Eprel

Blong yumi kasem blesing from bodi mo blad blong Jisas, yumi mas soemaot se yumi bilif long ransom. (Efes. 1:7) Olgeta we Jisas i tokbaot olsem ol “narafala sipsip,” oli no kakae bred mo dring waen long taem blong Kakae Blong Masta we oli mekem wan taem evri yia. (Jon 10:16) Nating se i olsem, oli save kasem blesing from bodi mo blad blong Jisas Kraes. Hemia from we oli soemaot se oli bilif long ransom sakrefaes blong Jisas, mo gudfala samting we i kamaot from sakrefaes ya. (Jon 6:53) Be olgeta we oli kakae bred mo dring waen, oli soemaot se oli joen long niufala kontrak mo oli gat hop blong rul long Kingdom blong heven. Nomata se yumi stap long grup blong ol tabu Kristin o ol narafala sipsip, be yumi evriwan i mas soemaot bilif, blong yumi save kasem laef we i no save finis. w24.12 13 ¶14, 16

Long taem blong Kakae Blong Masta, Jisas i givim bred we i no gat is long ol aposol blong hem, mo i talem se hemia bodi blong hem. Biaen hem i pasem wan kap blong waen, mo i talem se hemia i minim “blad blong kontrak.” (Mak 14:​22-25; Luk 22:20; 1 Kor. 11:24) Niufala kontrak ya hem i mekem nomo wetem “haos blong Isrel [long saed blong spirit]” we bambae oli stap “long Kingdom blong God.” (Hib. 8:​6, 10; 9:15) Long Kakae Blong Masta, Jisas i talem ol tok ya i go long wan “smol grup blong ol sipsip.” Ol gudfala aposol blong Jisas we oli stap wetem hem long taem ya, olgeta nao oli ol fas man we oli joen long smol grup ya. Smol grup ya nomo bambae oli stap wetem Jisas long heven. w24.12 11 ¶9-10

Jisas i fesem plante problem. Ol fren blong hem oli lego hem, ol enemi oli arestem hem, tok nogud long hem, oli talem se hem i gilti, mo oli mekem hem i safa. Ol soldia oli lidim hem i go long ples we bambae oli kilim hem long hem, mo oli nilim hem long pos. Nating se Jisas i harem nogud tumas, be i gat wan Man we i harem nogud moa, hemia Jehova God. Jehova i gat paoa mo i naf blong stopem ol samting ya blong oli no mekem boe blong hem i safa. Be hem i no mekem olsem. ?From wanem? Hemia from we hem i gat lav. Ded blong Jisas i wan pruf se Jehova i lavem yu tumas. Hem i mekem plante samting, mo i stanap strong long plante samting we i mekem hem i harem nogud tumas, blong hem i save tekemaot yu long sin mo ded. (1 Jon 4:​9, 10) Yes, Jehova i wantem halpem yumi wanwan blong fren gud wetem hem, mo blong tekemaot sin fulwan long fiuja. w24.08 6 ¶13-14

Taem yumi tingbaot filing blong Jehova taem i luk Boe blong hem i safa, yumi kasemsave se hem i lavem yumi. Setan i talem se i no gat wan man blong God we i save holemstrong long hem, taem hem i kasem trabol. Taswe, blong pruvum se Setan i rong, Jehova i letem blong Jisas i safa bifo we i ded. (Job 2:​1-5) Jehova i luk taem ol man oli stap jikim Jisas, ol soldia oli wipim hem, mo nilim hem long pos. Biaen, Jehova i luk we Boe blong hem i safa gogo i ded. (Mat. 27:​28-31, 39) Jehova i naf blong stopem ol samting ya. (Mat. 27:​42, 43) Be sipos God i bin mekem olsem, bambae i neva gat ransom mo bambae yumi no gat hop. Taswe, Jehova i letem Boe blong hem i safa gogo kasem we i pulum laswan win blong hem. w25.01 22 ¶7

