Gẹnẹsis

49 E Jekọb keghi tie avbe ivbi ẹre, ọ tama iran wẹẹ: ”‏Wa do si koko ye emwa ne I tama uwa emwi nọ gha sunu vbe egbe uwa vbe ẹghẹ nọ dee. 2 ”‏Wa si koko ne uwa danmwehọ ivbi e Jekọb. Wa danmwehọ Izrẹl ne erha uwa. 3 E Rubẹn, wẹ ọre ọmọ ọdiọn mwẹ, ọmọ ne I biẹ vbe I ye re ẹghele. Wẹ ọre ọmọ okaro ne I na ẹko ẹre. U te wa gha mwẹ uyi kevbe ẹtin ẹsẹsẹmwẹse. 4 Sokpan, ugbẹnvbe a miẹn wẹẹ, u yin pirhipirhi vbe na ghee amẹ ne ẹhoho bi yo bi rre, u i khian miẹn adogbannọ, rhunmwuda ne u na gu amwẹ erhaa ru emwi awua. Ebẹdi mwẹ ẹre u mu awua yi vbe ẹghẹ nii. Erriọ ẹre ọ wa gele ru ẹre! 5 “Ivbi iye ẹre Simiọn vbe Livai khin. Emwi igbinna ne iran mwẹ, uza ẹre iran yae zẹ. 6 I i khian sẹtin gu emwa vbene iran ye mu obọ. I ma vbe hoo na so eni mwẹ vbe eke na na so eni iran, rhunmwuda, iran keghi ya ohu do emwa izigha, erriọ ẹre iran vbe ya rhie ikuanegbe ne avbe ẹkhuia ẹmila, iran ghi we te iran ku. 7 Ihẹn nọ ne ohu nọ mu iran, rhunmwuda, ọghe dan nọ, ihẹn vbe nọ ne izohu ọghe iran, rhunmwuda, ọ wegbe gbe. I gha zagha iran gba otọ e Jekọb, I ghi duẹ iran lele otọ Izrẹl. 8 “Nọ ne uwẹ ne Juda, etuẹn gha tian ruẹ. U gha dobọ mu ẹho ọghe eghian ruẹ. Ivbi erhaa gha gbe uhunmwu ke otọ nuẹn. 9 Ovbi oduma ẹre Juda khin. U gha ghi rri emwi ne u gbe nẹ ovbi mwẹ, u ghi kpa. Ọ ghughẹ rre, ọ na vbe niẹn egbe rua vbe na ghee oduma. De ọmwa ne ohan gha gi ẹre kpokpo ẹre, ugbẹnvbe a miẹn wẹẹ, te ọ yevbe oduma? 10 Obọ e Juda ẹre ọkpọ ọba khian gha ye khian, akharha ẹre, ẹre ọkpọ ọdakha khian vbe gha ye, a te miẹn wẹẹ, e Shailo rre, ọni ọre ọmwa nii ne emwa hia khian gha họn ẹmwẹ na. 13 “Ọkpẹn okun ẹre Zẹbulọn khian yin, ọni ọre eghute na na si okọ dee, odẹ e Saidọn ẹre uwu ọghẹe khian la. 14 “Ekẹtẹkẹtẹ nọ wegbe ẹre Isaka khin, ọ lovbiẹ ye otọ, ke irẹn kevbe ẹkpo eva nọ mu. 15 Ọ gha bẹghe ẹre wẹẹ, eke nọ na hẹwẹ nii wa maan kevbe wẹẹ, otọ nii wa vbe mose. Ọ gha ghughẹ rre nọ ya izabọ ẹre mu ihẹ, ọ gha vbe kue na ya irẹn miẹn ẹsọn nọ wegbe, agharhemiẹn wẹẹ, ẹ i te rre ọre orhiọn. 17 Gi e Dan gha yevbe ẹyẹn nọ rre ọkpẹn odẹ, ọ ghi yevbe ẹyẹn nọ mwẹ obi nọ rre ọkpẹn uro odẹ, nọ sa ẹsin vbe ighighianwẹ, ne ọmwa nọ hin ẹnrẹn khian mieke na de gbe otọ vbe odẹ iyeke. 18 Eo Jehova, I gha mudia khẹ ẹghẹ ne u khian ya miẹn emwa fan. 19 “Nọ ne Gad, otu izigan gha rre do gu ẹre khọn, sokpan, irẹn ghi zẹ iran khu, ọ ghi vbe gu iran khọn. 20 “Te evbare ọghe Asha khian kpọ kua, ọ ghi gha kpemehe evbare nọ khẹke ọba. 21 “Ẹrhuẹ ne huẹnrẹn ẹre Naftalai khin. Ẹmwẹ nọ rhiẹnrhiẹn ẹre ọ ladian vbe unu ẹnrẹn. 22 “Abọ erhan nọ zọọ ladian vbe erhan nọ mọ, ẹre Josẹf khin, ọni ọre erhan nọ mọ, nọ rre ọkpẹn eke ne amẹ na lẹẹ ladian, nọ ya vẹlẹ abọ sẹ egbe ekẹn. 26 Afiangbe ọghe erhae gha sẹ afiangbe ọghe avbe oke ni rrọọ vbe ẹdẹdẹmwẹdẹ, ọ gha sẹ emwi ni maan hia na miẹn vbe avbe oke ni rrọọ vbe etẹbitẹ. Uhunmwu e Josẹf ẹre avbe afiangbe na khian gha ye khian, ọni ọre uhunmwu ọmwa nii na rhie ladian vbe uwu ẹbu etiọnrẹn. 27 “Te Bẹnjamin khian gha gbe eghian rẹn zanzan vbene ekita oha ru ẹre. Ọ gha ghi rri emwi nọ gbe vbe ẹghẹ owiẹ, ọ ghi ghae emwi nọ fu viọ vbe ẹghẹ ota.” 28 Ena ọre uniẹn iweva (12) ọghe Izrẹl, ọna ọre ẹmwẹ ne erha iran tama iran vbe ẹghẹ nọ na gha fiangbe iran. Afiangbe nọ khẹke dọmwadẹ ọghẹe ẹre ọ rhie ne iran.