2 Samiɛli

20 Kɛ ɔ́ yó sɔ’n, nn yasua ɲin keklefuɛ kun o lɛ. Be flɛ i kɛ Saba.+ Bikri i wa-ɔ, yɛ ɔ ti Bɛnzamɛn akpasua’n nunfuɛ. Ɔ fitali awɛ’n nun,+ kpɛkun ɔ seli kɛ: “E ndɛ nunman Davidi i ndɛ nun. E su diman Zese i wa’n i aja.+ Izraɛlifuɛ mun, amun tinuntinun amun sa amun sin amun ɲanmiɛn’m be sin.”*+ 2 Kɛ ɔ yoli sɔ’n, Izraɛlifuɛ’m be kwlaa be yacili Davidi i su sulɛ, kpɛkun be suli Bikri i wa Saba su.+ Sanngɛ Zida akpasua’n nunfuɛ’m be liɛ’n, b’a kpɔciman be famiɛn’n. Kɛ be fɛli i Zurdɛn’n i nuan lɛ’n, be suli i su lele be juli Zerizalɛmun.+

3 Kɛ Davidi juli i awlo* Zerizalɛmun lɔ’n,+ i yi* blu ng’ɔ yacili be lɛ naan be nian awlo’n i lika’n,+ ɔ fa be sieli i sua kun nun naan sonja’m be nian be su. Ɔ mannin be aliɛ titi, sanngɛ ɔ nin be b’a siman sua kun.+ Be kacili kɛ angbeti sa, kusu nn be wun’n i ɲin te o su. Yɛ be kali sua sɔ’n nun lɔ mlɔnmlɔn lele wie’n fa kunnin be.

4 Famiɛn’n seli Amaza kɛ:+ “Fa cɛn ba nsan flɛflɛ Zida akpasua’n nunfuɛ mun naan be bla. Ɔ bɔbɔ bla wie.” 5 Ɔ maan Amaza ko flɛli Zida akpasua’n nunfuɛ mun. Sanngɛ i bɔbɔ w’a baman cɛn nga be kleli i’n su. 6 Davidi seli Abisai kɛ:+ “Bikri i wa Saba+ kwla yo e tɛ dan tra Absalɔmun.+ I sɔ’n ti’n, fa min sufuɛ mun naan amun su i su. I liɛ’n, ɔ su ko fiaman klɔ nga be sisili be wun’n be nun kun su naan y’a kwlá trɛmɛn i.” 7 Yɛ Zoabu+ i sran mun, nin Kerɛtifuɛ mun nin Pelɛtifuɛ mun,*+ ɔ nin safuɲrɛn’m be kwlaa be ɔli-ɔ. Be fɛli i Zerizalɛmun lɛ be suli Bikri i wa Saba su. 8 Kɛ be juli yɔbuɛ dan ng’ɔ o Gabaɔn+ lɔ’n i wun lɛ’n, Amaza+ wa toli be. Zoabu liɛ’n, i alɛ ninnge’m be wlɛ i wun, yɛ tokofi kun m’ɔ o i bua’n nun’n, ɔ sɛn i bo. Kɛ ɔ wunngeli Amaza i wun lɔ’n, tokofi’n flo tɔli.

9 Zoabu seli Amaza kɛ: “?Aniaan bian, ɔ wun ti kpa?” Kpɛkun ɔ fɛli i sa fama’n trali Amaza i akanza’n kɛ ɔ su wa fɛ i nuan’n bo i fuka’n su sa. 10 Amaza w’a fɛmɛn i ɲin w’a sieman tokofi ng’ɔ o Zoabu i sa nun’n su. Zoabu fali tokofi sɔ’n kplɛnnin i Amaza i ku’n nun+ naan i klun aya’n w’a fite w’a tɔ asiɛ wun lɛ. W’a fa wɔmɛn i kpɛ nɲɔn. Kpɛ kunngba cɛ bɔbɔ’n, ɔ ka lɛ kunnin i. I sin’n, Zoabu nin i niaan bian Abisai be suli Bikri i wa Saba su.