Hemia 16 Nisan blong yia 33 K.T., mo ol disaepol blong Jisas oli harem nogud mo oli fraet. Tu disaepol i aot long Jerusalem blong go long vilej ya Emeas. Wan strenja i kam wokbaot wetem tufala disaepol ya. Mo tufala i stat blong tokbaot ol nogud samting we oli hapen long Jisas. Nao strenja ya i tokbaot ol samting we bambae tufala i neva fogetem. “Hem i stat long Moses mo i gotru long Olgeta Profet,” mo i eksplenem from wanem Mesaea i mas safa mo ded. Taem trifala i kamtru long Emeas, tufala disaepol i luksave se strenja ya i Jisas we i laef bakegen. (Luk 24:​13-35) Long ol 40 dei bifo we Jisas i go antap long heven, hem i kamtru plante taem long ol disaepol blong hem. Long taem ya, Jisas i leftemap tingting blong ol disaepol we oli harem nogud mo oli fraet. Mo hemia i mekem oli glad, mo oli gat strong tingting blong prij mo tijim ol man long saed blong Kingdom. w24.10 12 ¶1-3

Taem ol yia oli stap pas, wan pikinini i stap gru sloslo blong i kam bigman, be blong kam wan bigman long spirit yumi mas traehad. Eksampol, ol brata mo sista long Korin oli harem gud nius, oli baptaes, oli kasem tabu spirit, mo oli lanem plante samting from ol tijing blong aposol Pol. (Wok 18:​8-11) Be sam yia afta we oli baptaes, plante long olgeta oli no bigman long spirit yet. (1 Kor. 3:2) Blong kam bigman long spirit, fastaem yumi mas wantem blong kam bigman long spirit. Olgeta we oli “no gat ekspiriens,” we oli wantem gohed blong stap olsem ol pikinini long saed blong spirit, bambae oli no traehad. (Prov. 1:22) Yumi no wantem kam olsem ol man we oli bigman finis, be oli gohed yet blong dipen long ol perens blong olgeta blong mekem desisen blong olgeta. Defren olgeta, yumi wantem gohed blong kam bigman long spirit. Sipos yu stap traehad yet blong kam bigman long spirit, i gud yu prea mo askem long Jehova blong i mekem se yu ‘wantem wok mo i givim paoa long yu blong mekem olgeta samting we hem i laekem.’—Fil. 2:13. w24.04 4 ¶9-10

Fasin we Jehova i folem blong jajem ol man i soemaot klia long yumi filing we hem i gat. (Esik. 33:11) Jehova i no kwik blong kilim wan man i ded blong olwe. Hem i gat bigfala sore mo hem i soemaot fasin ya taem hem i luk se i stret. ?Yumi save wanem long saed blong ol man we bambae oli no laef bakegen? Baebol i tokbaot sam eksampol nomo. Jisas i talem se Judas Iskariot bambae i no moa laef bakegen. (Mak 14:21; Jon 17:12) Judas i save se samting we hem i mekem i go agensem Jehova mo Jisas, be hem i gohed nomo. (Mak 3:29) Jisas i talem tu se sam lida blong skul we oli agensem hem bambae oli ded mo oli no moa save laef bakegen. (Mat. 23:33; Jon 19:11) Mo aposol Pol i givim woning se ol man blong apostasi we oli no wantem tanem tingting blong olgeta, bambae oli no laef bakegen.—Hib. 6:​4-8; 10:29. w24.05 4 ¶10-11

Taem yumi stap klosap long Jehova, Setan i no save spolem yumi blong olwe. (1 Jon 3:8) Mo long niufala wol, Jehova bambae i gohed blong protektem ol gudfala fren blong hem blong oli no ded, mo blong i no gat wan samting i spolem frensip blong olgeta wetem hem. (Rev. 21:4) I wan bigfala ona blong stap olsem wan gest long tent blong Jehova, mo blong fren gud wetem hem blong olwe. (Esik. 37:27) ?Be yumi mas mekem wanem sipos yumi wantem gohed blong stap olsem ol gest blong hem? Sipos wan man i singaot yu yu go long haos blong hem, i sua se bambae yu wantem mekem man ya i glad. Long sem fasin, yumi mas save samting we Jehova i wantem yumi blong mekem, blong yumi save gohed blong stap olsem ol gest blong hem. Sipos yumi lavem Jehova, bambae yumi wantem mekem evri samting we yumi naf blong mekem, “blong mekem hem i glad.” (Kol. 1:10) Oltaem yumi mas respektem hem. Mo fasin ya bambae i halpem yumi blong blokem ol fasin we i save mekem hem i harem nogud. Yes, oltaem yumi wantem ‘wokbaot wetem God we tingting blong yumi i stap daon.’—Maeka 6:8. w24.06 4 ¶8-9

