“Silehon-lehon ni Jahowa do Akka Ianakkon”

ADONG do na hea mangalehon “silehon-lehon” na massai arga tu hamu? Ra halak na massai dihaholongi hamu do na mangalehon i. Boha do perasaanmuna tikki manjalo i? Pasti las hian do rohamuna jala denggan do i dijaga hamu.

Didok di Bibel, “Silehon-lehon ni Jahowa do akka ianakkon.” (Ps. 127:3) Pasti setuju do akka natua-tua tu na didok Bibel i. Massai arga do di nasida akka gellengna. Alani i, marsitutu do nasida manjaga gellengna. Jala berupaya do nasida mangalehon kebutuhan ni akka gellengna secara jasmani, emosi, dohot rohani.

Alai, adong do natua-tua na manganggap dang arga gellengna i. (Jes. 49:15; 2 Tim. 3:1-3) Na asing, holong do rohana tu akka gellengna. Alai alani situasi, maol do di nasida mangurus gellengna i. Akka tantangan aha do haroa na diadopi akka natua-tua? Aha do na diharappon Jahowa sian nasida? Jala aha do na ikkon diulahon nasida asa marhasil pagodang-godangkon akka gellengna?

AKKA TANTANGANNA

Tekanan sian keluarga dohot halak na asing. Di piga-piga daerah, molo godang gelleng gabe sangap do akka natua-tua. Gabe tantangan do on di akka pasangan na tinggal di daerah sisongon i. Dijujui do nasida asa godang gellengna. Hape dang sanggup nasida mangurus gellengna i.
Marsak mamikkirhon taringot ari na naeng ro. Di piga-piga daerah, godang do dakdanak na mate ala hurang gizi, godang sahit, jala otik inganan lao marubat. Alani i, piga-piga pasangan mamutusson asa godang gellengna. Tujuanna, asa adong apala sada gellengna i na toktong mangolu. Pasangan na asing godang do gellengna asa adong na mangurus nasida dung matua. Biasana, pandangan sisongon on adong di akka negara na so mangalehon bantuan tu akka naung matua.
Maol mambatasi godang ni gellengna. Di piga-piga daerah, olo do ra terbatas jenis ni alat kontrasepsi. Molo pe adong, dang pola denggan kualitasna. Alani i, gabe khawatir ma akka pasangan mamakke i. Adong do muse na so tolap manuhor i ala paargahu.a

NA DIHARAPPON JAHOWA SIAN AKKA NATUA-TUA

Sada keluarga na mardalani tu taman. Denggan do bapakna manangihon boruna marcarita. Omakna marbola dohot anakna. — Lehon ma tikkimuna tu ganup gellengmuna

Parade ma kebutuhan ni gellengmuna. Lomo do roha ni Jahowa asa kerja keras akka natua-tua paradehon sipanganon, pakkean, dohot jabu tu akka gellengna. Ikkon diparade nasida do i pinomatna sahat tu na dewasa gellengna. Dipangido Jahowa do muse asa diajar-ajari natua-tua gellengna. Alani i, unang ma dibahen nasida gellengna sikkola dao sian nasida. Ikkon rap tinggal do nasida dohot gellengna. Molo diulahon i, boi ma dilatik jala diajar-ajari nasida gellengna i. Asing ni i, porlu do dilehon nasida tikki tu gellengna i sada-sada, asa merasa aman gellengna jala dihaholongi. Alai ingot ma, dang hea dipangido Jahowa ikkon mamora akka natua-tua. Sian dia taboto? Tikki naeng dipillit Jahowa ise na lao pagodang-godangkon Jesus, dipillit Ibana do pasangan na so pola godang hepengna alai olo bekerja keras.—Mat. 13:55, 56; Luk. 2:24.

Prinsip ni Bibel: “Manang ise na so mangurus na di ibana, tarlumobi anggota keluargana, na so adong be haporseaon ni i jala nungnga unjahat ibana sian akka na so porsea.”—1 Tim. 5:8.

Diboto Jahowa do porlu akka natua-tua diurus molo nungnga matua nasida. Jala sada cara ni ianakkon pasangappon natua-tuana, i ma mangurus natua-tuana. (2 Mus. 20:12; 1 Tim. 5:4) Alai lomo do roha ni Jahowa asa fokus natua-tua tu cara ni nasida mangurus gellengna, dang fokus tu cara ni gellengna mangurus nasida haduan.—2 Kor. 12:14.

Ajari ma gellengmuna taringot Jahowa. Nungnga dilehon Jahowa tanggung jawab tu akka natua-tua asa mangurupi gellengna makkaholongi jala manomba Ibana. Alana di Jahowa, on do na uppetting na ikkon diulahon nasida.—5 Mus. 6:6, 7.

