Marlas ni Roha ma Nang pe Sogo Roha ni Halak tu Hamu

1. Aha do na didok Jesus, jala boasa tarsonggot akka siseanna mambege i?

TIKKI pasahatton Jamita di Dolok, didok Jesus, “Marlas ni roha ma hamu molo sogo roha ni halak tu hamu.” (Luk. 6:22) Pasti tarsonggot do akka siseanna mambege hatana i. Dang lomo rohatta molo adong na marsogo ni roha tu hita. Jadi, boasa didok Jesus songon i? I ma na lao tabahas. Saonari, godang do halak na marsogo ni roha tu hita. Tabahas ma annon boasa sogo roha ni halak tu hita, jala boasa boi toktong marlas ni roha hita tikki masa i.

BOASA SOGO ROHA NI HALAK TU HITA?

2-3. (a) Boasa sogo roha ni akka halak tu naposo ni Debata? (b) Aha do manfaatna di hita dung taboto taringot on? (Johannes 16:​2, 3)

² Ala tasomba Jahowa. Memang, adong do akka halak na menganiaya bahkan mambunu akka sisean ni Jesus. Boasa dibahen nasida songon i? Didok Jesus, “Ala na so ditanda nasida do Damang i dohot au.” (Jaha Johannes 16:​2, 3.) Alai, boasa sogo roha ni nasida tu naposo ni Debata? Ala dipengaruhi Sibolis do nasida. Ibana do “debata ni portibi on”. (2 Kor. 4:​3, 4) Berupaya do ibana asa unang diboto akka halak taringot Jahowa. Jala dipengaruhi ibana do nasida asa marsogo ni roha tu hita. (Joh. 8:​42-44) Boha do perasaanta dung mamboto taringot on? Gabe dang marsogo ni roha hita tu halak na menganiaya hita. Alana taboto, Sibolis do na mempengaruhi nasida.

³ Taida ma pengalaman ni si Pavel,a na tinggal di negara na mangorai ulaonta. Ala toktong setia manomba Jahowa, gabe ditakkup ma ibana, dipukkuli, jala dipenjarahon di sel isolasi saleleng marbulan-bulan. Didok si Pavel, “Saonari takkas ma huboto, Sibolis dohot suru-suruan na jahat do na mempengaruhi akka halak asa menganiaya hita. Sasittongna, godangan halak na karejo di penjara dang marsogo ni roha tu hita. Holan mandalatton tugasna do nasida.” Adong do muse donganta bawa di Kroasia, na dianiaya natua-tuana na so Saksi Jahowa. Didok ibana, “Huboto ma, Sibolis do musukku, dang natua-tuakku.”—Eps. 6:12.

4. Aha do na taparsiajari sian Jesus dohot si Stepanus? (Ida gambar.)

⁴ Marsiajar ma hita sian Jesus dohot si Stepanus. Tikki naeng digattung akka tentara ni Rom Jesus, martangiang do ibana tu Jahowa. Didok ibana, “Ale Amang, sesa ma dosa ni nasida.” (Luk. 23:34) Dipangido Jesus do asa diampuni Jahowa akka tentara na disuru lao mambunu ibana. Jala olo do ra ditangiakkon ibana akka halak na manjujui asa dihukum mate ibana. Diboto Jesus, dibahen nasida pe songon i ala dipengaruhi pamimpin agama do nasida. Jala dang diboto nasida na dibahen nasida i. Dos songon i ma tong si Stepanus. Dipangido ibana do asa diampuni Debata akka halak na mambunu ibana. (Ul. 7:​58-60) Dialusi Jahowa do tangiang ni Jesus dohot si Stepanus? Ido. Buktina, godang do halak na terlibat di parmate ni Jesus na gabe muba, porsea tu Jesus, jala tardidi. (Ul. 2:​36-41) Asing ni i, adong do sasahalak na terlibat di parmate ni si Stepanus ujungna gabe halak Kristen, i ma si Saulus sian Tarsus. Disolsoli ibana do pambahenanna. (1 Tim. 1:13) Jadi, unang ma sogo rohatta tu halak na menganiaya hita. Gariada, tatangiakkon ma nasida.—Mat. 5:44.