Jehova i askem long Ebraham blong i sakrefaesem boe blong hem Aesak. I sua se hemia wan samting we i had tumas blong Ebraham i mekem. Nating se i olsem, hem i rere nomo blong obei long Jehova. Be taem hem i rere blong kilim boe blong hem, Jehova i stopem hem. Nating se i olsem, eksampol blong Ebraham i tijim yumi long wan impoten samting we Jehova bambae i mekem long fiuja. Jehova bambae i rere blong givim prapa Boe blong hem we hem i lavem tumas, olsem wan sakrefaes. Yes, Jehova i lavem ol man tumas. (Jen. 22:​1-18) Plante handred yia biaen, long Loa we God i givim long ol man Isrel, hem i talem long olgeta blong mekem ol sakrefaes blong tekemaot sin blong olgeta. (Lev. 4:​27-29; 17:11) Ol sakrefaes ya oli soemaot se bambae i gat wan sakrefaes we i gud moa, we bambae i tekemaot sin blong ol man fulwan. God i pulum ol profet blong eksplenem se pikinini ya we hem i promes blong sanem, hemia spesel Pikinini blong hem, bambae i safa mo oli kilim hem i ded blong i tekemaot ol man long sin mo ded. !Mo hemia i minim yu tu!—Aes. 53:​1-12. w24.08 4 ¶7-8

Taem yu mekem Baebol riding blong yu, meksua se yu tingbaot olsem wanem yu save folem long laef blong yu. Taem yu ridim wan vas, i gud blong askem se, ‘?Olsem wanem mi save folem save ya naoia o long fiuja?’ Eksampol, traem tingbaot se yu stap ridim 1 Tesalonaeka 5:​17, 18. Afta we yu ridim tufala vas ya, i gud yu stop mo yu tingbaot se hamas taem yu stap prea mo se prea blong yu i dip olsem wanem. Mo tu, i gud yu tingbaot ol samting we yu wantem talem tangkiu long Jehova from. Maet yu jusum tri samting we yu save talem tangkiu long Jehova from. Sipos yu tekem sam minit blong tingting gud long ol samting we yu ridim, hemia bambae i halpem yu blong kasemsave long ol samting we yu ridim, mo blong mekem samting we Tok blong God i talem. !Mo sipos yu gohed blong mekem olsem evri dei wetem ol narafala vas blong Baebol we yu ridim, hemia bambae i givhan bigwan long yu! Bambae yu kam wan man we i stap mekem samting we Tok blong God i talem. w24.09 4-5 ¶9-10

Jehova i wokem yumi wetem wan spesel fasin. I tru, yumi harem gud taem yumi kasem samting, be yumi glad moa taem yumi givim samting long narafala. Yumi harem gud taem yumi naf blong givhan long ol brata mo sista, mo yumi glad taem oli talem tangkiu long yumi from. Be nating sipos oli talem tangkiu o nogat, yumi save glad yet from yumi mekem samting we i stret. Yu neva mas fogetem se nomata wanem samting yu givim long narafala, “Jehova i gat rod blong givim plante moa samting long yu.” (2 Kron. 25:9) !Yumi no save givim plante moa samting i bitim Jehova! Mo sipos Jehova nao i pembak yumi from samting we yumi mekem, i sua se pei ya bambae i beswan. Taswe, i gud yumi gat strong tingting, blong yumi gohed blong folem fasin blong Papa blong yumi long heven, we i glad nomo blong givim samting. w24.09 31 ¶20-21

Jehova i gat sore mo i kaen. (Sam 103:13; Aes. 49:15) Hem i savegud yumi. Taem yumi harem nogud, hem tu i harem nogud. (Sek. 2:8) Hem i halpem yumi blong save hem mo kam fren blong hem. (Sam 25:14; Wok 17:27) Mo hem i gat tingting daon. “Hem i bendaon blong lukluk heven mo wol, i stap leftemap man we i no gat nem, we i stap sidaon long das.” (Sam 113:​6, 7) ?Yu no ting se ol fasin ya blong Jehova oli pulum yumi blong wantem givim glori long hem? Yumi givim glori long Jehova from yumi wantem se ol narafala oli save hem. Plante man oli no save trutok long saed blong Jehova. ?From wanem? From we Setan i stap blaenem tingting blong olgeta wetem ol giaman tok long saed blong Jehova. (2 Kor. 4:4) Setan i pulum olgeta blong oli ting se Jehova i stap panisim ol man, hem i no kea, mo se hem nao i stamba blong olgeta samting we i mekem ol man oli safa. !Be yumi save trutok long saed blong God! Taswe, yumi wantem halpem ol man blong oli savegud Jehova mo oli givim glori long hem.—Aes. 43:10. w25.01 3-4 ¶6-7

