Bantuan tu Akka Halak na Mapitung
Di liat portibi on, adong hira-hira 43 juta halak na mapitung jala adong hira-hira 295 juta halak na rambonon.a Alai godang do halak na so parduli tu nasida, bahkan olo mambahen na so adil tu nasida.
Boha do perasaan ni Debata mangida halak na mapitung? Aha do na didok Bibel taringot halak na mapitung? Jala boha do cara ni Saksi Jahowa mangurupi nasida?
Boha do perasaan ni Debata mangida halak na mapitung
Molo tajaha akka ayat ni Bibel, gabe boi ma taboto parduli do Jahowab tu halak na mapitung. Lomo do rohana asa dibahen na adil tu nasida jala dapot ni nasida parbinotoan taringot Ibana. Dilehon Ibana do muse harapan na luar biasa tu akka halak na mapitung.
Ayat: “Hona bura ma halak na mambahen lilu halak na mapitung di dalan.”—5 Musa 27:18.
Lapatanna: Dilehon Debata do Patik tu halak Israel najolo asa unang direhe-rehei nasida halak na mapitung.
Ayat: ‘Dang marimbar jolma di jolo ni Debata’.—Ulaon ni Apostel 10:34.
Lapatanna: Diargai Debata do halak na mapitung songon halak na marnida.
Ayat: “Dibahen [Jesus] do muse halak na mapitung gabe marnida.”—Lukas 7:21.
Lapatanna: Tikki di tano on, dipamalum Jesus do piga-piga halak na mapitung. On patuduhon songon i ma na lao diulahon Harajaon ni Debata di ari na naeng ro.
Ayat: “Marnida ma mata ni halak na mapitung.”—Jesaya 35:5.
Lapatanna: Marjanji do Jahowa na lao marnida ma halak na mapitung dung mamaretta Harajaon ni Debata tu tano on.
Boha do cara ni Saksi Jahowa mangurupi nasida
Berupaya do Saksi Jahowa di liat portibi on paboahon janji ni Debata tu akka halak na mapitung. Songon dia ma caranami mangulahon i?
Dibahen hami do Bibel, akka publikasi, dohot akka video na boi dipakke halak na mapitung dohot na rambonon. Misalna mamakke huruf braille, cetakan na balga, dohot audio.
Ganup minggu dibahen hami do acara parpunguan. Sude do halak boi ro tu acara i, termasuk halak na mapitung.
Ditawarhon hami do parsiajaran Bibel tu ganup halak jala adong do annon sasahalak na mangurupi hamu.c
Gratis do sudena on. Alana didok Jesus, “Ala dang margarar dijalo hamu sudena i, lehon hamu ma i dang margarar.”—Mateus 10:8.
Parduli do Saksi Jahowa tu akka halak na mapitung. Molo lomo rohamuna manomba Debata rap dohot hami, dapotmuna ma annon akka dongan na burju jala na rade mangurupi hamu. Ida hamu ma pengalaman piga-piga Saksi Jahowa na mapitung on.
Si Talita Alnashi tinggal di Swedia. Nungnga rambonon ibana mulai sian na tubu. Parrohahon ma songon dia natua-tuana mangurupi ibana marsiajar Bibel. Jala songon dia akka donganna patuduhon haburjuon tu ibana dohot tu halak i na sakeluarga.
Si James Ryan tinggal di Amerika Serikat. Tuli do ibana mulai sian na tubu. Jala dang leleng dukkon i gabe mapitung do ibana muse. Parrohahon ma aha do na mambahen ibana marlas ni roha nang pe songon i keadaanna.
Si Cynthia Pablo tinggal di Filipina. Tuli jala mapitung do ibana. Aha do na diulahon akka dongan sahaporseaonna lao mangurupi ibana saleleng pandemi COVID-19? Jaha ma artikel “Dukungan Sidang Selama Pandemi untuk Seorang Saudari yang Buta Tuli.”
Akka alat bantu marsiajar Bibel aha do na diparade hami?
Publikasi na mamakke huruf braille. Dibahen hami do Bibel na mamakke huruf braille di piga-piga bahasa, lengkap manang sebagian. (Asa diboto hamu akka bahasa i, ida ma kotak “Bibel Terjemahan Tano na Imbaru na mamakke huruf braille”.) Dibahen hami do muse akka publikasi na mamakke huruf braille. Molo lomo roha ni halak na mapitung marsiajar manjaha huruf braille, boi do dipakke nasida buku Belajar Membaca Huruf Braille na diparade hami. Halak na mangida ma annon na mangurupi ibana mamakke bukku i.