5. Aha do na taparsiajari sian pengalaman ni si César?

⁵ Saonari pe molo tatangiakkon akka halak na menganiaya hita, dialusi Jahowa do i. I ma na dihilala si César, na tinggal di Venezuela. Kasar do bapakna, jala dang lomo roha ni bapakna tu hasittongan. Didok si César, “Molo omakku, burju hian do ibana. Sai diutamahon do Harajaon ni Debata. Alai, disarihon ibana do tong bapakku. Diajari omak do hami asa sangap dibahen hami tu bapaknami. Jala diajari do hami asa unduk tu bapak, saleleng dang maralo i tu lomo ni roha ni Jahowa.” Dukkon martaon-taon, gabe muba ma bapakna. Didok si César muse, “Sada tikki, dung martangiang au tu Jahowa, hutogihon ma bapak asa marsiajar Bibel dohot au. Didok bapak ma, olo do ibana marsiajar. Tikki i, dang tarhatahon songon dia las ni rohakku.” Ujungna, tardidi do bapak ni si César. Memang, dang sai songon i akka halak na menganiaya hita. Alai, adong do piga-piga halak na gabe muba dung diida nasida pangalaho dohot hatatta na denggan. Pasti las hian do rohatta molo muba nasida. Kagum do hita mangida cara ni Jahowa, “Hakim ni saluhut tano on”, manarik akka halak sisongon i tu Ibana.—1 Mus. 18:25.

6. Songon na dipaboa di Markus 13:​13, aha do muse na mambahen sogo roha ni akka halak tu hita?

⁶ Ala tadukung Jesus. Didok Jesus, gabe sogo do roha ni sude jolma tu akka siseanna “alani [goarna]”. (Jaha Markus 13:13.) “Goar” ni Jesus na dimaksud dison, i ma reputasina dohot hakna lao mamaretta gabe Raja di Harajaon ni Debata. Jadi sogo roha ni akka halak tu hita, alana lomo roha ni nasida asa tadukung pamarettaon ni jolma. Hape Jesus Kristus do na tadukung. Nungnga dipillit Jahowa ibana lao mamaretta hita. Nungnga mamaretta be Jesus di Harajaon ni Debata mulai taon 1914. Satokkin nai, ripassononna ma sude pamarettaon ni jolma.

7-8. Boasa direhe-rehei akka halak naposo ni Jahowa? (Johannes 15:​18-20) (Ida gambar.)

⁷ Ala dang sarupa hita songon akka halak di portibi na dirajai Sibolis. Didok Jesus, gabe sogo ma roha ni sude halak tu akka siseanna ala “dang sian portibi on [nasida]”. (Jaha Johannes 15:​18-20.) Songon halak Kristen di abad na parjolo, dang olo hita mangihutton cara marpikkir, cara makkatai, dohot pangalaho ni akka halak di portibi on. Alani i, godang do donganta na direhe-rehei di inganan ni nasida karejo manang di sikkola. (1 Ptr. 4:​3, 4) Alai las do rohatta, ala adong do halak na menganiaya hita na gabe muba jala diargai nasida haporseaotta.

⁸ Taida ma pengalaman ni donganta bawa na margoar si Ignacio di Amerika Tengah. Ala diihutton ibana aturan ni Jahowa, gabe direhe-rehei guruna ma ibana saleleng martaon-taon. Alai andorang so tamat sikkola si Ignacio, disukkun guruna ma ibana. Didok guruna, boasa olo si Ignacio toktong mangulahon lomo ni roha ni Debata. Hape gabe sogo do roha ni akka halak ala diulahon ibana songon i. Dipatorang si Ignacio ma tu guruna, aturan sian Debata boi mangalinggomi dirina. Dukkon i, diundang ibana ma guruna asa ro marpungu. Hape ro ma guruna i marpungu. Gabe tarsonggot ma si Ignacio. Kagum do guruna i mangida holong na dipatudu akka dongan di huria. Alani i, torus ma ibana ro marpungu. Dukkon i, marsiajar Bibel do ibana. Nang pe adong tantangan, toktong do dibahen ibana kemajuan jala ujungna tardidi do guruna i.

9-10. (a) Aha do muse na mambahen dang sarupa hita tu akka halak na di portibi on? (b) Aha do na taparsiajari sian Apostel Paulus?