Jisas, we i Pikinini blong God, i stret gud olgeta mo i mekem plante merikel, be Setan i yusum sam man blong talem ol giaman tok long saed blong Jisas. Ol lida blong skul oli talem se paoa we Jisas i yusum blong ronemaot ol dimon, i kamaot long “rula blong ol dimon.” (Mak 3:22) Taem Jisas i pas long kot, ol lida blong skul oli talem se hem i tok nogud long God, mo oli pulum ol man blong talem se Jisas i mas ded. (Mat. 27:20) Biaen, taem ol disaepol blong Kraes oli stap talemaot gud nius, ol man blong agens “oli goraon long ol man . . . oli pulum olgeta” blong mekem i nogud long ol Kristin. (Wok 14:​2, 19) Folem Ol Wok 14:​2, Wajtaoa blong 1 Disemba 1998, i eksplenem se: “Ol man Jiu we oli agens, oli sakemaot mesej blong Pol mo Banabas, be long tingting blong olgeta, hemia i no naf yet. Taswe, oli mekem ol giaman toktok olbaot, blong traem pulum ol Hiten man blong agensem ol Kristin.” Tede tu, Setan i gohed yet blong “lidim olgeta man long wol oli go krangke.” w24.04 11 ¶15-16

Blong wan man i kasem laef we i no save finis, hemia i no dipen long taem we hem i ded. Jehova i wan gudfala jaj, mo oltaem ol desisen blong hem oli stret. (Sam 33:​4, 5) Taswe, yumi save sua gud se “Jaj blong olgeta man long wol” bambae i mekem samting we i stret. Mo tu, blong man i kasem laef we i no save finis, hemia i no dipen long ples we hem i laef long hem. Jehova bambae i neva jajem plante milian man we oli stap long ol ples we oli neva harem mesej blong Kingdom, se oli olsem ol “nani.” (Mat. 25:46) Jehova we i gudfala jaj blong olgeta man long wol, i kea moa long ol man ya i bitim yumi. Yumi no save samting we Jehova bambae i mekem long taem blong bigfala trabol. Maet sam long ol man ya bambae oli gat janis blong save Jehova, bilif long hem, mo sapotem hem, taem hem i mekem olgeta man long wol oli save nem blong hem.—Esik. 38:16. w24.05 12 ¶14-15

Ol man blong Jehova oli laekem tumas blong givgivhan long olgeta. (2 Kor. 8:4) Be samtaem, i nidim strong tingting blong mekem olsem. Eksampol, taem i gat wan wo i hapen, ol elda oli luksave se i nidim blong leftemap tingting blong ol brata mo sista, sapotem olgeta, mo givim samting we oli nidim long bodi mo spirit. From we ol elda oli lavem ol brata mo sista ya, oli putum laef blong olgeta long denja blong givim samting we oli nidim. Long ol taem olsem, i impoten we yumi joen gud tugeta. Folem gud ol advaes we yumi kasem long branj ofis. (Hib. 13:17) Oltaem ol elda oli mas lukluk bakegen long ol samting we ol brata mo sista oli mas mekem bifo long wan disasta, o long taem we disasta i stap hapen. (1 Kor. 14:​33, 40) Yumi mas gat strong tingting be yumi lukaotgud tu. (Prov. 22:3) Yumi mas yusum gud tingting blong yumi. Mo yumi no mekem samting olbaot. Dipen long Jehova. Hem i save halpem yu taem yu stap givhan long ol brata mo sista blong oli stap sef. w24.07 4 ¶8; 5 ¶11

