Zozie

13 Siɛn’n, Zozie w’a yo oke.+ Ɔ maan Zoova seli i kɛ: “W’a yo oke. Sanngɛ mɛn ng’ɔ fata kɛ a fa be mɔ be te ka’n, be sɔnnin. 2 Mɛn nga be te ka’n be yɛ:+ Filistifuɛ mun nin Gesurifuɛ’m+ be mɛn’n kwlaa, 3 (ɔ fɛ i Nili’n i sama* m’ɔ o Ezipti i wia afiliɛ lɔ’n* su lele ju Ekrɔn i awɛ m’ɔ o nglo lɔ lika’n nun’n su. Laa’n lika sɔ’n ti Kanaanfuɛ’m be liɛ.)+ i wie ekun yɛle Filistifuɛ’m be siefuɛ nnun mun+ be mɛn’n: Gaza, Asdɔdu,+ Askalɔn,+ Gati,+ Ekrɔn,+ ɔ nin Avimunfuɛ’m+ be mɛn’n 4 m’ɔ o ja ngua lɔ’n, Kanaanfuɛ’m be mɛn’n i kwlaa, ɔ fɛ i Meara m’ɔ ti Sidɔnfuɛ’m+ be liɛ’n lele fa ju Afɛki, Amɔɔfuɛ’m be awɛ’n i wun lɔ, 5 Gebalifuɛ’m+ be mɛn’n ɔ nin Liban’n i bue ng’ɔ o wia afiliɛ lɔ’n i kwlaa, ɔ fɛ i Baali-Gadi m’ɔ o Ɛrmɔn Oka’n i bo lɛ’n lele fa ju Lebo-Amati,*+ 6 okaoka lika m’ɔ fɛ i Liban+ lele ju Misrefɔtu-Maimun’n,+ ɔ nin Sidɔnfuɛ’m+ be mɛn’n. Ń fúan be* Izraɛlifuɛ’m be ɲrun.+ Like ng’ɔ fata kɛ a yo’n, yɛle kɛ fa lika sɔ’n fa man Izraɛlifuɛ mun naan ɔ kaci be aja like, kɛ nga n kan kleli wɔ’n sa.+ 7 Ɔ fata kɛ a cɛcɛ mɛn sɔ’n nun man akpasua ngwlan mun nin Manase akpasua’n i bue kun nunfuɛ mun naan ɔ yo be aja like.”+

8 Ribɛninfuɛ mun, nin Gadifuɛ mun, nin Manase akpasua’n i bue kun nunfuɛ’m be fali be aja like liɛ nga Moizi mannin be Zurdɛn’n i wia afiliɛ lɔ’n, kɛ nga Zoova i sufuɛ Moizi fa mannin be’n sa:+ 9 Ɔ fɛ i Aroɛɛ+ m’ɔ o Aanɔn Kongo’n+ i nuan su lɔ’n, ɔ nin klɔ ng’ɔ o kongo’n i afiɛn’n, ɔ nin Medeba lika kpɛtɛkplɛɛ’n nun lele fa ju Dibɔn, 10 ɔ nin Famiɛn Siɔn m’ɔ ti Amɔɔfuɛ’m be famiɛn’n, m’ɔ sieli Ɛsbɔn lele fa juli Amɔɔfuɛ’m be awɛ’n su lɔ’n i klɔ’m be kwlaa,+ 11 ɔ nin Galaadi, nin Gesurifuɛ mun, nin Maakatifuɛ’m+ be mɛn’n, ɔ nin Ɛrmɔn Oka’n i kwlaa, nin Basan+ mɛn’n i kwlaa lele fa ju Saleka,+ 12 ɔ nin Ɔgu m’ɔ o Basan’n, m’ɔ sieli Astarɔti nin Edrei’n i famiɛn diwlɛ’n i kwlaa. (Ɔ ti Refafuɛ’m be kasiɛn’m+ be nun kun.) Moizi kwlali be, yɛ ɔ fuannin be.*+ 13 Sanngɛ Izraɛlifuɛ’m b’a fuanman*+ Gesurifuɛ mun nin Maakatifuɛ mun. Afin lele nin andɛ’n, Gesurifuɛ mun nin Maakatifuɛ’m be tran Izraɛlifuɛ’m be afiɛn.

14 Saan Levifuɛ’m be akpasua’n i ngunmin yɛ w’a mɛnmɛn i aja like’n wie-ɔ.+ Tɛ nga be yrɛ i sin’n su be man Zoova m’ɔ ti Izraɛli Ɲanmiɛn’n yɛ ɔ ti be aja like liɛ’n niɔn,+ kɛ ng’ɔ kan kleli be’n sa.+

