2 Samuẹl

3 Iran keghi muẹn yan okotọ ọgbọn, iran keghi ya muẹn ke owa Abinadab nọ rre uhunmwu oke gha dee. Uzza kevbe Ahio ne ivbi Abinadab ẹre ọ ghaa dia nene okotọ. 4 Iran kegha ke owa Abinadab nọ rre uhunmwu oke mu Ẹkpẹti Ile ọghe Osanobua ọghe ẹmwata dee, Ahio kegha rre odaro. 5 E Devid kevbe Ivbi Izrẹl hia keghi wa gha ya ẹtin iran hia ku, iran na gha so ihuan ne iran ya rho e Jehova. Iran kegha kpe akpata, ẹgiọn, ema, ẹgogo kevbe ukusẹ. 6 Iran ghi sẹ otọ ne Nakọn na khuọn ọka, ẹmila keghi rrua owẹ, ẹre Uzza na niẹn obọ ya da Ẹkpẹti Ile nii yi. 7 Vbe ọwarọkpa nii, ohu Uzza keghi mu e Jehova, ọ keghi gbe ẹre rua rhunmwuda uyinmwẹ amiọmwafo ọghẹe, ẹre Uzza na wu ye evba, vbe ọkpẹn Ẹkpẹti Ile nii. 8 Ọni ẹre ọ zẹe na na tie evba nii Pẹrẹs Uzza do sẹ ẹdẹnẹrẹ na. Ohu keghi kakabọ mu e Devid rhunmwuda ne Jehova na ya ohu rri Uzza oya vberriọ. 9 Ohan e Jehova kegha mu e Devid, ọ keghi kha wẹẹ, “Ohan gha ye gu mwẹ mu Ẹkpẹti Ile gha khian nian?”