King Deved i save Jehova mo i dipen long hem. Taem King Sol wetem ol narafala enemi oli stap ronem Deved blong kilim hem, Deved i prea long Jehova blong i givhan long hem. Afta we God i ansarem prea blong Deved mo i sevem hem, hem i talem se: “!Jehova i laef i stap!” (Sam 18:46) ?Deved i minim wanem? Wan buk i talem se Deved i wantem makem gud se Jehova hem i tru God mo “oltaem bambae hem i halpem ol man blong hem.” Yes, tru long ekspiriens blong Deved, hem i save se Jehova i laef i stap mo hemia i mekem hem i gat strong tingting blong i gohed blong wosipim Jehova mo presem hem. (Sam 18:​28, 29, 49) Taem yumi trastem se Jehova i God ya we i laef i stap, bambae yumi gat strong tingting blong wosipim hem. Bambae yumi gat paoa blong stanap strong long eni trabol mo yumi mekem bes blong yumi long wok blong hem. Mo tu, bambae yumi gat strong tingting blong stap klosap long Jehova. w24.06 20-21 ¶3-4

?Yumi lanem wanem long ol tok we aposol Pol i talem long ol Kristin long Tesalonaeka? Taem yumi harem wan samting we i no laenap wetem wanem we yumi lanem long Baebol, o taem i gat wan toktok i stap goraon, yumi mas gat fasin luksave. Long Soviet Yunion bifo, ol enemi blong yumi oli stap pasem wan leta i goraon we i luk olsem se i kam long wol hedkwota. Leta ya i leftemap tingting blong sam brata blong oli mekemap wan smol grup we i no joen wetem oganaesesen blong Jehova. Mo i luk olsem se leta ya i tru. Be ol gudfala brata ya oli no letem leta ya i trikim olgeta. Oli luksave se ol tok we i stap long leta ya i no laenap wetem samting we oli bin lanem. Tede, samtaem ol enemi blong trutok oli yusum ol teknoloji blong traem mekem tingting blong yumi i hafhaf, o yumi seraot. Taswe, i no gud yumi “hariap blong seksek,” be i gud yumi traem faenemaot se samting we yumi harem o yumi ridim i laenap wetem trutok we yumi lanem finis.—2 Tes. 2:2; 1 Jon 4:1. w24.07 12 ¶14-15

Desisen we i moa impoten i bitim eni narafala desisen we wan man i save mekem, hemia blong givim laef blong hem long Jehova, mo blong joen wetem bigfala famle blong Jehova blong wosipim Hem. Mo hemia nao samting we Jehova i wantem se evri man oli mekem. ?From wanem? From we hem i wantem se oli harem gud blong fren gud wetem hem mo kasem laef olwe. (Dut. 30:​19, 20; Gal. 6:​7, 8) Jehova i no fosem yumi blong wosipim hem, be hem i letem wanwan man i jusum se bambae hem i mekem wanem. ?Olsem wanem sipos wan Kristin we i baptaes finis i mekem wan bigfala sin? Sipos hem i no tanem tingting blong hem, kongregesen i mas putumaot hem. (1 Kor. 5:13) Nating se i olsem, Jehova i wantem tumas mo i hop se man ya we i mekem bigfala sin, i kambak long Hem. Hemia nao wan impoten risen from wanem Jehova i givim ransom, blong hem i save fogivim man we i tanem tingting blong hem. Jehova i wan God we i gat lav, mo hem i wantem tumas se olgeta we oli mekem bigfala sin, oli tanem tingting blong olgeta.—Sek. 1:3; Rom 2:4; Jem. 4:8. w24.08 14 ¶1-2

Long taem we aposol Jon i raetem nambatri leta blong hem, i gat samfala we oli stap spredem ol giaman tijing mo hemia i mekem se i gat bigfala problem insaed long kongregesen. Be ol narafala oli gohed blong “wokbaot long trutok.” Oli obei long Jehova mo oli gohed blong “wokbaot folem ol komanmen blong hem.” (2 Jon 4, 6) Ol gudfala Kristin ya oli mekem Jon i glad tumas, be antap moa oli mekem Jehova i glad. (Prov. 27:11) ?Yumi lanem wanem? Sipos yumi gohed blong holemstrong long Jehova, bambae yumi glad mo yumi mekem ol narafala tu oli glad. (1 Jon 5:3) Eksampol, yumi harem gud taem yumi save se yumi mekem Jehova i glad. Jehova i glad taem i luk we yumi stap longwe long ol nogud samting we wol ya i traem pulum yumi blong mekem, mo yumi obei long ol komanmen blong hem. Ol enjel long heven tu oli glad. (Luk 15:10) Yumi tu yumi glad taem yumi luk we ol brata mo sista oli holemstrong. (2 Tes. 1:4) Mo taem wol ya blong Setan i lus, bambae yumi glad tumas se yumi stap holemstrong long Jehova. w24.11 12 ¶17-18