⁹ Asing ni i, dang olo hita terlibat di ulaon politik dohot porang. (Joh. 18:36) Memang songon na didok di Rom 13:​1, ikkon unduk do hita tu pamaretta. Alai toktong do hita netral di ulaon politik. Alani i, dang olo hita mandaftarhon diri gabe pejabat manang mamillit akka na lao gabe pamaretta. Boasa? Alana setia do hita tu Jahowa, jala tadukung do Jesus Kristus naung dipillit gabe Raja di Harajaonna. Alani i ma godang do Saksi Jahowa na dipenjara alani haporseaon ni nasida. Nang pe dipenjara, toktong do marbarita akka donganta i. Ditiru nasida do Apostel Paulus na hea gabe tahanan rumah jala dipenjara saleleng martaon-taon. (Ul. 24:27; 28:​16, 30) Toktong do ibana marbarita tu akka halak na olo manangihon. Misalna, akka panjaga ni penjara, akka pejabat, gubernur, raja, jala dohot do ra akka pejabat ni Kesar Nero.—Ul. 9:15.

¹⁰ Dos songon i ma akka donganta na dipenjara. Toktong do nasida marbarita tu halak na olo manangihon. Misalna, akka hakim, pejabat, dohot panjaga ni penjara. Adong ma donganta bawa na dipenjarahon lobi sian onom taon ala netral ibana di ulaon politik. Saleleng dipenjara ibana, dang dianggap ibana i gabe sada hukuman. Alai dianggap ibana do i kesempatan sian Jahowa asa boi marbarita tu halak na marserep ni roha. Las do rohatta ala dipakke Jahowa hita pasahatton barita na uli tu akka halak sisongon i. (Kol. 4:3) Saonari, tabahas ma muse alasan na asing boasa boi toktong marlas ni roha hita nang pe sogo roha ni halak mangida hita.

BOASA BOI TOKTONG LAS ROHATTA TIKKI DIANIAYA?

11. Boasa boi tadok gabe lam togu haporseaotta tikki dianiaya hita? Bahen ma contoh.

¹¹ Molo adong na marsogo ni roha tu hita, na manggohi surirang ni Bibel do i. Di Bibel, dipaboa Jahowa do surirang na parjolo. Didok Jahowa, na lao marmusu do Sibolis dohot akka na mangihutton ibana tu sisomba Jahowa. (1 Mus. 3:15) Jala nungnga dipaboa Jesus hian na lao sogo do roha ni halak tu naposo ni Jahowa. Dipaboa do taringot on di opat Injil. (Mat. 10:22; Mrk. 13:​9-12; Luk. 6:​22, 23; Joh. 15:20) Asing ni i, dipaboa akka panurat ni Bibel do tong taringot on. (2 Tim. 3:12; Jak. 1:2; 1 Ptr. 4:​12-14; Jud. 3, 17-19) Jadi tikki dianiaya hita, dang tarsonggot be hita. Gariada, las do rohatta ala taboto nungnga digohi be surirang ni Bibel. On paposson rohatta, Debata na sittong do na tasomba. I ma na dihilala donganta borua na tinggal di negara na mangorai ulaonta. Didok ibana, “Tikki hulehon dirikku lao melayani Jahowa, huboto do pasti adong tantangan. Jadi tikki ro tantangan i, dang tarsonggot be au manang mabiar.” Suami ni donganta i do sada sian akka halak na menganiaya ibana. Kasar do suamina, bahkan sappe ditutung do Bibel dohot publikasina. Alai, dang gabe mabiar donganta i. Gariada, lam togu do haporseaonna. (Heb. 10:39) Didok ibana, “Nungnga dipaboa hian, pasti dianiaya do hita. Jadi huboto do na ikkon terjadi i. Tikki huadopi penganiayaan i, gabe lam pos ma rohakku agama na sittong do na hupillit on.”

12. Aha do na mangurupi sahalak donganta asa martahan mangadopi penganiayaan?

¹² Memang, taboto do na ikkon dianiaya hita. Alai, dang sai mura mangadopi i. I ma na dihilala sahalak donganta bawa na dipenjara. Didok ibana, “Sipata, marsak hian do au jala holan na tangis do au.” Aha do na mangurupi donganta on asa martahan? Didok ibana, “Sai martangiang do au tiap pagi. Jala molo adong situasi na maol, pittor martangiang do au muse. Asing ni i, molo adong na mambahen au muruk, pittor masuk ma au tu kamar mandi jala martangiang ma au muse.” Dirimangi donganta i do tong akka sitiruon na disurat di Bibel dohot di tikkitta saonari. Gabe boi ma ibana martahan mangadopi penganiayaan i. Jala dame ma rohana songon na dijanjihon Jesus tu akka siseanna.—Joh. 14:27; 16:33.