Prinsip ni Bibel: “Pagodang-godang ma [ianakkonmuna] marhite mangajar-ajari jala mamodai nasida hombar tu lomo ni roha ni Jahowa.”—Eps. 6:4.

LOMO DO ROHA NI JAHOWA ASA MARHASIL HAMU

Sapasang suami istri makkata-hatai. Adong Bibel na tarbukka di jolo ni nasida. — Hatai hian ma piga annon gellengmuna

Bahen ma rencana. Molo naeng margelleng hamu, denggan ma pikkirhon situasimuna. Misalna, sanggup do hamu pagodang-godangkon akka gellengmuna annon? Porlu do godang hepeng, tikki, dohot gogo lao mangalehon kebutuhan ni gellengmuna dohot mangajar-ajari nasida. Asing ni i, pasti lomo do rohamuna mangalehon kebutuhan ni ganup gellengmuna mangihutton cara ni Jahowa. Jadi rencanahon hian ma piga annon gellengmuna. Alai sipata, masa do na so sesuai tu rencanamuna i. Jala diattusi Jahowa do perasaanmuna molo masa i. (Pjm. 9:11) Alai molo berupaya hamu gabe natua-tua na burju, pasti dipasu-pasu Jahowa do hamu.

Prinsip ni Bibel: “Sai na saut do sakkap ni halak na ringgas, alai na lao marpogos do halak na gumarapus.”—Poda 21:5.

“Molo adong sian hamu na naeng pajongjokkon sada menara, pasti ikkon jolo hundul do ibana mangetong sadia godang hepeng na lao sipakaluaronna. Sian i botoonna ma cukkup do hepengna pajongjokkon menara i manang na dang.”—Luk. 14:28.

Jahowa ma utamahon hamu di keluargamuna. Bahen ma ibadatmuna tu Jahowa na uppetting di keluargamuna. Molo nungnga adong gellengmuna, berupaya ma hamu mangurupi ganup gellengmuna asa makkaholongi Jahowa. Urupi ma nasida asa fokus jala boi mangihutton acara parpunguan. Bahen ma ibadat keluarga ganup minggu. Latik ma nasida asa boi marbarita na uli. Ingot ma, ikkon hamu do na mangulahon sude tanggung jawab on. Unang ma pasahat tanggung jawab on tu gellengmuna na umbalga manang tu keluargamuna na asing. Memang, porlu do tikki dohot upaya lao mangurupi gellengmuna asa makkaholongi Jahowa. Alai molo marhasil hamu mangulahon i, pasti las hian do rohamuna.

Prinsip ni Bibel: “Dang adong be las ni rohakku na umbalga sian na mambege akka anakkokku mangihutton hasittongan.”—3 Joh. 4.b

Marhaposan ma tu Jahowa. Molo adong rencanamuna naeng margelleng manang molo nungnga margelleng hamu, ingot ma pandangan ni Jahowa do na uppetting sian pandangan ni akka halak.

Akka gambar: 1. Natua-tua rap hundul dohot anak ni nasida di parpunguan. Anakna i martudu lao markomentar. 2. Sada keluarga rap marbarita. Bapakna rap marbarita dohot boruna. Omakna marbarita dohot dua gellengna na asing. — Porlu do tikki dohot gogo lao mangurupi gellengta asa makkaholongi Jahowa

Pos ma rohamuna, pasti jagaon ni Jahowa do hamu jala paradeonna do kebutuhanmuna molo nungnga matua hamu, nang pe dang godang gellengmuna. Memang, godang do na mandok molo adong gelleng, adong ma na mangurus nasida annon dung matua. Alai, unang ma ihutton pandangan sisongon i. Ingot ma, dang tadikkonon ni Jahowa hamu. Alana nungnga marjanji Ibana, pasti jagaonna do hamu jala pasti ditepati do janjina i.—Jos. 23:14.

Prinsip ni Bibel: “Marhaposan tu Jahowa ma ho sian nasa roham,jala unang ma ho mangasahon pikkiranmu sandiri. Di saluhut dalanmu parrohahon ma Ibana, dung i bahenonna ma tigor akka dalanmu.”—Poda 3:5, 6.

“Hea do au poso jala nungnga matua au saonari, alai dang hea dope huida halak na tigor marroha ditinggalhon, jala dang hea gellengna mangido-ido sipanganon.”—Ps. 37:25.

“Sai parjolo ma lului Harajaon ni Debata dohot akka na sittong na dihalomohon rohana. Dung i lehononna ma sude na porlu di hamu.”—Mat. 6:33.