?Bambae yu tekem hamas taem blong lukluk fasin blong wan sista bifo we yu talemaot se yu laekem hem? Sipos yu kwik tumas blong talemaot ol filing blong yu, bambae hem i ting se yu no tingting gud bifo we yu mekem wan desisen. (Prov. 29:20) Be sipos sista ya i luksave se yu laekem hem, mo yu tekem longtaem tumas blong talem long hem, maet hem i save gat tingting ya se yu no save mekem ol desisen. (Pri. 11:4) Tingbaot se taem yu talemaot filing blong yu long sista ya, hemia i no min se bambae yu mared long hem. Be yu mas sua se yu yu rere blong mared, mo se maet sista ya i save kam wan gudfala waef blong yu. ?Olsem wanem sipos yu luksave se wan brata o sista i laekem yu? Sipos yu no gat sem filing long hem, yu mas soemaot klia long ol aksen blong yu. I nogud yu givim rong tingting long hem se yu tu yu laekem hem, be i no tru.—Efes. 4:25. w24.05 22-23 ¶9-10

Ol tabu Kristin nomo we oli holemstrong, Jisas bambae i “tekem” olgeta i go insaed long Kingdom blong God long heven. Eni tabu Kristin we i no gohed blong wekap gud long saed blong spirit, bambae hem i no stap wetem olgeta we God i “jusumaot olgeta.” (Mat. 24:31) Olgeta man blong God, nomata wanem hop we oli gat, oli mas luk ol tok ya blong Jisas olsem wan woning blong oli gohed blong wekap gud mo gohed blong holemstrong. Yumi save gud Jehova taswe yumi trastem ol jajmen blong hem. Mo yumi no wari sipos Jehova i jes jusumaot sam moa tabu Kristin long ol yia we i pas. Hemia i mekem yumi tingbaot samting we Jisas i talem long pijatok blong hem we i tokbaot ol man we oli kam wok long plantesen blong grep long namba 11 aoa. (Mat. 20:​1-16) Olgeta we oli invaetem olgeta blong kam wok long plantesen blong grep long en blong dei, oli kasem sem pei nomo olsem olgeta we oli stat wok long eli moning finis. Long sem fasin, nomata wetaem Jehova i jusumaot ol tabu Kristin, be bambae olgeta evriwan oli kasem pei blong olgeta long heven, sipos oli gohed blong holemstrong. w24.09 24 ¶15-17

Jisas i soemaot wan gudfala eksampol long fasin blong stanap strong taem ol narafala oli spolem hem. Traem tingbaot olsem wanem ol famle mo ol narafala man oli spolem hem. Ol famle blong hem we oli no bilif, oli talem se hem i krangke, ol lida blong skul oli talem se hem i stap wok wetem ol dimon, mo ol soldia blong Rom oli jikim hem, oli faetem hem, mo biaen oli kilim hem i ded. (Mak 3:​21, 22; 14:55; 15:​16-20, 35-37) Nating se i olsem, Jisas i stanap strong we i no mekem sin nating. ?Yumi lanem wanem long eksampol blong hem? (1 Pita 2:​21-23) Jisas i soemaot samting we yumi mas mekem taem ol narafala oli spolem yumi. Hem i save stret taem blong stap kwaet, mo stret taem blong toktok. (Mat. 26:​62-64) Hem i stap kwaet nomo taem ol man ol talem ol giaman tok long saed long hem. (Mat. 11:19) Mo taem hem i toktok, hem i no tok nogud long olgeta, o talem se bambae hem i mekem wan nogud samting blong givimbak long olgeta. w24.11 4-5 ¶9-10

