Tutu do Hea Mangolu si Johannes Pandidi?
Di bukku Injil, adong dipaboa taringot sahalak bawa na margoar si Johannes Pandidi. Dibaritahon ibana do barita taringot Harajaon ni Debata di Judea. Alai tutu do bawa on hea mangolu songon na didok di Bibel? Pikkirhon ma on:
Didok di Bibel, “Ro ma si Johannes Pandidi tu padang gurun na di Judea lao marbarita, ninna ma, ‘Pauba hamu ma rohamuna, ai nungnga jonok Harajaon banua ginjang i.’” (Mateus 3:1, 2) Adong do ahli sejarah na mendukung na didok di ayat i? Adong.
Sahalak ahli sejarah di abad na parjolo na margoar si Flavius Yosefus manurat taringot sahalak bawa na margoar “si Johannes, na didok sahalak Pandidi”. Disurat si Yosefus do muse, ditogihon si Johannes do “halak Jahudi asa muba”, “mangalehon diri ni nasida tu Debata”, jala “tardidi”.—Jewish Antiquities, Book XVIII.
Didok di Bibel, hea do dipasingot si Johannes sahalak raja na mamaretta di Galilea dohot di Perea, na margoar si Herodes Antipas. Mangakku do si Herodes molo ibana sahalak Jahudi na mangihutton Patik ni si Musa. Alai dibuat ibana do si Herodias istri ni abangna gabe istrina. I do alana dipasingot si Johannes si Herodes. (Markus 6:18) Sesuai do hatorangan on tu catatan sejarah.
Disurat si Yosefus do muse, molo si Herodes Antipas “jatuh cinta tu si Herodias”, jala “barani do ibana mandok tu si Herodias asa gabe istrina”. Olo do si Herodias, jala ditinggalhon ibana ma suamina asa boi menikah tu si Antipas.
Didok di Bibel, “Ro ma torop halak sian Jerusalem, sian sude huta di Judea, dohot sian sude huta na jonok tu Sunge Jordan mandapotton [si Johannes]. Dididi si Johannes ma nasida di Sunge Jordan”.—Mateus 3:5, 6.
Didukung si Yosefus do hatorangan na disurat di ayat i. Didok ibana, adong “sakelompok halak” na ro manjuppangi si Johannes. Jala “hona do tu roha ni nasida jamita na dipasahat si Johannes”.
Takkas ma, pos do roha ni si Yosefus na tutu do hea mangolu si Johannes Pandidi. Hita pe, boi do pos rohatta na hea do mangolu si Johannes Pandidi.