1 Be Ɲoliɛ

12 I nun nga Kisi i wa Saili+ ti’n, Davidi kwlá kɔman lika ng’ɔ klo’n, yasua wie’m be ko toli i Ziklagi+ lɔ. Safuɲrɛn nga be suɛnnin i bo alɛ kunlɛ nun’n, be nun wie mun-ɔn.+ 2 Ta o be sa nun sɛsɛsɛ. Be kwla fa be sa fama nin be sa bɛ’n+ be to kpafloko+ annzɛ be to ta. Saili i niaan mun-ɔn, yɛ be ti Bɛnzamɛn+ i osu’n nunfuɛ. 3 Aiezɛɛ ti be su kpɛn. Sran ng’ɔ su i su’n yɛle Zoasi. Be nɲɔn’n be ti Semaa m’ɔ ti Gibeafuɛ’n+ i mma mun. Yɛ Zeziɛli nin Pelɛti mɔ be ti Azmavɛti+ i mma mun’n, nin Beraka, nin Zei m’ɔ fin Anatɔtu’n, 4 nin Isimaya m’ɔ ti Gabaɔnfuɛ’n.+ Ɔ ti safuɲrɛn, yɛ ɔ o safuɲrɛn ablasan (30) mun be nun wie,+ yɛ ɔ ti be su kpɛn. Yɛ Zeremin, nin Zaaziɛli, nin Zoanan, nin Zozabadi m’ɔ fin Gedera’n, 5 nin Elizai, nin Zerimɔtu, nin Bealia, nin Semaria, nin Sefatia m’ɔ fin Arifu’n, 6 nin Ɛlkana, nin Isia, nin Azarɛli, nin Zoezɛli, nin Zasobeamun mɔ be ti Kore i osu’n nunfuɛ’n,+ 7 nin Zeroamun m’ɔ fin Gedɔɔ’n i wa Zoela nin Zebadia.

8 Gadifuɛ wie’m be jrannin Davidi sin yɛ be ko toli i fiawlɛ lika ng’ɔ o aawlɛ flɛnnɛn’n nun+ lɔ’n nun. Be ti safuɲrɛn, be si alɛ kun kpa, be si ɲrɛn dandan mun nin cua’m be nun tra kpa. Be ɲrun’n ti kɛ asɔmɔli’m be liɛ’n sa, yɛ be wun kpɛ kpa kɛ wannzannin nga be o oka’m be su’n sa. 9 Be su kpɛn’n yɛle Ezɛɛ, be nɲɔn su’n yɛle Abdiasi, be nsan su’n yɛle Eliabu, 10 be nnan su’n yɛle Mismana, be nnun su’n yɛle Zeremin, 11 be nsiɛn su’n yɛle Atai, be nso su’n yɛle Eliɛli, 12 be mɔcuɛ su’n yɛle Zoanan, be ngwlan su’n yɛle Ɛlzabadi, 13 be blu su’n yɛle Zeremin, be blu-nin-kun (11) su’n yɛle Makbanai. 14 Safuɲrɛn nga be fin Gadi+ akpasua’n nun’n be yɛ be o lɛ-ɔ. Be ti sonja su kpɛn. Be nun fakafaka’n nin sran ya (100) be sɛ. Yɛ be nun sran ng’ɔ le wunmiɛn kpa’n nin sran akpi (1.000) be sɛ.+ 15 Be yɛ anglo klikli’n su’n, be kpɛli Zurdɛn’n niɔn. Kusu nn w’a yi lele w’a tratra su. Be fuannin be kwlaa nga be tran lika kpɛtɛkplɛɛ’m be nun’n, wia afiliɛ lɔ nin wia atɔliɛ lɔ.

16 Bɛnzamɛnfuɛ wie mun nin Zidafuɛ wie’m be ɔli Davidi sin i fiawlɛ lika’n+ nun lɔ wie. 17 Davidi ko kpali be atin naan w’a se be kɛ: “Sɛ amun ba wɛtɛɛ su naan amún úka min’n, e nin amun e bo yó kun. Sanngɛ sɛ min bo waka kpɛlɛ ti yɛ amun bali naan amún fá min wlá min kpɔfuɛ’m be sa nun’n, kusu nn m’an yoman sa fi’n, maan e nannan’m be Ɲanmiɛn’n wun i sɔ liɛ’n naan ɔ di e afiɛn jɔlɛ.”+ 18 Kpɛkun Ɲanmiɛn wawɛ’n jrali Amasai+ m’ɔ ti safuɲrɛn ablasan (30) mun be su kpɛn’n i su. Ɔ seli kɛ:

“Davidi, ɔ liɛ yɛle e. Zese i wa, e o ɔ sin.+

Kɛ ɔ kɛnnin i sɔ’n, Davidi sɔli be nun klanman kpɛkun ɔ sieli be sonja su kpɛn wie.

19 Manase akpasua’n nunfuɛ wie’m be jasoli Saili sin, kpɛkun be ɔli Davidi sin wie. Kɛ ɔ́ yó sɔ’n, nn Davidi nin Filistifuɛ’m be bo w’a yo kun naan be nin Saili bé kó kún. Sanngɛ Davidi w’a ukaman Filistifuɛ mun. Afin kɛ Filistifuɛ’m be kpɛnngbɛn’m+ be kokoli be wun’n, be kɛnnin i bo. Be seli kɛ: “Ɔ cɛman naan w’a yaci e lɛ w’a ko jran i min Saili sin. Yɛ e ti’n ká nun.”+ 20 Kɛ Davidi ɔli Ziklagi’n,+ Manase akpasua’n nunfuɛ nga be ɔli i sin’n, be yɛ: Adna, nin Zozabadi, nin Zediaɛli, nin Misɛli, nin Zozabadi, nin Elii, nin Ziletai. Be ti Manase+ akpasua’n nun sonja akpi su kpɛn. 21 Be ukali Davidi naan w’a fuan awiefuɛ mun, afin be ti safuɲrɛn yɛ be ti yakpafuɛ.+ Ɔ maan Davidi sieli be sonja su kpɛn. 22 Kɛ aliɛ cɛ́n m’ɔ́ sán’n, nn sran’m bé bá Davidi+ i ukalɛ. Ɔ maan i sonja’m be wa sɔnnin kpanngban kɛ Ɲanmiɛn i sonja mun sa.+