Traem tingbaot se yu givim wan spesel presen long wan man we yu lavem hem, presen ya i naes mo hem i save yusum. !Bambae yu harem nogud sipos yu luk se hem i putum presen ya long wan storum mo hem i no moa tingbaot! Be i sua se bambae yu glad sipos hem i yusum presen ya mo i talem tangkiu long yu from. ?Yumi lanem wanem? Jehova i givim Boe blong hem blong i ded from yumi. I sua se Jehova i glad tumas taem hem i luk we yumi soemaot se yumi glad long nambawan presen ya, mo from lav we i pusum hem blong givim ransom. (Jon 3:16; Rom 5:​7, 8) Be taem ol yia oli pas, maet yumi stat blong ting nating long nambawan presen ya ransom. Hemia i olsem we yumi putum presen ya we God i givim, long wan storum mo yumi no moa tingbaot. Blong no letem samting ya i hapen, oltaem yumi mas tingbaot mo glad from samting we God mo Kraes i mekem blong yumi. w25.01 26 ¶1-2

Wan brata we i naf blong mekem wok blong elda, hem i no mas wan man we i jes kam disaepol. Sipos yu baptaes i no longtaem i pas, yu nidim taem blong yu save kam bigman long Kristin fasin. Bifo we yu kam wan elda, yu mas soemaot se yu gat tingting daon olsem Jisas, mo yu glad nomo blong wet long Jehova blong i givim wok long yu. (Mat. 20:23; Fil. 2:​5-8) Yu save pruvum se yu holemstrong long Jehova taem yu fasgud long hem mo long ol rul blong hem, mo yu folem gud ol daereksen we i kam long oganaesesen blong Jehova. Baebol i talem klia se ol ovasia oli mas naf blong tijim ol narafala. ?Hemia i min se yu mas wan nambawan man blong givim ol tok? Nogat. I no evri elda we oli gat gudhan blong mekem ol tok. Be oli yusum gud Baebol blong tijim ol man mo leftemap tingting blong ol brata sista. w24.11 23-24 ¶14-15

Sipos yu ridim wan samting long Baebol we yu no kasemsave long hem, i gud yu mekem risej. Mo long fuldei, yu save tingting dip long samting we yu stadi long hem mo samting we yu lanem long saed blong Jehova, Boe blong hem, mo lav we tufala i gat long yu. (Sam 119:97) Yu no mas harem nogud sipos yu no faenem wan niufala save taem yu ridim Baebol o mekem risej. Yu mas tingbaot se yu yu olsem wan man we i stap traehad blong faenem gol. Plante taem, wan man olsem i mas spenem plante aoa o dei bifo we hem i faenem wan smol pis gol. Be hem i no givap, from we evri smosmol pis blong gol we hem i faenem, oli sas long ae blong hem. Be samting we i sas moa i bitim gol, hemia ol niufala samting we yumi lanem long Baebol. (Prov. 8:10) Taswe i gud yu gat longfala tingting mo yu gohed long program blong yu blong ridim Baebol.—Sam 1:2. w25.01 25 ¶14-15

Jehova i wantem se yumi rere blong fogivim olgeta we oli mekem yumi harem nogud. (Sam 86:5; Luk 17:4; Efes. 4:32) Yumi save harem nogud tumas from samting we narafala i talem o mekem long yumi, speseli sipos hem i wan gudfala fren blong yumi o wan memba blong famle. (Sam 55:​12-14) Samtaem, filing blong harem nogud i olsem we wan man i sperem yumi long naef. (Prov. 12:18) Maet yumi traem blong no tingbaot o ting nating long filing ya blong harem nogud. Be hemia i olsem we yumi no karemaot naef we oli sperem yumi long hem. Long sem fasin, yumi no mas ting se filing ya i save kam gud sipos yumi fogetem nomo. Taem wan man i mekem yumi harem nogud, faswan samting we yumi mekem, maet yumi kam kros. Baebol i soemaot se samtaem i nomol blong yumi kros. Be hem i wonem yumi se yumi no mas holemtaet kros. (Sam 4:4; Efes. 4:26) ?From wanem? From we taem man i kros hem i no save mekem wan gudfala samting. (Jem. 1:20) Tingbaot se kros hem i wan filing we i kamaot nomo olsem, be yu nomo yu mas jusum blong holemtaet kros. w25.02 15 ¶4-6

