Gẹnẹsis
15 Ugbẹnvbe erha iran ghi wu nẹ, etiẹn e Josẹf keghi kha wẹẹ, “Adeghẹ te ohu ima ye mu e Josẹf vbo, ọ na wẹẹ, irẹn ra rria ikhi ye emwi dan ne ima ru ẹre re?” 16 Iran keghi rhunmwuda ọni gie uhunmwu gie Josẹf wẹẹ, vbene erha ima te wu, ọ wẹẹ ne ima tama ruẹ wẹẹ, 17 “Ma rinmwian an lahọ, mianmian emwi dan kevbe orukhọ ne avbe etuẹn ru ghee ruẹ. Banbanna nian, lahọ ya emwi dan ne ima ne eguọmwadia Osanobua erhaa ru bọ mwa.” Iran ghi ta ẹmwẹ na ma e Josẹf, ọ na gha viẹ. 18 Etiọnrẹn tobọ iran keghi rre, iran keghi vbokho egbe rriotọ nẹẹn, iran wẹẹ, “Banbanna nian, ghee ima vbe odaro ruẹ zẹvbe eviẹn ruẹn.” 19 Sokpan e Josẹf tama iran wẹẹ, “Wa ghẹ fian afianma, mẹ i ra sẹtin rhie egbe mwẹ ye ihe Osanobua. 20 Te uwa te si uma ne uwa ru mwẹ emwi dan, sokpan Osanobua keghi fiẹ werriẹ yae khian emwi esi, nọ miẹn ehe na sinmwi emwa nibun ye agbọn, emwa na miẹn wẹẹ, ọni ọ zẹe ne iran na rre agbọn ẹrẹna. 21 Banbanna nian, wa ghẹ fian afianma, I gha gbaroghe uwa kevbe ivbi uwa negiẹrẹ.” Ọ keghi ya ẹmwẹ itohan rhie igiọdu nọ mu iran ekhọe ne iran.