Jọshua
1 E Mozis ne ọguọmwadia e Jehova ghi wu nẹ, e Jehova na tama e Jọshua* ne ovbi e Nọn, nọ ghaa ru iyobọ ne Mozis wẹẹ: 2 “E Mozis ne ọguọmwadia mwẹ wu nẹ, rhunmwuda ọni, mu egbe ne u fian e Jọdan rra, wẹ kevbe Ivbi Izrẹl hia, ne uwa gha rrie otọ ne I khian mu ne iran. 3 Ehe ke ehe ne uwa ya owẹ kaan, I gha muẹn ne uwa, zẹvbe ne I yan ma e Mozis. 4 Ke ato ya sẹ e Lẹbanọn, ẹre otọ ọghe uwa khian la. Ọ gha vbe ke Yufretis ne ẹzẹ nọkhua, ya sẹ Okun Nọkhua* nọ rre odẹ orrie.* Otọ ọghe Ivbi e Hẹt hia, ghi vbe gha re ọghe uwa. 5 Ọmwa rhọkpa i khian sẹtin khọnmiotọ yan ruẹ ẹdẹ. Vbene I mudia ne Mozis, erriọ ẹre I khian vbe mudia nuẹn. I i khian sẹ ruẹ rae, I i khian vbe yan gbuẹ. 6 Gha mwẹ udinmwẹ ne u vbe wegbe, rhunmwuda, wẹ ẹre ọ khian su iran na la otọ ne I tama avbe erha iran odede wẹẹ, I gha mu ne iran.
7 “Wẹ wa gha mwẹ udinmwẹ ne u vbe wegbe ẹsẹse, u ghi vbe gha lele Uhi hia ne Mozis ne ọguọmwadia mwẹ gbe nuẹn. Ghẹ rra avbe Uhi na, ne u mieke na gha ya ẹwaẹn ru emwi vbe ehe ne u rhirhi yo. 8 Gha guan kaẹn emwi nọ rre ebe Uhi na vbe ẹghẹ hia, u ghi gha tie ẹre, u ghi vbe gha muẹn roro* vbe asọn kevbe avan, ne u mieke na gha lele emwi hia na gbẹnnẹ ye uwu ẹre; ẹghẹ nii, emwi hia ne u ru ghi gha dinnodẹ, u ghi vbe gha ya ẹwaẹn ru emwi. 9 Mẹ ma ka tama ruẹ* ne u gha mwẹ udinmwẹ, kevbe ne u vbe wegbe ra? Ghẹ gi afianma fian ruẹ, ghẹ vbe gi ohan mu ruẹ, rhunmwuda, e Jehova ne Osanobua ruẹ gu ruẹ rrọọ, vbe ehe ke ehe ne u rhirhi yo.”
10 Ẹre Jọshua na ghi tama avbe ọkaolotu ọghe Izrẹl wẹẹ: 11 “Wa khian lele uwu agọ na, ne uwa gha tama emwa wẹẹ, ‘Wa si evbare koko, rhunmwuda, wa gha fian e Jọdan rra vbe ikpẹdẹ eha nọ dee, ne uwa ya yin otọ nii, ne Jehova ne Osanobua uwa wẹẹ irẹn khian mu ne uwa.’”
12 E Jọshua na tama Ivbi e Rubẹn, e Gad, kevbe obọ ọkpa vbe uniẹn e Manasẹ wẹẹ: 13 “Wa ghẹ mianmian Uhi ne Mozis ne ọguọmwadia e Jehova gbe ne uwa, nọ na wẹẹ, e Jehova ne Osa ọghe Izrẹl mu otọ na ne uwa nẹ, ọ gha vbe gi ẹkun sẹ uwa otọ. 14 Otọ ne Mozis mu ne uwa, nọ rre obọ vbe ediran vbe Jọdan ẹre amwẹ ọghe uwa, ivbi uwa kevbe emwirri ọghe uwa khian gha ye; sokpan, wa ne ivbiyokuo ni wegbe ghi mu egbe okuo, wa ghi fian e Jọdan rra, ne uwa ke odaro ne etiẹn uwa. Wa ghi gha ru iyobọ ne iran 15 a ghi te miẹn wẹẹ, e Jehova gi ẹkun sẹ etiẹn uwa otọ, zẹvbe nọ vbe gi ẹkun sẹ uwa otọ, ne iran vbe yin otọ nii ne Jehova ne Osanobua uwa khian mu ne iran. Iyeke ọni, wa ghi werriegbe gha rrie otọ na mu ne uwa, ne uwa ya yin ẹnrẹn, ọni ọre otọ ne Mozis ne ọguọmwadia e Jehova mu ne uwa, vbe odẹ ekẹn* ọghe Jọdan.”
16 Iran keghi wanniẹn e Jọshua wẹẹ: “Ma gha ru emwi hia ne u we ne ima ru, ma gha vbe yo ehe ke ehe ne u gie ima gha rrie. 17 Vbene ima ghaa họn ẹmwẹ ne Mozis, erriọ ima khian vbe gha họn ẹmwẹ nuẹn. Te Jehova ne Osanobua ruẹ gha mudia nuẹn, zẹvbe nọ mudia ne Mozis. 18 Ọmwaikọmwa nọ ma họn ẹmwẹ nuẹn, ra nọ ma ru vbene u khare, a ghi gbe ẹre rua. Sokpan, gha mwẹ udinmwẹ, ne u vbe wegbe.”