Long wan parabol, Jisas i soemaot se i krangke nomo we man i stap hivimap plante mane, be “long fes blong God hem i no rij nating.” (Luk 12:​16-21) I no gat wan man i save samting we bambae i hapen tumoro. (Prov. 23:​4, 5; Jem. 4:​13-15) Mo tu, Jisas i talem se olgeta we oli wantem kam ol disaepol blong hem, oli mas rere blong “lego” ol samting we oli gat. (Luk 14:​33, fut.) Hemia nao samting we i hapen long ol Kristin long Judia. Taem oli lusum ol samting we oli gat, oli glad nomo. (Hib. 10:34) Tede tu, plante brata mo sista oli lusum ol samting we oli gat from we oli no wantem sapotem wan politik pati blong wol ya, be oli glad nomo. (Rev. 13:​16, 17) ?From wanem? Hemia from we oli trastem fulwan promes blong Jehova se: “Bambae mi mi neva lego yu, mo bambae mi neva livim yu yu stap yu wan.” (Hib. 13:5) Yumi mekem bes blong yumi blong putumgud sam mane i stap, we i save givhan long yumi long fiuja. Be sipos wan trabol i hapen we yumi no tingbaot, yumi trastem se Jehova bambae i givhan long yumi. w25.03 29-30 ¶13-14

Blong kam bigman long spirit, yumi nidim help blong ol narafala. Jehova i givim ol man blong lukaot long sipsip mo ol tija long kongregesen we oli rere blong halpem yumi, blong yumi ‘no moa stap olsem ol pikinini be yumi kam olsem Kraes we i bigman finis.’ (Efes. 4:​11-13) Mo tu, Jehova i givim tabu spirit blong halpem yumi blong gat “tingting blong Kraes.” (1 Kor. 2:​14-16) Antap long hemia, God i givim ol fo Gospel long Baebol we oli soemaot klia ol tingting, toktok, mo fasin blong Jisas taem hem i stap prij long wol. Sipos yumi traehad blong gat sem tingting mo fasin olsem Jisas, bambae yumi naf blong kam bigman long spirit. Be blong kam bigman long spirit, yumi mas “livim . . . ol stamba tijing we oli tokbaot Kraes,” hemia ol faswan tijing we yumi lanem long saed blong Kraes. w24.04 4-5 ¶11-12

Evri dei yumi nidim blong mekem ol desisen. Sam long ol desisen ya oli isi olsem, wanem blong kakae long brekfas o wanem taem blong go slip. Be i gat sam narafala desisen we oli had moa. Maet ol desisen ya oli save gat paoa long helt blong yumi, oli save mekem yumi mo famle blong yumi i glad o nogat, o oli save gat paoa long wosip blong yumi. Yumi wantem se ol desisen blong yumi oli mekem yumi mo ol famle blong yumi i harem gud. Antap long hemia, yumi hop se ol desisen blong yumi bambae oli mekem Jehova i glad. (Rom 12:​1, 2) Wan impoten samting we i save halpem yu blong mekem wan gudfala desisen, hemia blong faenemaot moa save fastaem. ?From wanem hemia i impoten? Traem tingbaot wan man we i go luk dokta from we hem i kasem wan bigfala sik. ?Yu ting se bambae dokta ya i kwik blong givim meresin long sikman ya, we hem i no tekem taem blong jekem hem fastaem o askem ol kwestin long hem? I sua se nogat. Yu tu, bambae yu mekem ol gudfala desisen sipos yu faenemaot moa save fastaem long saed blong samting we yu mas mekem desisen long hem. w25.01 14 ¶1-3

?Yumi save wanem long saed blong bigfala sore blong Jehova? ?Olsem wanem hem i soemaot se hem “i no wantem se wan man i ded”? (2 Pita 3:9) Traem tingbaot samfala we oli mekem bigfala sin. Deved i mekem adaltri, mo i kilim man i ded. Be hem i tanem tingting blong hem. Taswe, Jehova i sore long hem mo i fogivim hem. (2 Saml. 12:​1-12) King Manase tu i mekem plante nogud samting long laef blong hem. Be Jehova i sore long hem, mo i fogivim hem from we hem i tanem tingting blong hem. (2 Kron. 33:​9-16) Ol eksampol ya oli soemaot se, Jehova i save sore long man taem i luk se i gat gudfala risen blong mekem olsem. Bambae hem i mekem ol man olsem oli laef bakegen, from we oli luksave se oli bin mekem sam bigfala sin mo oli tanem tingting blong olgeta. w24.05 4 ¶12