1 Be Ɲoliɛ

27 Izraɛlifuɛ nga be kali be mɔ be ti awlobo kpɛn’n, nin sran akpi su kpɛn’n, nin sran ya su kpɛn’n,+ nin kpɛnngbɛn nga be di junman man famiɛn’n+ be yɛ. Kpɛnngbɛn sɔ mun yɛ be siesie akpasuaakpasua nga be kacikaci be wun’n anglo kwlaa nun’n,* be ninnge kwlaa nga be yo’n niɔn. Akpasua kun nun’n, sran’m be ti akpiakpi ablaɔn-nin-nnan (24.000).

2 Anglo klikli’n nun’n, akpasua klikli’n i nun sran mun yɛ be ba-ɔ. Zabdiɛli i wa Zasobeamun+ yɛ ɔ dun be ɲrun-ɔn. I sran’m be ti akpiakpi ablaɔn-nin-nnan (24.000). 3 Ɔ ti Perɛzi i osu’n nunfuɛ.+ Sran nga bé wá dí junman anglo klikli sɔ’n nun’n, i yɛ ɔ dun be kpɛnngbɛn’m be kwlaa be ɲrun-ɔn. 4 Anglo nɲɔn su’n nun’n, akpasua nɲɔn su’n i nun sran mun yɛ be ba-ɔ. Dodai+ m’ɔ ti Aoifuɛ’n+ yɛ ɔ ti be su kpɛn-ɔn. I ukafuɛ’n suan Miklɔtu. I sran’m be ti akpiakpi ablaɔn-nin-nnan (24.000). 5 Anglo nsan su’n nun’n, akpasua nsan su’n i nun sran mun yɛ be ba-ɔ. Be su kpɛn’n yɛle Benaya.+ Zoyada+ m’ɔ ti Ɲanmiɛn ɲrun jranfuɛ’m be su kpɛn’n i wa-ɔ. I sran’m be ti akpiakpi ablaɔn-nin-nnan (24.000). 6 Benaya sɔ’n wo safuɲrɛn ablasan (30) mun be nun wie. Yɛ ɔ ti be su kpɛn. I wa Amizabadu yɛ ɔ dun i sran’m be ɲrun-ɔn. 7 Anglo nnan su’n nun’n, akpasua nnan su’n i nun sran mun yɛ be ba-ɔ. Zoabu i niaan bian+ Azaɛli+ yɛ ɔ ti be su kpɛn-ɔn. I sin’n, i wa Zebadia sinnin i osu. I sran’m be ti akpiakpi ablaɔn-nin-nnan (24.000). 8 Anglo nnun su’n nun’n, kpɛnngbɛn nnun su m’ɔ o lɛ’n yɛle Samiti. Ɔ fin Izra i awlo’n nun. I sran’m be ti akpiakpi ablaɔn-nin-nnan (24.000). 9 Anglo nsiɛn su’n nun’n, kpɛnngbɛn nsiɛn su m’ɔ o lɛ’n yɛle Ira.+ Ikɛsi m’ɔ ti Tekoafuɛ’n+ i wa-ɔ. I sran’m be ti akpiakpi ablaɔn-nin-nnan (24.000). 10 Anglo nso su’n nun’n, kpɛnngbɛn nso su m’ɔ o lɛ’n yɛle Elɛzi.+ Ɔ ti Pelɔnfuɛ, yɛ ɔ ti Efraimun i osu’n nunfuɛ. I sran’m be ti akpiakpi ablaɔn-nin-nnan (24.000). 11 Anglo mɔcuɛ su’n nun’n, kpɛnngbɛn mɔcuɛ su m’ɔ o lɛ’n yɛle Sibekai.+ Ɔ ti Isafuɛ,+ yɛ ɔ ti Zera i osu’n nunfuɛ. I sran’m be ti akpiakpi ablaɔn-nin-nnan (24.000). 12 Anglo ngwlan su’n nun’n, kpɛnngbɛn ngwlan su m’ɔ o lɛ’n yɛle Abiezɛɛ.+ Ɔ fin Anatɔtu,+ yɛ ɔ ti Bɛnzamɛn i osu’n nunfuɛ. I sran’m be ti akpiakpi ablaɔn-nin-nnan (24.000). 13 Anglo blu su’n nun’n, kpɛnngbɛn blu su m’ɔ o lɛ’n yɛle Maarai.+ Ɔ fin Netofa,+ yɛ ɔ ti Zera i osu’n nunfuɛ. I sran’m be ti akpiakpi ablaɔn-nin-nnan (24.000). 14 Anglo blu-nin-kun (11) su’n nun’n, kpɛnngbɛn blu-nin-kun (11) su m’ɔ o lɛ’n yɛle Benaya.+ Ɔ fin Piratɔn, yɛ ɔ ti Efraimun i osu’n nunfuɛ. I sran’m be ti akpiakpi ablaɔn-nin-nnan (24.000). 15 Anglo blu-nin-nɲɔn (12) su’n nun’n, kpɛnngbɛn blu-nin-nɲɔn (12) su m’ɔ o lɛ’n yɛle Ɛldai. Ɔ fin Netofa, yɛ ɔ ti Ɔtiniɛli i osu’n nunfuɛ. I sran’m be ti akpiakpi ablaɔn-nin-nnan (24.000).

