Songon dia do Cara ni Natua-tua Mangajari Ianakkonna Taringot Seks?
Na didok Bibel
Ise do na ikkon mangajari dakdanak taringot seks? Didok di Bibel tanggung jawab ni natua-tua do mangajari ianakkonna, jala adong do piga-piga saran na mangihut na boi mangurupi natua-tua:
Unang maila. Takkas do dipaboa di Bibel taringot seks dohot alat kelamin, jala didok Debata do tu bangso Israel asa diajari nasida “dakdanak” taringot i. (5 Musa 31:12; 3 Musa 15:2, 16-19) Pakke ma bahasa na sopan tikki patorakkon taringot seks dohot alat kelamin.
Ajari ma sian na gelleng. Daripada dung pubertas gellengmuna baru pe dipatorang hamu sude taringot seks tu nasida, tumagon ma sian na gelleng diajari hamu nasida mamakke hatorangan na boi diattusi di tikki i.—1 Korint 13:11.
Ajarhon ma tu nasida standar moral na sian Bibel. Memang di piga-piga sikkola diajari do taringot seks tu akka muridna. Alai, dijujui Bibel do akka natua-tua asa mangajari ianakkonna taringot seks. Dang holan taringot organ seksual, alai porlu do diajari nasida cara pandang na sittong taringot seks.—Poda 5:1-23.
Denggan ma tangihon ianakkonmuna. Molo disukkun ianakkonmuna tu hamu taringot seks, unang ma pittor muruk jala langsung mamodai ibana. Alai, ‘hatop ma hamu manangihon, jala manat makkatai’.—Jakobus 1:19.
Songon dia carana melindungi ianakkonmuna sian pelaku pelecehan seksual?
Ajari ma ianakkonmuna molo adong halak na naeng mangulahon pelecehan tu ibana
Lului ma akka informasi. Riset ma taringot akka cara na biasana dipakke akka halak na mangulahon pelecehan seksual.—Poda 18:15; ida ma pasal 32 bukku Pertanyaan Kaum Muda—Jawaban yang Praktis, Jilid 1.
Ikkon parsidohot do hamu mangurus ianakkonmuna. Molo dihaporluhon pangurupion lao manjaga ianakkonmuna, pastihon ma sasahalak i boi dihaporseai hamu. Jala unang ma paloas ianakkonmuna “mambahen lomo-lomona”.—Poda 29:15.
Takkas ma paboa lapatan ni “mangoloi” natua-tua. Ikkon dioloi dakdanak do natua-tuana. (Kolosse 3:20) Alai, ikkon diajari hamu do ianakkonmuna asa unang mangoloi sude halak naung dewasa. Alana boi do i mambahen nasida gabe korban pelecehan. Boi do didok akka natua-tua tu ianakkonna songon on, “Molo adong na manuru ho mangulahon ulaon na maralo tu hata ni Debata, unang oloi da.”—Ulaon ni Apostel 5:29.
Latik ma ianakkonmuna asa boi melindungi diri. Urupi ma ianakkonmuna lao melindungi diri molo adong halak na naeng mangulahon na jahat tikki dang rap hamu dohot nasida. Bahen ma peragaan jala marlatik ma hamu raphon ianakkonmuna asa barani ibana mandok, “Unang! Sotung hupaboa ho annon tu natua-tuakku!” jala ikkon lao do sian i. Ikkon mulak-ulak do diajari hamu ianakkonmuna alana mura-mura do nasida lupa.—5 Musa 6:7.