2 Samuẹl

7 Vbe ẹghẹ na nian, te obọ e Devid ghi wa gba otọ arriọba ẹre hia ẹsẹse, e Jehova keghi vbe rhie ẹre lẹre hin obọ avbe eghian rẹn hia rre. 2 Ẹre ọba na tama e Natan ne akhasẹ wẹẹ, “Ghee, mẹ rre owa na ya e sida bọ, sokpan, Ẹkpẹti Ile ọghe Osanobua rre uwu owa ukpọn.” 3 E Natan keghi wanniẹn wẹẹ, “Ru emwi nọ rhirhi gha rrọọ ruẹ ekhọe, rhunmwuda e Jehova rrọọ yaba ruẹ.” 4 Sokpan, vbe asọn nii, e Jehova keghi tama e Natan wẹẹ, 5 “Ya tama ọguọmwadia mwẹ ighẹ Devid wẹẹ, ‘Ẹi re uwẹ ẹre ọ khian bọ Ọgua Osa mẹ ne l gha ye. 6 Ke ẹghẹ ne I ya viọ Ivbi Izrẹl ke Igipt ladian gha dee, do sẹ banbanna, I ma he dia Ọgua Osa ya, ehe ne I he la hia owa ukpọn ẹre I dia. 7 Vbe ehe ne I lele Ivbi Izrẹl la hia fẹẹrẹ, I ma he vbe nọ avbe ọkaolotu ne I wẹẹ nọ gha gbaroghe iran wẹẹ, vbọzẹ ne iran ma na bọ Ọgua Osa ọghe sida mẹ.’” 8 Rhunmwuda ọni, ya tama e Devid ne ọguọmwadia mwẹ wẹẹ, “Mẹ ne Jehova ne Osa ọghe ivbiyokuo ẹre ọ tama rẹn wẹẹ, ‘I rhie ruẹ ke ehe ne u na su ohuan vbe uwu oha ladian, ne u do su Ivbi Izrẹl ne emwa mwẹ. 9 Te I wa mudia ke ruẹ la ehe ne u he la hia, I keghi vbe khọn avbe eghian ruẹ hia mu otọ vbene u ya nana sikẹ odaro. I gha ya ruẹ khian enọkhua, u ghi do gha kpọlọ vbe na ghee emwa ni he hin okhuan sẹ vbe agbọn na. 10 I gha hannọ ihe ọkpa ne Izrẹl ne emwa mwẹ, I ghi gbe iran ẹkun sotọ vbe evba, iran ghi gha rre evba, ai khian ghi vbe gha kpokpo iran. Ke ne iran ya sẹ otọ na gha dee, 11 emwa dan nibun ẹre ọ he gu iran gbinna, sokpan, ọna i khian ghi dọlegbe sunu. I yan rẹn ighẹ l gha degue ruẹ hin obọ eghian uwa hia rre, kevbe wẹẹ, u ghi vbe gha mwẹ uniẹn ruẹ. 12 Uwẹ gha ghi wu, a na vbe re ruẹ ba avbe erhaa odede nẹ, I gha ya ọkpa vbe uwu ivbuẹ ma ọba, I ghi vbe gi arriọba ẹre digiẹ. 13 Irẹn ẹre ọ khian bọ Ọgua Osa mẹ, I gha vbe ru ẹre ne uniẹn ọnrẹn gha rri ọba vbe ẹdẹdẹmwẹdẹ. 14 Mẹ ghi gha re erhae, irẹn ghi vbe gha re ovbi mwẹ. Ọ gha ba emwi ku ru, I ghi rri ọre oya zẹ vbene erha rri ovbi ẹre oya. 15 Sokpan I i ra fi iyeke gbe ẹre, vbene l fi iyeke gbe Sọl ne I rhie hin evba rre, ne uwẹ miẹn ehe na do rri ọba. 16 Uniẹn ruẹ kevbe arriọba ruẹ ghi gha rrọọ khian vbe ẹdẹdẹmwẹdẹ. Akhaevbisẹ arriọba ruẹ i ra fo ẹdẹ.’” 17 E Natan keghi ya tama e Devid, emwi hia ne Osanobua rhie ma rẹn.