Takkas ma, “silehon-silehon ni Jahowa do akka ianakkon” jala massai arga do nasida. Molo sai diingot akka natua-tua on, pasti berupaya do nasida asa denggan mangulahon tanggung jawab ni nasida. Las do roha ni nasida paradehon kebutuhan ni ganup gellengna secara jasmani, emosi, dohot rohani. Alai uppetting do di nasida pandangan ni Jahowa sian pandangan ni akka halak. Alani i, manat do dipikkirhon nasida piga annon gellengna. Molo denggan natua-tua mangulahon on, pasti las hian do roha ni Jahowa.

Dang Disolsoli Nasida Keputusanna

Di akka daerah na maol parhepengon, godang do natua-tua na merasa molo dang godang gelleng ni nasida, gabe maol do annon ngolu ni nasida. Alai tutu do pandangan sisongon i? Taparrohahon ma piga-piga komentar ni akka kepala keluarga na tinggal di daerah sisongon i.

Adong do na hea manjujui hamu asa godang gellengmuna?

“Adong, termasuk ma disi akka dongan di huria. Hea ma sapasang suami istri mandok tu hami, ‘Boasa holan sada anakmuna? Di Afrika on molo holan sada anakmuna, hira na so adong do i. Alai molo adong dua anakmuna, sada do i dietong.’ Di pudian ni ari, tubu ma borunami. Alai sai torus dope hami dijujui asa margelleng muse.”—Si Jeremias

Adong do tantanganna di hamu ala dang godang gellengmuna?

“Daong. Gariada, ala dang godang gellengnami gabe ummura ma di hami lao paradehon kebutuhan ni nasida secara jasmani, tarlumobi secara rohani. Beda hian ma tu situasikku najolo. Godang do hami marhaha maranggi. Borat hian do di bapa dohot omak paradehon kebutuhannami dohot pasikkolahon hami.”—Si Jeremias

Boha do perasaan ni gellengmuna tu keputusanmuna i?

“Boi do diida nasida molo godang gelleng, gabe borat do di akka natua-tua lao mangurus sude gellengna i. Jadi las hian do roha ni nasida tu keputusannami i.”—Si Filipe

“Ala rap tinggal hami dohot gellengnami, gabe merasa aman ma nasida jala dihaholongi. Jotjot do hami bergaul dohot akka dongan na togu haporseaonna. Gabe dipatogu ma hami jala dijujui do asa dibahen hami cita-cita rohani. Saonari dung balga akka gellengnami, boi ma diida hami dang marisuang sude upayanami lao pagodang-godangkon nasida.”—Si Carlos

Aha do manfaat na dihilala hamu ala dibahen hamu keputusan sisongon i?

“Gabe ummura ma di hami lao paradehon kebutuhan jasmani keluarganami. Tolu taon naung salpu, di-PHK ma au. Hape timbo do gajikku tikki i. Alai ala dang godang gellengnami, pengeluarannami pe dang pola godang. Gabe ummura ma di hami mambahen penyesuaian tikki i.”—Si Jeremias

“Boi do diparade hami kebutuhan ni akka gellengnami secara jasmani dohot rohani. Asing ni i, boi do hami lao tu akka inganan na makkaporluhon godang parbarita. Jala boi do tong diparrohahon hami kebutuhan ni ganup gellengnami. Sude do gellengnami melayani Jahowa jala torus do nasida berupaya mangalehon godang tikkina tu Jahowa.”—Si Lenadi

Aha ma na lao dipasahat hamu tu akka natua-tua na asing?

“Nungnga huhilala sandiri hata na didok di Psalmen 34:10b. Didok disi, ‘Dang hurangan manang aha akka halak na mangalului Jahowa.’ Sai diparade Jahowa do sude na dihaporluhon keluarganami.”—Si Rafael

a Pasangan suami istri do na mamutusson piga gelleng ni nasida. Jadi nasida do na manottuhon piga annon gellengna jala andigan nasida naeng margelleng. Boi do tong nasida mamillit naeng mamakke alat kontrasepsi, asal ma dang adong hubunganna tu aborsi. Jadi dang adong na boi menghakimi keputusan ni nasida. (Rom 14:4, 10-13) Asing ni i, ikkon diingot akka naung menikah do nasehat na dipaboa di 1 Korint 7:3-5.

b Memang akka anakkokku na dimaksud si Johannes di ayat on, i ma akka halak na diajari ibana mananda hasittongan. Alai sarupa do perasaan ni si Johannes on tu perasaan ni akka natua-tua na melayani Jahowa akka gellengna.