiọnmwẹ ọnrẹn, ẹwaẹn kevbe ẹfe ruẹ sẹ vbene a tama mwẹ ẹsẹse. . 8 Oghọghọ nọ ne eguọmawdia ruẹ kevbe emwa hia ni lẹga ruẹ, ne iran na họn ẹmwẹ ẹwaẹn ne u ta vbe ẹghẹ hia! 9 Urhomwẹ nọ ne Jehova ne Osanobua ruẹ. Ọ wa rhie ma vbene ẹmwẹ ruẹ yẹẹ ọre hẹ, nọ na ma ruẹ ọba. Rhunmwuda ahoẹmwọmwa ọghe etẹbitẹ ne Jehova mwẹ ne Izrẹl, ọ na zẹ ruẹ ne u gha re ọba, ne u gha ya ẹmwata kevbe ai ghee ikpanro khaevbisẹ.” 10 Ẹre ọba okhuo ọghe Siẹba na viọ etalẹnt ọghe igoru 120 ne Solomọn, deba emwi ni winhin kevbe ikpẹrọnmwọ. Emwi ni winhin nọ viọ nẹẹn, ẹre ọ bun sẹ ehia nọ he ka miẹn. A ma vbe miẹn ọmwa ọvbehe nọ sẹtin mu e nọ bu sẹ ọna gie Solomọn. 11 Deba ena hia, ọgbagba okọ ọghe Hiram nọ ya viọ igoru ke Ọfii rre keghi vbe viọ avbe erhan ni mose nibun ẹsẹse kevbe ikpẹrọnmwọ rre ba ẹre. 12 E Solomọn keghi ya avbe erhan na ru emwi na viọ obọ yan vbe Ọgua Osa kevbe ẹguae. Ọ kevbe yae ru akpata kevbe ezikẹn ne iran ni kpee emaba. Ena kegha re erhan ni mose sẹ na he viọ la otọ Izrẹl; a ma ghi vbe dọlegbe miẹn egbọre ke ẹghẹ nii gha dee. 13 E Solomọn ne ọba keghi viọ emwi hia ne okhuo nii nọ rẹn nẹẹn, deba emwi na ya mu ọghọ ye ọmwa egbe nọ wa ya azemwiobọ viọ nẹẹn. Ẹre okhuo nii kevbe avbe eguọmwadia ẹre na werriegbe gha rrie Siẹba. 14 Ukpukpo ẹre Solomọn ne ọba ya gha miẹn etalẹnt ọghe igoru 666.