44 SI JOHANNES PANDIDI
‘Dang Adong na Umbalga sian Ibana’
SALELENG marratus taon, dang hea be disuru Jahowa akka panurirangna lao pasingotton naposona. Alai di sada tikki, disuru Jahowa ma sahalak bawa lao mangulahon i. Goarna si Johannes. Sahalakna do tinggal di padang belantara ni Judea. Inganan na harsang do i jala marbatu-batu. Godang do disi ulok, kalajengking, dohot binatang buas na balga. Bahkan godang do parjahat na tinggal disi. Porlu do habaranion di si Johannes lao tinggal di inganan sisongon i. Jala ikkon barani do ibana pasahatton sipasingot sian Jahowa tu halak Jahudi.
Pasti nungnga dipaboa si Sakaria dohot si Elisabet tu si Johannes aha naung didok suru-suruan ni Jahowa taringot ibana. Jadi diboto si Johannes do, lao gabe sahalak na bersemangat do ibana songon si Elia, sahalak Nasir songon si Samuel, jala gabe halak na paradehon dalan tu halak na umbalga sian ibana. Tikki marumur 30 taon si Johannes, sasittongna boi do ibana gabe malim songon bapakna. Alai dang i na diulahon si Johannes. Dijujui ibana do akka halak asa bertobat sian dosa ni nasida. Ibana ma na “jou-jou di padang gurun”, songon na dipaboa Panurirang Jesaya marratus taon sebelumna. Semangat do si Johannes mambaritahon taringot “Harajaon banua ginjang” tu akka halak. Jala godang do halak na ro sian huta ni nasida lao mambege ibana. Hasilna, gabe godang ma na bertobat jala tardidi dibahen si Johannes. Tikki ro halak Saduse dohot halak Parise manjuppangi si Johannes, barani do ibana mandok molo nasida halak na munafik. Alana diajarhon nasida do Patik ni Debata, hape dang diulahon.
Massai penting do tugas ni si Johannes. Alai dang didok rohana na unjago ibana sian halak na asing. Gariada, serep do rohana. Dipaboa ibana do tu akka halak, holan paradehon dalan tu Jesus do ibana, i ma halak na dao umbalga sian ibana. Didok si Johannes do muse, haru mambukka sipatu ni Jesus pe dang tama ibana. Tikki tardidi Jesus, dibege si Johannes do soara ni Jahowa na mandok, “On do Anakku, haholongakki, las situtu do rohakku mangida ibana.” Dang leleng dukkon i, ro ma Jesus manjuppangi si Johannes. Tikki diida si Johannes na ro Jesus, gogo ma soarana mandok tu akka halak na disi, “Ida ma, ibana do Anak ni Biru-Biru ni Debata na manesa dosa ni portibi on!”
Dipatudu si Johannes do muse na serep rohana tikki dijujui ibana siseanna asa mangihutton Jesus. Ujungna, godang ma sian akka siseanna i na gabe sisean ni Jesus. Termasuk ma si Andreas na marhaha maranggi dohot si Petrus, jala dohot do ra si Johannes anak ni si Sebedeus. Di pudian ni ari, gabe apostel ni Jesus do nasida na dua. Di mulana, sarupa do na diulahon Jesus songon na diulahon si Johannes, i ma manjujui akka halak asa bertobat jala tardidi. Alai di sada tikki, ro ma akka siseanna manjuppangi si Johannes. Dipaboa nasida ma na unggodang halak na tardidi dibahen akka sisean ni Jesus sian na tardidi dibahen ibana. Gabe cemburu do si Johannes mambege i? Daong. Gariada serep do rohana mandok, “Lam tu godangna ma ulaonna, alai lam otik nama ulaonku.”
Dang lomo roha ni akka parjahat mambege barita na dipasahat si Johannes, alai marlas ni roha do anggo akka halak na paimahon haroro ni Messias
Dipatudu si Johannes do muse habaranion tikki pasingotton sahalak raja na margoar si Herodes Antipas. Di tikki i, nungnga maragama Jahudi si Herodes. Alai dang dioloi ibana Patik ni Debata ala dibuat ibana si Herodias istri ni abangna gabe istrina. Tikki didok si Johannes na so dioloi si Herodes Patik ni Jahowa, gabe dipenjarahon si Herodes ma ibana. Alai molo si Herodias, lomo rohana asa dipamate si Johannes.
