Gẹnẹsis

2 Vbe iyeke ọni, ọ keghi biẹ ọmọ okpia ọvbehe, ọna ọre Ebẹl. Ebẹl keghi do gha re ọsuohuan, sokpan Keni kegha re ọwẹe. 3 Iyeke ọni, Ken keghi viọ emwiokọ eso rrẹ do ya zọ ese ne Jehova. 4 Iyeke ọni, Ebẹl keghi mu oteghe ohuan aranmwẹ, ne emwi irri ẹre ka gha biẹ rre, ya sẹ egbe ẹvbi ọghe iran. Ẹmwẹ Ebẹl kevbe ese nọ zọ re keghi yẹẹ e Jehova. 5 Sokpan ọ ma rhan obọ miẹn Ken kevbe ese nọ zọ re. Okuosu keghi rri e Ken, aro ẹre keghi khọrhiọn ruan vbe uhunmwu rhunmwuda ohu nọ ghaa muẹn. 6 E Jehova na ghi tama e Ken wẹẹ, “Vbọzẹ ne ohu na muẹn yi? Ne aro ruẹ na khọrhiọn vbe uhunmwu? 7 Adeghẹ u na fi werriẹ gha ru emwi esi, wẹ ma rẹn wẹẹ, I gha werriegbe rhan obọ miẹn ruẹ yi ra? Sokpan, adeghẹ u ma na fi werriẹ, ne u gha ru emwi esi, orukhọ lẹre khẹ ruẹ vbe iyeke ẹkhu, ọ hoo nọ de yan ruẹ; sokpan, obọ ruẹ gha ke ukhunmwu nẹ ra?”