2 Samuẹl

3 Igbinna na keghi wa kpẹẹ vbe otọ, ne iran ni rre ọghe igiowa ọghe Sọl, kevbe ni rre obọ ọghe Devid ghaa gu egbe gbinna. E Devid keghi wa gha ya owẹ mu otọ yọ, sokpan igiowa ọghe Sọl kegha yẹkẹ yọ. 2 Na kha na, e Devid keghi biẹlẹ emọ ikpia eso vbe Hibrọn. Ne ọdiọn kegha re Amnọn na tie iyẹe Ahinoam ne ovbi e Jezrẹl; 3 Nogieva kegha re Kiliab, na tie iyẹe Abigẹl nọ dẹgbẹe vbe obọ e Nabal ne ovbi Kamẹl; nogieha kegha re Absalọm, na tie iyẹe Maaka, nọ re ovbi e Talmai ne ọba Gẹsiọ; 4 Nogienẹ kegha re Adonaija, na tie iyẹe Hagit, nogisẹn kegha re Siefatia na tie iyẹe Abital; 5 nogiehan kegha re Itrim na tie iyẹe Egla, e Hibrọn ẹre a na biẹlẹ iran na hia. 6 Zẹvbe ne igbinna ne ivbiyokuo ọghe Sọl kevbe ọghe Devid gbinna ya gha sun vbe otọ, erriọ Abna ya gha mwẹ ẹtin yọ vbe uwu avbe emwa e Sọl. 7 Ọ ghi sẹ ẹdẹ ọkpa, Isbosiẹt ne ovbi e Sọl keghi ba Abna ifi ẹzọ wẹẹ, ọ gu e Rizpa ne ovbi Aia ne okhuo kevbe egbakhian ọghe Sọl ru emwi ọdọ vbe amwẹ. 8 Emwi na keghi wa ya ohu mu Abna ẹsẹse, ọ keghi kha wẹẹ, “Te uwẹ ghi roro ighẹ I gha hiẹ e Sọl ra? Wa ke otọ gha dee, te I wa mu ẹmwẹ e Sọl ne erhaa yan uhunmwu, kevbe etiọnrẹn, kevbe esiọre. Mẹ ẹre ọ vbe zẹe ne Devid ma na he khọn miẹn ruẹ otọ, ẹre u na ghi do gha gu mwẹ gui ẹzọ okhuo na! 9 E Jehova yan ma e Devid wẹẹ irẹn gha mu arriọba hin obọ e Sọl kevbe uniẹn ọnrẹn hia rre, irẹn ghi ma e Devid ọba ọghe Izrẹl kevbe ọghe Juda la ehe ne otọ nii sẹ, ehe nọ rhanmwẹ. 10 Banbanna nian, te Osanobua gha kinmwi mwẹ gbua, adeghẹ I ma ru ẹre nọ gele do sẹ vberriọ!” 11 Ohan Abna keghi mu Isbosiẹt sẹ vberriọ wẹẹ, ọ ma zẹdẹ guan hiehie. 12 Vbe ẹghẹ na kha na, e Devid kegha rre Hibrọn, ẹre Abna na gie emwa ya khama rẹn wẹẹ, “De ọmwa nọ khian rri ọba yan otọ na yi? Gu mwẹ ta ile, I gha ru iyobọ nuẹn, ne I viọ Ivbi Izrẹl hia ne iran do khian ọghuẹ.” 13 E Devid keghi wanniẹn wẹẹ, “Ọ wa maan! Emwi ọkpa rrọọ ne u gha ru ne I mieke na gu ruẹ ta ile, ọni nọ wẹẹ, u ghaa dee do miẹn mwẹ, u ghi rhie Mikal ne ovbi e Sọl nokhuo gu mwẹ.” 14 Ẹre Devid na gie na tama Isbosiẹt wẹẹ, “Rhie Mikal ne ọvbokhan mwẹ gu mwẹ, ukpikolo e Filistin iyisẹn (100) ẹre I hae yọ ya rhie ẹre rọnmwẹ.” 15 Ẹre Isbosiẹt na ya miẹn Paltiẹl ne ovbi e Lais ne ọdafẹn ọnrẹn re. 16 E Paltiẹl keghi wa viẹ lelẹe do sẹ ẹvbo na tie ẹre Bahurim. Ẹre Abna na tama rẹn wẹẹ: “Werriegbe ne u gha rrie owa.” Ọ keghi gele gha rrie. 17 E Devid keghi so ihuan na ya khiẹ Sọl kevbe Jonatan ne ovbi ẹre.