16 Izraɛli akpasua’m be su kpɛnngbɛn mun yɛ: Zikri i wa Eliezɛɛ ti Ribɛnin akpasua’n i su kpɛn. Maaka i wa Sefatia ti Simeɔn akpasua’n i su kpɛn. 17 Kemuɛli i wa Asabia ti Levi akpasua’n i su kpɛn. Zadɔku ti Aarɔn i osu’n nunfuɛ’m be su kpɛn. 18 Elii+ m’ɔ ti Davidi i niaan’m be nun kun’n yɛ ɔ ti Zida akpasua’n i su kpɛn-ɔn. Misɛli i wa Ɔmri ti Isakaa akpasua’n i su kpɛn. 19 Abdiasi i wa Isimaya ti Zabilɔn akpasua’n i su kpɛn. Azriɛli i wa Zerimɔtu ti Nɛftali akpasua’n i su kpɛn. 20 Azazia i wa Oze ti Efraimun akpasua’n i su kpɛn. Pedaya i wa Zoɛli ti Manase akpasua’n i bue kun su kpɛn. 21 Zakari i wa Ido ti Manase akpasua’n i bue kun nunfuɛ nga be o Galaadi lɔ’n be su kpɛn. Abnɛɛ+ i wa Zaasiɛli ti Bɛnzamɛn akpasua’n i su kpɛn. 22 Zeroamun i wa Azarɛli ti Dan akpasua’n i su kpɛn. Izraɛli akpasuaakpasua’m be su kpɛn mun yɛ be o lɛ-ɔ.

23 Davidi w’a kaman be nga be le afuɛ ablaɔn’n (20) nin be nga be nin-a ɲanman afuɛ ablaɔn’n (20) wie. Afin Zoova tɛli i nda kɛ ɔ́ yó maan Izraɛlifuɛ’m bé sɔ́n kpanngbanngban kɛ nglo lɔ nzraama mun sa.+ 24 Zeruya i wa Zoabu boli sran’m be kalɛ bo, sanngɛ w’a guɛmɛn i bo. Afin i sɔ m’ɔ yoli’n ti’n, Ɲanmiɛn fali Izraɛlifuɛ’m be wun ya.+ Kɛ bé klɛ́ Famiɛn Davidi’n i blɛ su ndɛ mun’n, b’a boman be nga be kali be’n be nuan.

25 Adiɛli i wa Azmavɛti yɛ ɔ nian famiɛn’n i sua’n nun lɔ ninnge kpakpa’m be siewlɛ’m be su-ɔ.+ Ninnge siewlɛ* nga be o blo lɔ’n, nin klɔ dandan’m be su’n, nin klɔ kanngan’m be su’n, ɔ nin sasafuɛ tranwlɛ fleiin kpa’n be nun’n, Oziasi i wa Zonatan yɛ ɔ nian be su-ɔ. 26 Kelibu i wa Ezri yɛ ɔ nian fie su junman difuɛ’m be su-ɔ. 27 Simei m’ɔ ti Ramafuɛ’n yɛ ɔ nian viɲin fie’m be su-ɔ. Zabdi m’ɔ fin Sɛfamun’n* yɛ ɔ nian duvɛn siewlɛ’m be su-ɔ. 28 Baali-Anan m’ɔ ti Gedɛɛfuɛ’n yɛ ɔ nian olivie fie nin sikomɔɔ fie+ nga be o Sefela’n+ nun lɔ’n be su-ɔ. Zoasi yɛ ɔ nian ngo siewlɛ’m be su-ɔ. 29 Sitrai m’ɔ fin Sarɔn’n yɛ ɔ nian nannin nga be didi Sarɔn+ lɔ’n be su-ɔ. Adilai i wa Safati yɛ ɔ nian nannin’m be su lika kpɛtɛkplɛɛ’n nun lɔ-ɔ. 30 Obili m’ɔ ti Ismaɛli i osu’n nunfuɛ’n yɛ ɔ nian ɲɔnngɔnmin’m be su-ɔ. Zedeia m’ɔ fin Meronɔti’n nian aflunmun’m* be su. 31 Zazizi m’ɔ ti Agaafuɛ’n yɛ ɔ nian boli nin bua’m be su-ɔ. Kpɛnngbɛn nga be nian Famiɛn Davidi i ninnge’m be su’n be yɛ be o lɛ-ɔ.

32 Zonatan+ m’ɔ ti Davidi i aosua’n ti i afɔtuɛ manfuɛ’m be nun kun. Ɔ ti akunndanfuɛ. Asa ekun’n, ɔ ti fluwa klɛfuɛ. Akɛmɔnin i wa Zeiɛli yɛ ɔ nian famiɛn’n i mma’m be su-ɔ.+ 33 Aitofɛli+ ti famiɛn’n i afɔtuɛ manfuɛ. Usai+ m’ɔ ti Aakifuɛ’n ti famiɛn’n i janvuɛ.* 34 Abiataa+ nin Zoyada i wa Benaya+ yɛ be sinnin Aitofɛli i osu-ɔ. Zoabu+ ti famiɛn’n i sonja’m be su kpɛn.