13. Aha do na mangurupi hita asa boi martahan mangadopi penganiayaan?

¹³ Holongta tu Jahowa dohot tu halak na asing mangurupi hita asa martahan. Toktong do holong roha ni Jesus tu Jahowa sian nasa rohana. Jala holong do tong rohana tu akka donganna. (Joh. 13:1; 15:13) Alani i, tatiru ma ibana. Tahaholongi ma Jahowa dohot akka donganta. Molo taulahon i, boi ma hita martahan mangadopi penganiayaan. Boasa tadok songon i? Tabahas ma sitiruon sian Apostel Paulus.

14. Nang pe lao dihukum mate si Paulus, aha do na mangurupi ibana asa toktong setia tu Jahowa?

¹⁴ Andorang so dihukum mate si Paulus, dibahen ibana ma surat tu donganna si Timoteus. Didok ibana, “Tondi parbadia na dilehon Debata tu hita dang mambahen hita mabiar. Alai dibahen do hita gabe margogo, marholong ni roha.” (2 Tim. 1:7) Aha do na dimaksud si Paulus disi? Didok si Paulus molo togu holongta tu Jahowa, pasti boi do taadopi situasi na borat. (2 Tim. 1:8) Pasti ala togu do holong ni si Paulus tu Jahowa umbahen na boi ibana toktong setia jala barani, nang pe lao dipamate ibana.—Ul. 20:​22-24.

15. Di tikkitta saonari, songon dia do akka donganta patuduhon na marsihaholongan nasida? (Ida gambar.)

¹⁵ Holong situtu do rohatta tu akka dongan na setia mangadopi penganiayaan. Jala godang do tong akka dongan na patuduhon holong sisongon i nang pe gabe dianiaya nasida. Sarupa ma i songon si Akuila dohot si Priskila na rade mangalehon ngoluna lao mangurupi si Paulus. (Rom 16:​3, 4) Misalna di Rusia, godang do donganta na ro tu pengadilan lao patoguhon roha ni akka dongan na ditakkup. Tikki adong sahalak donganta borua na ditakkup, godang do ro donganta tu pengadilan lao patoguhon rohana. Tikki diida ibana nasida, gabe dipatogu do rohana. Bahkan dang tarhatahon songon dia las ni rohana. Holong na dipatudu akka donganta i mangurupi ibana asa boi martahan. Jadi, las hian do rohatta ala toktong marsihaholongan nang pe godang na marsogo ni roha tu hita.

16. Boasa didok Apostel Petrus boi hita toktong marlas ni roha tikki dianiaya? (1 Petrus 4:14)

¹⁶ Las do roha ni Debata molo martahan hita mangadopi penganiayaan. (Jaha 1 Petrus 4:14.) Didok Apostel Petrus molo dianiaya hita, boi do hita toktong marlas ni roha. Boasa? Alana on patuduhon “na adong di [hita]” tondi parbadia ni Debata. I ma na dihilala si Petrus. Boi do ibana martahan mangadopi penganiayaan. Alana diboto ibana, las do roha ni Debata mangida ibana. Dang leleng dukkon ari Pentakosta taon 33 M, ro ma akka petugas ni bagas joro manakkup si Petrus dohot akka apostel na asing. Boasa? Ala marbarita na uli nasida. Alai, barani do si Petrus mambela haporseaonna. (Ul. 5:​24-29) Bahkan dung dilissingi nasida, toktong do marbarita si Petrus dohot akka apostel na asing. Marlas ni roha do nasida, “ai didok roha ni nasida, na patut do nasida manaon na haccit alani goar ni Jesus i”. Dos songon nasida, boi do hita toktong marlas ni roha tikki taadopi penganiayaan.—Ul. 5:​40-42.

17. Di borngin andorang so mate Jesus, aha do na dipaboa ibana tu akka siseanna?

¹⁷ Di borngin andorang so mate Jesus, dipaboa ibana ma tu akka siseanna, “Manang ise na makkaholongi au, dihaholongi Damang i ma ibana. Huhaholongi ma ibana.” (Joh. 14:21) Tarpaima do hita dang adong be annon halak na marsogo ni roha mangida hita manomba Jahowa. Alana, sude do hita manomba Jahowa jala marsihaholongan! (2 Tes. 1:​6-8) Alai huhut paimahon i, pos ma rohatta boi do hita toktong marlas ni roha nang pe dianiaya.