Jọshua
12 Ena ọre ọba ọghe avbe ẹvbo ne Ivbi Izrẹl khọnmiotọ yan, ne iran vbe miẹn ẹre otọ vbe odẹ ekẹn* ọghe Jọdan, ke Iya ọghe Anọn ya sẹ Oke Hẹmọn kevbe ikinkin ọghe Araba hia vbe odẹ ekẹn:* 2 E Saihọn ne ọba ọghe Ivbi Amọri nọ ghaa rre Hẹshbọn. Irẹn ẹre ọ ghaa khaevbisẹ yan Aroa, nọ ghaa rre okhiẹ ọghe Iya ọghe Anọn. Ke adesẹneva Iya ọghe Anọn, ya sẹ Iya ọghe Jebọk kevbe ikinkin nii hia, kegha re ọghẹe. A gha ghae otọ e Giliẹd ye ihe eva, irẹn ẹre ọ ghaa khaevbisẹ yan obọ ọkpa vbọ. Iya ọghe Jebọk ọre ehe ne otọ ọghe Ivbi Amọn lae. 3 Irẹn ẹre ọ vbe gha kha yan ikinkin ọghe Araba; ke Okun ọghe Kinẹrẹt* ya sẹ Okun ọghe Araba, nọ re Okun Umwẹ,* ya sẹ odẹ ekẹn* vbe ehe ne Bẹt-jẹshimọt ye, ke evba kpa gha rrie odẹ ahọ,* vbe ehe ne oke na haan vbe Pisga.
4 Iran vbe khọn e Ọg ne ọba ọghe Beshan miẹn ẹre otọ. Ọkpa vbe usun Ivbi e Rẹfeim ni ghi kẹ, ẹre Ọg ghaa khin. Ashtarọt kevbe Ẹdriai ẹre ọ ghaa ye, 5 irẹn ẹre ọ ghaa khaevbisẹ yan ikinkin ne Oke Hẹmọn ye, kevbe Salẹk, kevbe otọ e Beshan hia, ya sẹ eke ne uwu ọghe Ivbi e Gẹshọ kevbe Me-akat lae, kevbe obọ ọkpa vbe otọ e Giliẹd vbe a gha ghae ẹre ye ihe eva, ya sẹ eke ne otọ e Saihọn ne ọba ọghe Hẹshbọn lae.
6 E Mozis ne ọguọmwadia e Jehova kevbe Ivbi Izrẹl hia keghi khọnmiotọ yan iran, iyeke ọni, e Mozis ne ọguọmwadia e Jehova keghi mu otọ iran ne Ivbi e Rubẹn, Ivbi e Gad, kevbe obọ ọkpa vbe uniẹn e Manasẹ, nọ gha re ọghe iran.
7 Ena ọre ọba ọghe avbe ẹvbo ne Jọshua kevbe Ivbi Izrẹl khọnmiotọ yan vbe odẹ orrie* ọghe Jọdan, ke Bel-gad vbe Iya ọghe Lẹbanọn, ya sẹ Oke Helak, nọ rre ọkpẹn e Siyẹ. Iyeke ọni, e Jọshua keghi mu otọ iran ne uniẹn ọghe Izrẹl, zẹvbe nọ khẹke dọmwadẹ uniẹn. 8 Avbe otọ na kegha rre ikinkin ne oke ye, ikinkin ọghe Shẹfila, ikinkin ọghe Araba, avbe ehe ne oke na haan, uwu ato, ikinkin ọghe Nẹgẹb, ọni ọre otọ ọghe Ivbi e Hẹt, Ivbi Amọri, Ivbi e Kenan, Ivbi e Pẹriz, Ivbi e Hivi kevbe Ivbi e Jibọs. Ena ọre avbe ọba ne Ivbi Izrẹl khọnmiotọ yan:
9 Ọba e Jẹriko; ọba Eai, nọ ghaa rre ọkpẹn e Bẹtẹl;
10 ọba e Jerusalẹm; ọba e Hẹbrọn;
11 ọba e Jamọt; ọba e Lekish;
12 ọba Ẹglọn; ọba e Giza;
13 ọba e Dibiẹ; ọba e Gida;
14 ọba e Họma; ọba Erad;
15 ọba e Libna; ọba Adọlam;
16 ọba e Makida; ọba e Bẹtẹl;
17 ọba e Tapua; ọba e Hifa;
18 ọba Efẹk; ọba e Lesharọn;
19 ọba e Medọn; ọba e Hezọr;
20 ọba e Shimrọn-mirọn; ọba Akshaf;
21 ọba e Te-anak; ọba e Mẹgido;
22 ọba e Kidẹsh; ọba e Jọkni-am nọ rre Kamẹl;
23 ọba e Dọ, nọ rre ehe ne oke na haan vbe Dọ; ọba e Goim nọ rre Gilgal;
24 ọba e Tiẹza; avbe ọba na hia kegha re ọkpa yan ọgban (31).