23 Be nga alɛ kunlɛ ninnge’m be o be sa nun’n, mɔ be ko toli Davidi Ebrɔn+ lɔ’n, be su kpɛn’m be nuan yɛ. Be ɔli naan bé kó fá Saili i famiɛn dilɛ’n mán Davidi kɛ nga Zoova seli kɛ be yo’n sa.+ 24 Zidafuɛ nga be tra ɲrɛn dandan mun nin cua’m be nun’n, be ti akpi nsiɛn ya mɔcuɛ (6.800). Alɛ ninnge o be sa nun. 25 Simeɔn akpasua’n nun sonja nga be le wunmiɛn kpa mɔ be ti yakpafuɛ’n, be ti akpi nso nin ya kun (7.100).

26 Levi akpasua liɛ’n nun’n, sran akpi nnan ya nsiɛn (4.600). 27 Zoyada+ ti Aarɔn+ i osu’n nunfuɛ’m be su kpɛn. I sa nun sran’m be ti akpi nsan ya nso (3.700). 28 Zadɔku+ nin kpɛnngbɛn ablaɔn-nin-nɲɔn (22) mɔ be ti be si’m be awlobo’m be su kpɛn’n, be o be nun wie. Zadɔku sɔ’n ti gbanflɛn kun m’ɔ le wunmiɛn kpa-ɔ, kpɛkun ɔ ti yakpafuɛ.

29 Bɛnzamɛn akpasua’n nun’n, sran akpi nsan (3.000). Saili+ ti be niaan. Laa’n, be nun sunman be sasa Saili i awlobo’n. 30 Efraimun akpasua liɛ’n nun’n, sran akpiakpi ablaɔn nin ya mɔcuɛ (20.800). Be ti yakpafuɛ yɛ be dunman’n fuli kpa be si’m be awlobo’m be nun.

31 Manase akpasua’n i bue kun nunfuɛ nga be boli be dunman kɛ be ko sie Davidi i famiɛn’n, be ti akpiakpi blu-nin-mɔcuɛ (18.000). 32 Isakaa akpasua liɛ’n nun’n, kpɛnngbɛn ya nɲɔn (200). Sran sɔ’m be si blɛ ng’ɔ fata kɛ Izraɛlifuɛ’m be yo like kun’n ɔ nin like trele ng’ɔ fata kɛ be yo’n. Ndɛ nga be kan’n, i su yɛ be niaan onga’m be di-ɔ. 33 Zabilɔn akpasua liɛ’n nun’n, be nga be kwla di sonja’n, be ti akpiakpi ablenun (50.000). Wafa ng’ɔ fata kɛ be fa alɛ ninnge wafawafa kwlaa be jranjran naan b’a kun alɛ’n, be si i kpa liɛ su. Be kwlaa be fali be wun mannin Davidi mlɔnmlɔn.* 34 Nɛftali akpasua liɛ’n nun’n, kpɛnngbɛn akpi kun (1.000). Be sa nun sran’m be ti akpiakpi ablasan-nin-nso (37.000) yɛ be si ɲrɛn dandan mun nin cua’m be nun tra kpa. 35 Dan akpasua liɛ’n nun’n, be nga be si wafa ng’ɔ fata kɛ be jranjran naan b’a kun alɛ’n, be ti akpiakpi ablaɔn-nin-mɔcuɛ nin ya nsiɛn (28.600). 36 Azɛɛ akpasua liɛ’n nun’n, be nga be kwla di sonja mɔ be si wafa ng’ɔ fata kɛ be jranjran naan b’a kun alɛ’n, be ti akpiakpi ablanan (40.000).

37 Ribɛnin akpasua’n nun nin Gadi akpasua’n nun nin Manase akpasua’n i bue kun nun’n, sonja nga be kpɛli Zurdɛn’n+ naan b’a ba’n, be ti akpiakpi ya akpiakpi ablaɔn (120.000). Alɛ ninnge wafawafa kwlaa o be sa nun. 38 Be kwlaa sɔ’n be ti alɛ kunfuɛ. Sɛ alɛ tɔ’n, be sisiman be bo naan b’a kun wie. Be bali Ebrɔn lɛ naan bé síe Davidi famiɛn Izraɛli nvle wunmuan’n su. Izraɛlifuɛ’m be onga’m be kwlaa be bo yoli kun* naan bé síe Davidi famiɛn+ wie. 39 Be dili cɛn ba nsan Davidi i wun lɛ. Be dili like yɛ be nɔnnin nzan. Afin be niaan’m be tɔnnin like mannin be. 40 Be nga be mantan koko’n, nin be nga be o mmua kɛ Isakaafuɛ mun nin Zabilɔnfuɛ mun nin Nɛftalifuɛ mun sa bɔbɔ’n, be fali sanmlɛn, nin gato nga be fa figie mma kee nin viɲin mma kee be yoli’n, nin duvɛn, nin nannin, nin bua mun bali. Be fa sieli i aflunmun mun, nin ɲɔnngɔnmin mun, nin milɛ mun, nin nannin’m be su yɛ be fa bali-ɔ. Afin Izraɛlifuɛ’m be klun ti jɔwa dan.