Boi do dipangido hamu tu sahalak Saksi Jahowa akka publikasi na mamakke huruf braille manang pangido ma asa dikunjungi hamu.
Download ma dokumen sian jw.org na boi dijaha mamakke notetaker.d
Akka publikasi cetakan na balga dohot akka publikasi elektronik na boi dipabalga hurufna. Godang do publikasi cetakan na balga na diparade tu akka halak na rambonon. Halaman situs webnami, i ma jw.org boi do tong dipabalga ukkuranna. Jala akka publikasi na adong di JW Library pe boi do dipabalga ukkuran ni hurufna.
Asa boi dapotmuna publikasi cetakan na balga, pangido ma tu sahalak Saksi Jahowa manang pangido ma asa dikunjungi hamu.
Download ma publikasi cetakan na balga sian jw.org, sarupa do bentukna songon publikasi na tercetak.
Audio ni akka publikasi. Dibahen hami do rekaman pembacaan ni Bibel Terjemahan Tano na Imbaru lobi sian 200 bahasa. Jala dibahen hami do muse rekaman akka publikasinami. Adong do tong keterangan gambar di rekaman ni akka publikasi i.
Putar manang download ma akka rekaman on di situs jw.org dohot di aplikasi JW Library.
Download ma dokumen sian jw.org na boi dijaha mesin pembaca, songon pembaca layar dohot pemutar buku digital.e
Akka video na mamakke audio deskripsi.f Dibahen Saksi Jahowa do akka video sian cerita na adong di Bibel na mamakke audio deskripsi di lobi sian 100 bahasa. Boi do akka video i mangurupi akka halak asa mangattusi jala mangulahon akka poda na adong di Bibel.
On ma piga-piga seri video na mamakke audio deskripsi:
Parpunguan dohot acara na asing. Ganup minggu, dibahen hami do acara parpunguan di akka huria di liat portibi on. Disi ma hami mamparsiajari Bibel jala manomba Debata. Ganup taon dibahen hami do muse acara parpunguan na umbalga lao mamparsiajari Bibel. Diputar do akka video di acara i. Jala lao dibahen hami do audio deskripsi ni akka video na diputar di acara i. Di acara parpunguan dohot acara na asing, berupaya do hami mangurupi halak na mapitung sekaligus tuli mamakke bahasa isyarat sentuhan tangan (taktil). Sude do halak boi ro tu akka acara i.
Lului ma alamat inganan ni parpunguannami.
Lului ma informasi taringot acara parpunguan regionalnami.
Ro ma hamu tu acara Parningotan Ari Hamamate ni Jesus, on ma acara na uppetting di hami ganup taon.
Si José Luis Ayala tinggal di Meksiko. Nungnga tuli ibana mulai sian na tubu jala dung marumur 29 taon gabe mapitung ma muse ibana. Parrohahon ma sadia rikkot do acara parpunguan di ibana jala boasa boi malo ibana mangajari akka halak taringot Bibel.
a Halak na “rambonon” na didok di artikel on, i ma halak na so takkas be mangida nang pe markacamata jala i mambahen maol ibana mangulahon ulaonna siganup ari. Hata “mapitung” na di artikel on lapatanna halak na so boi be mangida.
b Goar ni Debata do Jahowa. (Psalmen 83:18) Jaha ma artikel “Ise do Jahowa i?”
c Boi do dipangido hamu asa dipatudu cara marsiajar Bibel. Gratis do i.
d Notetaker, i ma perangkat elektronik portable na boi diketik mamakke huruf braille. Adong do tong notetaker na boi marsoara manjahahon teks braille i. Tikki manjahahon teks, boi do mullop lonong sandiri huruf braille na adong di notetaker i asa boi didadap halak na mapitung. Ala adong notetaker on, dang porlu be godang teks tercetak na mamakke huruf braille.
e Pembaca layar dohot pemutar buku digital boi do marsoara manjahahon publikasi. Molo pembaca layar, sian komputer do kaluar soarana. Alai molo pemutar buku digital, sian speaker ni alat i do kaluar soarana. Boi do alat na dua on mangurupi halak na mapitung mangalului bagian tertentu sian publikasi na naeng dijaha ibana.
f Audio deskripsi, i ma penjelasan tambahan taringot na masa di sada video.