Jọshua

4 Ivbi Izrẹl hia ghi fian Ẹzẹ e Jọdan rra nẹ, e Jehova na tama e Jọshua wẹẹ: 2 “Zẹ ikpia iweva (12) vbe uwu ẹbu Ivbi Izrẹl, ọkpọkpa vbe dọmwadẹ uniẹn, 3 u ghi tama iran wẹẹ: ‘Wa gha rrie eke ne avbe ohẹn mudia yi vbe adesẹneva ọghe Ẹzẹ e Jọdan, ne uwa viọ okuta iweva (12) vbe evba, wa ghi mwamwaẹn ye eke ne uwa khian vbiẹ ne ẹdẹ gbe.’”

4 Ẹre Jọshua na tie ikpia iweva (12) nii, nọ zẹ vbe dọmwadẹ uniẹn ọghe Izrẹl, 5 ọ na tama iran wẹẹ: “Wa gha rrie odaro Ẹkpẹti Ile ọghe Jehova ne Osanobua uwa, vbe adesẹneva ọghe Ẹzẹ e Jọdan, dọmwadẹ ọghẹe vbe uwu uwa ghi viọ okuta ọkpọkpa ye izabọ, dọmwadẹ okuta ghi mudia ye ihe dọmwadẹ uniẹn ọghe Izrẹl, 6 ọ ghi gha ye uwa ẹre rre vbekpa emwi ne Osanobua ru. Adeghẹ ivbi uwa* na ghi nọ uwa vbe akhuẹ wẹẹ, ‘Vbọzẹ ne uwa na viọ avbe okuta na ye emwa?’ 7 wa ghi tama iran wẹẹ: ‘Ne amẹ nọ lẹẹ vbe Ẹzẹ e Jọdan na dobọ yi rhunmwuda ẹkpẹti ile ọghe Jehova, ẹre ọ si ẹre. Avbe ohẹn ghi mu ẹkpẹti ile fian Ẹzẹ e Jọdan rra, ẹzẹ nii ma ghi gha lẹẹ. Te avbe okuta na khian gha ye Ivbi Izrẹl ẹre rre vbe ẹghẹ hia, vbekpa emwi nọ sunu na.’”*

8 Ivbi Izrẹl iweva (12) nii, keghi ru vbene Jọshua khare. Iran na viọ okuta iweva (12) vbe adesẹneva ọghe ẹzẹ e Jọdan, zẹvbe ne Jehova tama e Jọshua, nọ mieke na mudia ye ihe dọmwadẹ uniẹn ọghe Izrẹl. Iran keghi viọ avbe okuta nii gha rrie eke ne iran khian vbiẹ vbe asọn nii, iran na mwamwaẹn ye evba.

9 E Jọshua na vbe mwamwa okuta iweva (12) ye eke ne avbe ohẹn ni mu ẹkpẹti ile mudia yi, vbe adesẹneva ọghe Ẹzẹ e Jọdan, avbe okuta nii ye rre evba do fi ẹdẹnẹrẹ.

10 Avbe ohẹn ni mu Ẹkpẹti Ile na ye gha rre adesẹneva ọghe Ẹzẹ e Jọdan, a ghi te miẹn wẹẹ, Ivbi Izrẹl ru emwi hia ne Jehova we ne Jọshua tama iran ne iran ru. Iran keghi ru emwi hia vbene Mozis wa ya tama e Jọshua. Vbe uwu ẹghẹ na kha na, Ivbi Izrẹl na gha ya okhirhikhirhi fian Ẹzẹ e Jọdan rra. 11 Ivbi Izrẹl hia ghi wa fian ẹzẹ nii rra nẹ, avbe ohẹn ni mu Ẹkpẹti Ile ọghe Jehova na ghi fian ẹzẹ nii rra, sirra emwa hia. 12 Ivbi e Rubẹn, e Gad, kevbe obọ ọkpa vbe uniẹn e Manasẹ keghi mu egbe okuo, iran na fian Ẹzẹ e Jọdan rra, iran keghi ke odaro ne Ivbi Izrẹl, zẹvbe ne Mozis tama iran. 13 Ivbiyokuo ni re odẹ arriaisẹn iyeva (40,000) ni viọ emwi igbinna mwẹ, keghi fian Ẹzẹ e Jọdan rra vbe odaro e Jehova, gha rrie ato ọghe Jẹriko.

14 Vbe ẹdẹ ne ẹdẹrriọ, e Jehova keghi mu uyi ye Jọshua egbe sirra Ivbi Izrẹl hia, te iran wa gha rhie ọghọ nẹẹn* ya sẹ ẹdẹ nọ wu, vbene iran vbe ya gha rhie ọghọ ne Mozis.

15 Ẹre Jehova na ghi tama e Jọshua wẹẹ: 16 “Tama avbe ohẹn ni mu ẹkpẹti Uhi,* ne iran ladian vbe Ẹzẹ e Jọdan.” 17 Ẹre Jọshua na tama avbe ohẹn nii wẹẹ: “Wa ladian vbe Ẹzẹ e Jọdan.” 18 Avbe ohẹn ni mu ẹkpẹti ile ọghe Jehova keghi ke adesẹneva ọghe Ẹzẹ e Jọdan ladian, owẹ iran ghi wa dekaẹn otọ nọ kae, Ẹzẹ e Jọdan na werriegbe suẹn gha lẹẹ, ọ na ro gberra uwu, zẹvbe nọ ka ye.

19 Ikpẹdẹ nogie igbe ọghe uki nokaro, ẹre Ivbi Izrẹl fian Ẹzẹ e Jọdan rra, iran na bu agọ ye Gilgal, vbe odẹ ekẹn* ọghe eke ne otọ e Jẹriko lae.

20 E Jọshua keghi mwamwa okuta iweva (12), ne iran viọ re vbe Ẹzẹ e Jọdan ye Gilgal. 21 Ọ na ghi tama Ivbi Izrẹl wẹẹ: “Ivbi uwa gha nọ erha iran vbe akhuẹ wẹẹ: ‘Vbe a ya avbe okuta na kha?’ 22 wa ghi tama ivbi uwa wẹẹ: ‘Ivbi Izrẹl keghi ya owẹ fian Ẹzẹ e Jọdan rra vbe otọ nọ kae, 23 vbe ẹghẹ ne Jehova na sirra iran ka Ẹzẹ e Jọdan, ne iran mieke na sẹtin fiaẹn rra, zẹvbe ne Jehova vbe sirra ima ka Okun Nọ Baa, ne ima mieke na sẹtin fiaẹn rra. 24 Te ọ ru ọna, ne emwa hia ni rre uhunmwu otagbọn mieke na rẹn vbene Jehova mwẹ ẹtin hẹ, ne uwa mieke na vbe gha mu ohan e Jehova ne Osanobua uwa vbe ẹghẹ hia.’”