2 Samuẹl
4 Ugbẹnvbe Isbosiẹt ne ovbi e Sọl ghi họn wẹẹ iran gbe Abna rua vbe Hibrọn, ohan keghi muẹn, afianma na vbe gha fian Ivbi Izrẹl hia. 2 Isbosiẹt kegha mwẹ orhunmwu eva ni rre asẹ, iran ni ya gha fu emwi gie ẹre, iran na kegha re Baana kevbe Rekab ne ivbi e Rimọn ne ovbi ẹvbo na tie ẹre Biẹrọt vbe ẹwae Bẹnjamin. (Otọ e Bẹnjamin ẹre a ka e Biẹrọt ba. 3 Emwa ni ka yin ẹnrẹn lẹẹ kua gha rrie Giteim, evba ẹre iran ghi ye ke ẹghẹ nii gha dee.) 4 E Jonatan ne ovbi e Sọl kegha mwẹ ọmọ, na tie ẹre Mẹfibosiẹt. Ẹghẹ nọ na rre ọmọ ukpo isẹn, ẹre a na họn emwi nọ sunu vbe ẹgbẹe ọghe Sọl kevbe Jonatan vbe Jezrẹl. Ọmwa nọ ghaa koko ẹre keghi wa tọẹn mu, ọ na lẹẹ, sokpan ehe nọ na khirhi khian nii, ọ keghi fe ẹre obọ degbe otọ, ẹre ọ na khian uke. 5 Rekab kevbe Baana kegha rrie owa Isbosiẹt, iran na sẹ evba vbe ogiavan, vbe ẹghẹ nọ ya hẹwẹ vbe avan nii. 6 Iran keghi lae nene owa, iran na ba gha ru vbene a miẹn wẹẹ, te iran khan ọka. Iran keghi so emwi ye ọre efẹn; ẹre Rekab vbe Baana ne otiọnrẹn na lẹẹ. 7 Iran ghi sẹ uwowa nẹ, iran keghi la ughugha ne Isbosiẹt vbiẹ, iran na gbe ẹre rua. Iran keghi fian ẹre uhunmwu, iran na mu kpa, iran keghi ya asọn hia khian vbe Iya e Jọdan. 8 Iran na mu uhunmwu ẹnrẹn gie Devid ne Ọba vbe Hibrọn, iran tama rẹn wẹẹ, “Ghee uhunmwu Isbosiẹt ne ovbi e Sọl ne oghian ruẹ, ọ te gha hoo nọ gbe ruẹ rua. Vbe ẹdẹnẹrẹ na nian, e Jehova rria ikhi nuẹn nẹ umogun, vbe egbe Sọl kevbe uniẹn ọnrẹn.” 9 E Devid keghi wanniẹn iran wẹẹ, “I vẹn ihẹn vbe eni e Jehova no rrọọ nọ miẹn mwẹ fan vbe uwu ẹbe hia, 10 ọmwa na gie ẹre uhunmwu, nọ do tama mwẹ vbe Ziklag wẹẹ e Sọl wu, te gha roro ighẹ iyẹn esi ẹre irẹn do na. I keghi guae rhie, I na wẹẹ na gbe ẹre rua. Ọni ọre emwi ne I ya san rẹn ẹse ye iyẹn esi nọ do na! 11 Inu ghi nọ ne emwa dan, ni ya gbe ọmwa nọ ma rukhọ ye irri ovbe vbe owa ẹre. Te I khian rria ikhi ne okpia na ne uwa do ẹre izigha na, I gha wabọ uwa hin agbọn na rre.” 12 E Devid keghi wẹẹ ne emwa rẹn gbele Rekab kevbe Baana, iran keghi gbele iran rua, iran na giagia iran obọ giagia iran owẹ, iran na silo iran rrọọ ye ọkpẹn uhẹnhẹn amẹ ọghe Hibrọn. Iran keghi mu uhunmwu Isbosiẹt, iran na re ẹre ye idin Abna vbe Hibrọn.