15 I sin’n, Moizi mannin Ribɛninfuɛ’m be akpasua’n i aja like liɛ, awlobo kun nin i liɛ. 16 Be lika liɛ’n yɛle Aroɛɛ m’ɔ o Aanɔn Kongo’n i nuan su lɔ’n, ɔ nin klɔ ng’ɔ o kongo’n i afiɛn’n, ɔ nin Medeba lika kpɛtɛkplɛɛ’n i kwlaa, 17 ɔ nin Ɛsbɔn nin i klɔ nga be o lika kpɛtɛkplɛɛ’n nun lɔ’n be kwlaa:+ Dibɔn, Bamɔti-Baali, Bɛti-Baali-Meɔn,+ 18 Zaazi,+ Kedemɔti,+ Mefaati,+ 19 Kiriataimun, Sibma,+ ɔ nin Zerɛti-Saa m’ɔ o oka ng’ɔ o kongo’n i wun lɛ’n su’n, 20 Bɛti-Peɔɔ, Pisga oka’n i bo lɔ lika’n,+ Bɛti-Zesimɔti,+ 21 klɔ’m be kwlaa nga be o lika kpɛtɛkplɛɛ’n nun lɔ’n, ɔ nin Famiɛn Siɔn m’ɔ ti Amɔɔfuɛ’m be famiɛn’n, m’ɔ sieli Ɛsbɔn’n,+ i famiɛn diwlɛ’n i kwlaa. Moizi kwlali famiɛn sɔ’n,+ ɔ nin Evi, nin Rekɛmun, nin Zii, nin Ur, yɛ Reba+ mɔ be ti Madianfuɛ’m be su kpɛn’n. Be tran mɛn’n nun, yɛ Siɔn yɛ ɔ sie be-ɔ. 22 Balaamun+ m’ɔ ti Beɔɔ i wa’n, m’ɔ ti wunnzue yifuɛ’n,+ ɔ o be nga Izraɛlifuɛ’m be fali tokofi kunnin be’n be nun wie. 23 Ribɛninfuɛ’m be lika’n i awɛ’n yɛle Zurdɛn’n. Aja like nga be fa mannin Ribɛninfuɛ mun’n, yɛ ɔ o lɛ-ɔ. Yɛ be cɛcɛli nun mannin be awlobo mun. Klɔ dandan nin klɔ kanngan nga be mantan be mɔ be fa mannin be’n, be yɛ be o lɛ-ɔ.

24 I sin’n, Moizi mannin Gadi akpasua’n i aja like liɛ, awlobo kun nin i liɛ. 25 Be lika’n wie yɛle Zazɛɛ,+ nin Galaadi klɔ’m be kwlaa, ɔ nin Amɔnfuɛ’m+ be mɛn’n i bue lele fa ju Aroɛɛ m’ɔ o Raba+ i ɲrun lɛ’n. 26 Kpɛkun ɔ fɛ i Ɛsbɔn+ fa ju Ramati-Mizpe nin Betonimun, yɛ ɔ fɛ i Maanaimun+ fa ju Debii i awɛ’n su lɔ. 27 Ɔ nin kongo’n nun lɔ klɔ mun. Be yɛle Bɛti-Aran, nin Bɛti-Nimra,+ nin Sukɔtu,+ nin Zafɔn’n, ɔ nin Famiɛn Siɔn m’ɔ ti Ɛsbɔn+ famiɛn’n i famiɛn diwlɛ onga’n. Be awɛ’n yɛle Zurdɛn’n i wia afiliɛ lɔ lika’n, ɔ kɔ lele ju Kinerɛti Jenvie’n*+ i tiwa ng’ɔ o ja ngua lɔ’n su. 28 Gadifuɛ’m be aja like liɛ’n yɛ ɔ o lɛ-ɔ. Be cɛcɛli nun mannin be awlobo mun. Klɔ dandan nin klɔ kanngan nga be mantan be mɔ be fa mannin be’n, be yɛ be o lɛ-ɔ.

29 I sin’n, Moizi mannin Manase akpasua’n i bue kun nunfuɛ mun be aja like liɛ’n, awlobo kun nin i liɛ.+ 30 Yɛ be lika’n fɛ i Maanaimun,+ ɔ nin Basan mɛn’n kwlaa, yɛle kɛ Famiɛn Ɔgu m’ɔ ti Basan famiɛn’n i famiɛn diwlɛ’n i kwlaa, ɔ nin Zairi+ klɔ mɔ be ti tannin sua ngunmin mɔ be o Basan lɔ’n. Klɔ’m be ti ablesiɛn (60). 31 Yɛ Galaadi i bue nin Astarɔti nin Edrei,+ ɔ nin Ɔgu i famiɛn diwlɛ’n nun klɔ nga be o Basan lɔ’n, be yoli Makii m’ɔ ti Manase i wa’n i mma’m be liɛ, be yoli Makii i mma’m+ be bue kun liɛ, awlobo kun nin i liɛ.

32 Aja like nga Moizi fa mannin be Moabu aawlɛ flɛnnɛn’n nun lɔ’n yɛ ɔ o lɛ-ɔ. Ɔ o Zurdɛn’n i bue kun’n su lɔ, Zeriko i wia afiliɛ lɔ.+

33 Sanngɛ Levifuɛ’m be akpasua’n nunfuɛ’m be liɛ’n, Moizi w’a manman be aja like’n wie.+ Zoova m’ɔ ti Izraɛli Ɲanmiɛn’n yɛ ɔ ti be aja like liɛ’n niɔn, kɛ ng’ɔ kan kleli be’n sa.+