11 Zoabu i gbanflɛn kun m’ɔ kali Amaza i wun lɛ’n seli kɛ: “Be kwlaa nga be o Zoabu sin’n nin be kwlaa nga be ti Davidi liɛ’n, maan be su Zoabu su.” 12 Kɛ ɔ́ yó sɔ’n, nn Amaza la i mmoja’n nun, akpɔ’n i afiɛn lɛ. Kɛ yasua’n wunnin kɛ sran kwlaa ng’ɔ ju lɛ’n, ɔ jran’n, ɔ cuɛnnin Amaza akpɔ’n su lɛ ko yili i ijre’n nun lɔ. Kpɛkun ɔ fali tralɛ kun kɛtɛli i su. Afin ɔ wunnin kɛ be kwlaa nga be ju lɛ’n, be jran. 13 Kɛ ɔ cuɛnnin i akpɔ’n su lɛ yili i ijre’n nun lɔ’n, sran’m be kwlaa be suli Zoabu su naan bé kó kúnndɛ Bikri i wa Saba.+

14 Saba sinnin Izraɛli akpasua’m be kwlaa be su lele ɔ juli Abɛli-Bɛti-Maaka.+ Yɛ Bikrifuɛ’m be yiali naan b’a su i su.

15 Zoabu nin i sran’m be ko bo sin yiali Abɛli-Bɛti-Maaka naan bé trá Saba. Kpɛkun be kplannin like kun naan b’a kwla ju klɔ’n i wun talɛ’n wun lɔ, afin cenje dan kun bo sin yia klɔ’n. Yɛ Zoabu i sran’m be ngba be boli klɔ’n i wun talɛ’n i bo fufulɛ bo naan ɔ bu gua. 16 Yɛ bla ngwlɛlɛfuɛ kun m’ɔ o klɔ’n nun lɔ’n kpan seli kɛ: “Nja mun, amun sie amun su tie. Amun yaci, amun se Zoabu kɛ ɔ wunnge wa naan n kan ndɛ kun n kle i.” 17 Kɛ Zoabu wunngeli bla’n i wun lɔ’n, bla’n usɛli i kɛ: “?Wɔ yɛ be flɛ wɔ Zoabu’n niɔn?” Ɔ tɛli i su kɛ: “Ɛɛn-ɛn, min-ɔn.” Yɛ bla’n seli i kɛ: “Sie ɔ su min mɔ n ti ɔ sufuɛ’n min nuan bo.” Ɔ seli kɛ: “Min su o ɔ nuan bo.” 18 Bla’n seli ekun kɛ: “Laa’n, kɛ bé kán ndɛ titi’n be se kɛ: ‘Maan e wɔ Abɛli klɔ’n nun lɔ e ko usa ngwlɛlɛ afɛ,’ kpɛkun ndɛ’n i ti w’a kpɛ. 19 N ijɔ Izraɛlifuɛ nga be klo anuansɛ’n, mɔ kusu be ti nanwlɛfuɛ’n be nuan. Klɔ m’ɔ ti kɛ niɛn kun sa Izraɛli nvle’n nun’n, i bubulɛ ti yɛ a bali-ɔ. ?Ngue ti yɛ ɔ waan á núnnún* Zoova i aja like’n niɔn?”+ 20 Zoabu tɛli su kɛ: “N kwlá yoman sɔ mlɔnmlɔn. Nɛ́n i bubulɛ nin i nunnunlɛ ti yɛ n ba-ɔ. 21 Nɛ́n i sɔ like yolɛ ti yɛ n ba-ɔ. Sanngɛ Bikri i wa Saba+ m’ɔ fin Efraimun lɔ okaoka lika’m+ be nun’n, ɔ jasoli Famiɛn Davidi wun. Sɛ amun fɛ i wla min sa nun’n, é yáci amun klɔ’n i diin é kɔ́ e ɲrun.” Yɛ bla’n seli Zoabu kɛ: “Nian! É wá tó i ti’n é yí i talɛ’n i sin lɔ mán wɔ.”

22 Bla’n ko wunnin klɔ’n nunfuɛ’m be kwlaa be wun. Kpɛkun be kpɛli Bikri i wa Saba i ti’n naan b’a to b’a man Zoabu. Kɛ ɔ yoli sɔ’n, Zoabu fitali awɛ’n nun, kpɛkun be sali be sin be awlo’m be nun sɛsɛsɛ.+ Zoabu liɛ’n, ɔ sɛli i sin famiɛn’n i wun lɔ, Zerizalɛmun lɔ.

23 Zoabu ti Izraɛli sonja’m be kwlaa be su kpɛn.+ Zoyada+ i wa Benaya+ yɛ ɔ ti Kerɛtifuɛ mun nin Pelɛtifuɛ’m+ be su kpɛn-ɔn. 24 Adoramun+ yɛ ɔ nian be nga be mian be kɛ be di junman’n be su-ɔ. Yɛ Ailidi i wa Zozafati+ yɛ ɔ klɛ nvle’n nun ndɛ mun sie-ɔ. 25 Seva ti fluwa klɛfuɛ, yɛ Zadɔku+ nin Abiataa+ be ti Ɲanmiɛn ɲrun jranfuɛ. 26 Ira m’ɔ ti Zairi i osu’n nunfuɛ’n ti Davidi i sran’m be su kpɛn’n kun.*