“Tinggal di Jalanan do Au”

NGOLUKKU NA UJU I

Adong do piga-piga halak jolo dung leleng pe asa marsiajar sian pengalaman ni nasida na so denggan. Au pe songon i do. Tubu jala magodang di Barcelona do au. On ma kota terbesar nomor dua di Spanyol. Tinggal di Somorrostro do keluargakku. Daerah pantai do godangan wilayah on. Terkenal do kota on ala massai godang halak na jahat dohot halak na mamakke narkoba.

Sian sia halak hami na marhaha maranggi, au ma siakkangan. Pogos hian do keluarganami. Tikki marumur sappulu taon au, disuru Bapak do au karejo di sada klub tenis lao papunguhon akka bola. Saleleng sappulu jom ma au karejo di bagasan sadari. Gabe dang boi au marsikkola songon dakdanak na asing. Tikki marumur 14 taon, karejo ma au di pabrik logam.

Di taon 1975, disuru do au asa dohot tu wajib militer di Spanyol. Lomo rohakku mangulahon ulaon na menantang. Alani i dohot ma au tu Legiun Asing Spanyol di Melilla, sada wilayah di Afrika Utara. Godangan halak Spanyol do na tinggal disi. Di tikki i, mulai ma au minum-minum jala mamakke narkoba.

Dung kaluar sian Legiun, mulak ma au tu Barcelona jala hubahen ma sada geng. Ditakko hami do manang aha pe. Dung i, digadis hami ma akka na ditakko hami i asa dapotnami hepeng lao manuhor narkoba. Mulai ma au mamakke narkoba jenis LSD dohot amfetamin. Mangulahon seks na so patut do au, minum-minum jala marjuji. Ala dang suman pangalahokku, gabe halak na kejam do au. Sai huboan do piso, kapak, manang parang. Dang mabiar au mamakke i.

Di sada tikki, hea ma hami dikejar polisi ala manakko sada mobil. Songon na di film-film i ma situasina. Dilarihon hami ma mobil i sappe 30 kilometer ma daona. Ditembaki polisi ma mobil i. Tabrakan ma mobil i, gabe lari ma hami sude. Tikki diboto Bapakku na masa i, diusir ma au sian jabu.

Saleleng lima taon, tinggal di jalanan do au, di bagasan truk, di kursi taman, dohot kuburan. Bahkan hea do au tinggal di gua. Dang adong tujuan ni ngolukku, jala huhilala dang adong bedana mangolu au manang mate. Huingot dope, tikki mamakke narkoba au, hea do huseat pergelangan ni tanganku dohot lenganku. Adong dope bekas ni lukana i sahat tu saonari.

SONGON DIA BIBEL MAMBAHEN MUBA NGOLUKKU

Tikki marumur 28 taon au, dilului Omak do au jala dipangido asa mulak tu jabu. Huoloi do hata ni Omak i jala marjanji au naeng muba. Alai dang pittor boi au muba.

Sada tikki, adong ma dua halak Saksi Jahowa na manuktuk jabunami. Tikki makkatai au dohot nasida, gogo ma soara ni Bapakku sian jabu mandok tu au asa huusir nasida. Dang lomo rohakku diatur-atur, jadi dang huulahon na didokna i. Dilehon dua Saksi i do tu au tolu bukku na gelleng. Husukkun ma didia inganan ni nasida beribadat. Piga-piga ari dukkon i, ro ma au tu Bale Harajaon.

Dung sahat au disi, na parjolo huida i ma pakkean ni nasida na rapi jala ias. Imbar hian do i tu penampilanku. Molo au, ganjang do obukku, dang rapi jenggothu, jala bajukku pe dang rapi. Gabe didok rohakku ma dang pantas au masuk tusi, jadi dang olo au masuk. Alai tarsonggot do au tikki huida adong donganku hian tikki di geng na margoar si Juan, rapi pakkeanna. Gabe huboto ma nungnga Saksi Jahowa hape ibana sataon naung salpu. Ala huida ibana, gabe olo ma au masuk tu Bale Harajaon jala dohot manangihon acarana. Mulai sian i, muba ma ngolukku.

Ujungna olo ma au marsiajar Bibel. Gabe huboto ma ikkon muba do au asa boi mambahen las roha ni Debata. Memang dang mura i, alana ikkon ‘muba do au marhite paubahon pikkiranku’. (Rom 12:2) Alai hona do tu rohakku tikki hurimangi asi ni roha ni Debata. Nang pe godang kesalahan na hubahen, alai dilehon Debata do kesempatan tu au asa muba. Akka na huparsiajari taringot Jahowa, bagas do i tarsuan di rohakku. Gabe huboto ma holong do roha ni Debata Sitoppa saluhutna tu au.—1 Petrus 5:6, 7.

Gabe bertekad do au mambahen godang perubahan di ngolukku. Misalna, tikki huboto aha na didok Bibel taringot marisap, didok rohakku ma, ‘Molo dipangido Jahowa ikkon ias au di saluhutna, berarti ikkon so do au marisap!’ (2 Korint 7:1) Mulai sian i, hubolokkon ma sude sigarettu!

Asing ni i, ikkon hupaso do mamakke dohot manggadis narkoba. Porlu do tikki dohot upaya lao mangulahon on. Huboto do asa boi au muba, dang boi be au bergaul dohot akka donganku na saleleng on. Alana molo torus au bergaul dohot nasida, dang boi au muba. Jadi, hupangido ma bantuan sian Jahowa dohot sian akka donganku na baru na adong di huria. Parduli do nasida tu au jala dihaholongi. Dang hea dope huhilala holong sisongon on. Ujungna dung marbulan-bulan, boi ma au so mamakke narkoba. Boi ma hupakke “pangalaho na imbaru” jala mambahen las roha ni Debata. (Epesus 4:24) Di bulan Agustus 1985, tardidi do au gabe Saksi Jahowa.

MANFAAT NA HUDAPOT

Dung marsiajar Bibel au, gabe lam denggan ma ngolukku. Dang huihutton be gaya hidup na boi mambahen au mate jala na mambahen dang adong harga dirikku. Adong lobi sian 30 halak donganku na mate tikki poso dope umurna. Marsahit AIDS do nasida manang sahit na asing ala mamakke narkoba. Mandok mauliate do au ala dang sappe huhilala songon i ala nungnga huihutton prinsip ni Bibel.

Najolo halak na kejam do au jala sai huboan do piso manang kapak manang tudia pe au lao. Alai saonari, Bibel do na huboan, jala i ma na hupakke lao mangurupi halak na asing. Gabe parbarita na uli sepenuh waktu do au dohot istrikku.

Memang dang gabe Saksi Jahowa natua-tuakku. Alai las do roha ni nasida ala muba au dung marsiajar Bibel. Bahkan, dibela Bapak do Saksi Jahowa di jolo ni akka dongan sakarejona. Diboto ibana do, gabe lam denggan do ngolukku dung marsiajar Bibel au dohot Saksi Jahowa. Jala Omak pe jotjot do didok tu au, seharusna sian najolo ma nian au marsiajar Bibel. Setuju do au tu hatana i.

Sian pengalamanku gabe huboto ma, dang boi las rohatta molo mamakke narkoba manang mangulahon kebiasaan buruk na asing. Saonari, las situtu do rohakku ala boi huurupi halak na asing mamboto ajaran ni Bibel, i ma ajaran naung mambahen muba ngolukku.