Tikki di penjara si Johannes, lomo do rohana asa dipatogu. Jadi disuru ma akka siseanna manukkun tu Jesus, “Ho do na lao ro i, manang paimaonnami dope na asing?” Disuru Jesus ma nasida paboahon on tu si Johannes, ‘Na mapitung boi marnida, . . . na nengel marbinege, jala na mate dipangolu.’ Nang pe sahalak panurirang si Johannes songon si Elia, alai dang dilehon Jahowa tu ibana huaso lao mambahen mukjizat. Jadi tikki dibege si Johannes taringot akka mukjizat na dibahen Jesus, pasti dipatogu do rohana. Gabe pos ma rohana, nungnga marhasil ibana mangurupi akka halak asa mangihutton Jesus.
Alai dang leleng dukkon i, dapot ni si Herodias ma cara lao pamatehon si Johannes. Di sada tikki, dibahen si Herodes ma pesta jala menari ma boru ni si Herodias di pesta i. Ala las hian roha ni si Herodes, didok ibana ma boi do dipangido anak boru i manang aha pe lomo ni rohana. Alani i, dijujui si Herodias ma boruna i asa mangido ulu ni si Johannes Pandidi. Sasittongna, dang olo si Herodes pamatehon si Johannes. Alai dang tarjua ibana pangidoan ni anak boru i. Ujungna, gabe dipamate ma si Johannes. Nang pe songon i, toktong do barani ibana sahat tu ujung ni ngoluna.
Taringot si Johannes, didok Jesus do, “Hudok ma tu hamu, sian sude jolma na hea ditubuhon sahalak borua, dang adong na umbalga sian si Johannes.” Holan tu si Johannes do dilehon Jahowa tugas lao “jou-jou” di padang belantara jala paradehon dalan tu haroro ni Messias. Dang hea adong halak na mandapot tugas on, bahkan akka panurirang songon si Musa manang si Elia pe dang hea. Jala sahat tu saonari, gabe teladan do si Johannes alani habaranionna.
Jaha ma ceritana di:
Na lao dibahas:
Boha do cara ni si Johannes Pandidi patuduhon habaranion?
Bagas ma Parsiajari
1. Aha do buktina na adong hubungan keluarga ni si Johannes Pandidi dohot Jesus? (w10 1/9 15 ¶4-6-wcgr)
2. Si Flavius Yosefus, i ma sahalak sejarawan na sajaman dohot akka apostel ni Jesus. Aha do na didokkon ibana na patuduhon, na tutu do hea mangolu si Johannes Pandidi? (mrt artikel 14) A
Gambar A: Hepeng logam na dibahen si Herodes Antipas taon 30 M Di hepeng i adong dibahen: “Si Herodes Pamimpin ni Saparopat Wilayah”
3. Aha do maksudna huaso ni si Johannes Pandidi “songon huaso ni si Elia”? (Luk. 1:17; it “Huaso” ¶60-wcgr) B
Gambar B
4. Sian dia do taboto, dang na lao dipahehe tu surgo si Johannes Pandidi? (Mat. 11:11; ijwbq artikel 178 ¶4)
Pikkirhon ma Aha Parsiajaranna
Nang pe dilehon tu si Johannes tugas lao paradehon dalan tu haroro ni Messias songon naung disurirakkon, alai toktong do serep rohana. (Joh. 1:26, 27) Aha do na boi tatiru sian ibana?
Sederhana do ngolu ni si Johannes, jala fokus do ibana lao mangulahon lomo ni roha ni Jahowa. (Mat. 3:4) Aha do na boi mangurupi hita asa sederhana ngolutta? C
Gambar C
Songon dia do caramuna maniru habaranion ni si Johannes Pandidi?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Aha do na lao husukkun annon tu si Johannes Pandidi molo nungnga dipahehe ibana?
Ida ma Muse on
Ida ma boasa boi si Johannes Pandidi toktong marlas ni roha jala sabar, nang pe godang tantangan na dihadapi ibana.
“Si Johannes Pandidi —Sitiruon Taringot Tongtong Marlas ni Roha” (w19.08 29-31)
Songon dia do teladan ni si Johannes boi mangurupi hita asa toktong setia nang pe dianiaya, susa di parhepengon, jala kecewa?