Zeremin
28 Afuɛ kunngba sɔ’n nun’n, yɛle kɛ, kɛ Sedesiasi+ m’ɔ ti Zida famiɛn’n ɔ boli i famiɛn dilɛ’n i bo’n, i afuɛ nnan su’n i anglo nnun su’n, Azuu i wa Anania m’ɔ ti Ɲanmiɛn nuan ijɔfuɛ’n, m’ɔ fin Gabaɔn’n+ ɔ kan ndɛ kleli min, Zoova i sua’n nun lɔ. Kɛ ɔ́ yó sɔ’n, nn Ɲanmiɛn ɲrun jranfuɛ mun nin sran’m be kwlaa be o lɛ. Ɔ seli min kɛ: 2 “Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: ‘Kɔmin su waka nga Babilɔnin famiɛn’n fa sieli amun kɔmin su’n, ń má búbú nun.’+ 3 Ɔ ka afuɛ nɲɔn, Zoova i sua’n nun ninnge kwlaa nga Nebikadnezaa m’ɔ ti Babilɔnin famiɛn’n suali be lika nga nun wa ɔli Babilɔnin’n, ń fá be ń bá lika nga nun wa ekun.’”+ 4 “Zoova waan yoo: ‘Zozakimun+ i wa Zekoniasi+ m’ɔ ti Zida famiɛn’n nin Zidafuɛ kwlaa nga be trali be ɔli Babilɔnin’n,+ ń fá be ń sá be sin. Afin ń má búbú waka nga Babilɔnin famiɛn’n fa sieli be kɔmin su’n nun.’”
5 Yɛ Ɲanmiɛn nuan ijɔfuɛ Zeremin tɛli Ɲanmiɛn nuan ijɔfuɛ Anania su-ɔ. Ɔ yoli Ɲanmiɛn ɲrun jranfuɛ mun nin be kwlaa nga be o Zoova i sua’n nun lɔ’n be kwlaa be ɲrun. 6 Ɲanmiɛn nuan ijɔfuɛ Zeremin seli kɛ: “Maan ɔ yo sɔ. Maan Zoova yo sɔ sakpa. Maan Zoova yia ndɛ nga a kannin’n i nuan. Zoova i sua’n nun lɔ ninnge kwlaa nga be isali be ɔli’n, nin sran kwlaa nga be trali be ɔli Babilɔnin’n, maan ɔ fa be bla lika nga nun wa ekun. 7 Sanngɛ yaci sie ɔ su tie ndɛ nga ń má kán klé ɔ bɔbɔ nin sran kwlaa nga mun’n. 8 Laa’n, Ɲanmiɛn nuan ijɔfuɛ nga be dunnin mmua e nin wɔ e ɲrun’n, be kannin sa nga bé wá jú nvle kpanngban nin famiɛn diwlɛ dandan wie’m be su’n be ndɛ. Be kannin alɛ nin ɲrɛnnɛn nin tukpacɛ ng’ɔ sa ndɛndɛ’n be ndɛ. 9 Ɔ maan sɛ Ɲanmiɛn nuan ijɔfuɛ kun jaso kan fɔundi nun tranlɛ’n ndɛ’n, naan i ndɛ ng’ɔ kan’n ɔ kpɛn su’n, yɛ bé sí kɛ Zoova yɛ ɔ sunmannin Ɲanmiɛn nuan ijɔfuɛ sɔ’n sakpasakpa-ɔ.”
10 Kɛ ɔ yoli sɔ’n, Ɲanmiɛn nuan ijɔfuɛ Anania fali kɔmin su waka ng’ɔ o Ɲanmiɛn nuan ijɔfuɛ Zeremin i kɔmin su’n naan w’a bubu nun.+ 11 Sran’m be kwlaa be ɲrun lɛ’n Anania seli kɛ: “Zoova waan yoo: ‘Ɔ ka afuɛ nɲɔn, kɔmin su waka nga Nebikadnezaa m’ɔ ti Babilɔnin famiɛn’n fa sieli i nvle’m be kwlaa be kɔmin su’n, kɛ ń má búbú nun kɛ ngalɛ’n sa.’”+ Kɛ ɔ yoli sɔ’n yɛ Zeremin ɔli-ɔ.
12 Kɛ Ɲanmiɛn nuan ijɔfuɛ Anania bubuli kɔmin su waka ng’ɔ o Ɲanmiɛn nuan ijɔfuɛ Zeremin i kɔmin su’n i nun’n, Zoova kan ndɛ kleli Zeremin. Ɔ seli i kɛ: 13 “Kɔ ko se Anania kɛ Zoova waan yoo: ‘Kɔmin su waka yɛ a bubuli nun-ɔn.+ Sanngɛ nga á wá yó á fá síe i osu’n ɔ́ yó blalɛ nun.” 14 Afin Zoova m’ɔ ti sonja’m be su kpɛn’n, m’ɔ ti Izraɛli Ɲanmiɛn’n waan yoo: “Blalɛ yɛ ń fá síe nvle kwlaa sɔ’m be kɔmin su naan be su Nebikadnezaa m’ɔ ti Babilɔnin famiɛn’n niɔn. Bé sú i kekle nun.+ Yɛ ń fá blo nnɛn mun bɔbɔ ń mɛ́n i wie.”’”+
15 Yɛ Ɲanmiɛn nuan ijɔfuɛ Zeremin seli Ɲanmiɛn nuan ijɔfuɛ Anania+ kɛ: “Anania, yaci sie ɔ su. Zoova w’a sunmanman wɔ. Sanngɛ a yoli maan sran nga mun b’a lafi ato ndɛ su.+ 16 I sɔ’n ti’n Zoova waan yoo: ‘Nian, ń má núnnún wɔ asiɛ’n su. Á wú afuɛ nga. Afin a wlawlali sran mun kɛ be yo ɲin kekle Zoova su.’”+
17 Afuɛ kunngba sɔ’n i anglo nso su’n, Anania wuli.