Boasa Ikkon Tetap SEMANGAT Hita

Si Faizal. Dung sataon mate istrina, operasi jantung ma ibana. Didok ibana ma, “Tikki hujaha bukku Job, huboto ma boasa disurat i di Bibel. Tikki tajaha pengalaman ni akka halak na disurat di Bibel na sarupa dohot na tahilala, on boi mangapuli rohatta.” Didok ibana muse, “Mararga dope hape ngolukkon.”

Si Tarsha. Tikki poso do ibana mate omakna. Didok ibana, “Gabe martujuan ma ngolukku ala mananda Debata, gabe adong pakkirimonku, jala toktong do las rohakku nang pe godang sitaonon. Pos ma rohatta parduli do Jahowa tu hita jala boi do Ibana mangurupi hita ganup ari.”

SONGON naung dipaboa di artikel on, marragam do sitaonon na boi mambahen sasahalak mandele. Tikki marsitaonon hamu, olo do ra didok rohamuna dang adong be gunana mangolu manang dang adong na parduli tu hamu. Alai pos ma rohamuna, parduli do Debata tu hamu jala arga do hamu di Ibana.

Pos do roha ni panurat Psalmen 86 mandok tu Debata, “Tikki susa au, jou-jou do au tu Ho, ai alusanmu do au.” (Psalmen 86:7) Alai olo do ra sukkun-sukkun rohamuna, ‘Songon dia ma cara ni Debata mangalusi au “tikki susa?”’

Memang dang langsung dilehon Debata jalan keluar tu akka sitaononmuna. Alai pos ma rohamuna, boi do Debata mangalehon dame ni roha tu hamu asa boi hamu manaon i. Didok do di Bibel, “Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek mardongan hamauliateon. . . . Lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.” (Pilippi 4:6, 7) Saonari, taulas ma piga-piga ayat ni Bibel na boi paposson rohatta memang parduli do Debata tu hita.

Parduli do Debata tu Hamu

“Dang adong nanggo sada pe sian [amporik] na so diparrohahon Debata . . . Ummarga do hamu sian godang amporik.”—Lukas 12:6, 7, surat na di toru.

RIMANGI MA: Dang arga amporik na gelleng di godangan halak, alai arga do i di Debata. Jala dang adong nanggo sada amporik pe na so diparrohahon Debata. Dao do ummarga jolma sian akka amporik i dohot sian akka toppaan na asing. Alana ‘mirip’ tu Debata do jolma ditoppa. Boi do jolma maniru jala patuduhon akka sifat ni Debata.—1 Musa 1:26, 27.

“Ale Jahowa, ditanda Ho do au jala manat do au diparrohahon Ho. . . Diida Ho do pikkiranku . . . . Manat ma parrohahon au, jala ida ma arsak ni rohakku.”—Psalmen 139:1, 2, 23.

RIMANGI MA: Takkas do ditanda Debata hamu. Diboto Ibana do na buni di bagasan roha dohot pikkiranmuna. Nang pe dang adong na mangattusi situasi dohot perasaanmuna, alai parduli do Debata tu hamu jala lomo do rohana mangurupi hamu. Alani i ikkon tetap do hamu semangat.

Pasti Diurupi jala Ditogu-Togu do Hamu

“Ale Jahowa, tangihon ma tangiakku, sai anggiat ma dibege Ho angguk-anggukku na mangido asa diurupi. . . . Patinggil ma pinggolmu tu au, hatop ma alusi au tikki jou-jou au tu Ho. . . . Ai tangihononna do tangiang ni na pogos.”—Psalmen 102:1, 2, 17.

RIMANGI MA: Sian mulana diboto Jahowa do sude sitaonon ni jolma na mambahen nasida tarilu-ilu. (Psalmen 56:8) Termasuk ma i ilu-ilumuna. Diingot Debata do sude sitaonon dohot ilu-ilumuna ala arga do hamu di Ibana.

“Unang ganggu roham, ai Au do Debatam. Jagaokku do ho jala urupanku . . . Au do Jahowa Debatam. . . na mandok tu ho, ‘Unang ho mabiar. Urupanku do ho.’” —Jesaya 41:10, 13.

RIMANGI MA: Rade do Jahowa mangurupi hamu. Molo mandele hamu, patoguonna do hamu.

Adong do Pakkirimon di Ari na Naeng Ro

“Songon on do balga ni holong ni roha ni Debata tu portibi on, pola do Anakna na sasada i dilehon, asa unang mate ganup na patuduhon haporseaon tu ibana, alai asa mandapot hangoluan na saleleng ni lelengna.”—Johannes 3:16.

RIMANGI MA: Massai holong do roha ni Debata tu hamu umbahen na dilehon Ibana Jesus gabe tobusan humokkop hamu. Alani i gabe boi ma hamu marlas ni roha jala mangolu saleleng ni lelengna di ari na naeng ro.a

Molo mandele hamu alani sitaononmuna jala tarpikkir hamu naeng bunu diri, parsiajari ma Hata ni Debata jala patogu ma pos ni rohamuna tu janji ni Debata. Boi do i mambahen hamu marlas ni roha jala tetap semangat.

a Laho mamboto gumodang taringot tobusan ni Jesus dohot labana, tonton ma video Pabadiahon Ari Hamamate ni Jesus di www.jw.org/bbc, di bagian TARINGOT HAMI > PARNINGOTAN.