Cocok Dope Au Mamboan Kendaraan?

Songon i do situasimuna saonari? Molo i do, aha do na porlu dipikkirhon hamu lao mamutusson cocok dope hamu mamboan kendaraan manang na daong?

Di piga-piga negara, adong do batasan umur lao mangurus SIM. Molo nungnga lewat sian batasan umur i, ikkon adong do surat keterangan sian dokter asa boi sasahalak mamboan kendaraan. Halak Kristen na tinggal di negara sisongon i ikkon mangihutton peraturan i. (Rom 13:1) Alai dang soal didia hamu tinggal, parrohahon ma akka saran on asa boi diboto hamu cocok dope hamu mamboan kendaraan manang na daong.

PIKKIRHON MA SONGON DIA CARAMUNA MAMBOAN KENDARAAN

Songon na dipaboa di situs web Institut Penuaan Nasional (NIA) Amerika Serikat, pikkirhon ma akka sukkun-sukkun on:

• Boi dope takkas huida rambu lalu lintas? Jala takkas dope huida dalan molo nungnga borngin?

• Boi dope hatop au mangida tu kaca spion dohot tu area na so tarida sian spion (blind spot)?

• Boi dope au ligat, misalna molo ikkon toppu mangarem?

• Gabe targanggu do lalu lintas ala lambat hian au mamboan kendaraan?

• Hea do piga-piga hali naeng hutabrak kendaraan na asing? Manang jotjot do leccet kendaraanku ala husenggol na asing?

• Hea do dipaso polisi au alani carakku mamboan kendaraan?

• Hea do tarpodom au tikki mamboan kendaraan?

• Adong do huallang ubat na mambahen au dang fokus tikki mamboan kendaraan?

• Hea do dipaboa keluarga manang donganku tu au asa unang mamboan kendaraan be au?

Molo adong sada manang dua sian sukkun-sukkun i na sarupa tu situasimuna, ra ikkon dibahen hamu do penyesuaian. Misalna, unang pajotjottu be hamu mamboan kendaraan, tarlumobi molo nungnga borngin. Asing ni i, ikkon dipikkirhon hamu do songon dia caramuna mamboan kendaraan, jala sukkun ma pandapot ni keluarga manang donganmuna. Boi do tong diparsiajari hamu songon dia carana asa lebih aman tikki mamboan kendaraan. Alai molo adong tolu sian akka sukkun-sukkun i na sarupa tu situasimuna, ra ikkon diputusson hamu do asa unang mamboan kendaraan be.a

IHUTTON MA PRINSIP NA SIAN BIBEL

Olo do ra dang tasadari nungnga hurang aman be caratta mamboan kendaraan. Jala maol do ra lao mamutusson asa unang mamboan kendaraan be hita. Jadi, aha do na boi mangurupi hita lao mamutusson i? Taparrohahon ma dua prinsip ni Bibel on.

Taakkui ma keterbatasanta. (Poda 11:2) Lam matua hita, pasti moru do parnidaanta, parbinegean, jala dang boi be hita ligat. Alani i ma godang do na so olo be mangulahon olahraga tertentu, ala diboto nasida bahaya do i. Dos songon i ma taringot mamboan kendaraan. Molo taakkui keterbatasanta, pasti olo do hita mamutusson asa unang be mamboan kendaraan. (Poda 22:3) Jala molo adong na paingotton hita, pasti olo do hita manangihon i.—Bandingkon tu 2 Samuel 21:​15-17.

Unang ma tabahen gabe celaka halak na asing. (5 Mus. 22:8) Molo sai dipaksahon sasahalak mamboan kendaraan hape dang aman be carana mamboan kendaraan i, boi do gabe bahaya dirina dohot halak na asing. Molo sappe mate halak na asing alani ibana, dohot do ibana martanggung jawab disi.

Molo pe ikkon so hamu mamboan kendaraan, unang ma hamu merasa gabe dang marguna. Ingot ma, holong do roha ni Jahowa tu hamu. Las do rohana molo diakkui hamu keterbatasanmuna, serep rohamuna, jala dipikkirhon hamu keamanan ni halak na asing. Marjanji do Jahowa lao mangurupi hamu jala patoguhon rohamuna. (Jes. 46:4) Dang tadikkonon ni Jahowa hamu. Jadi, pangido ma bantuan ni Jahowa asa boi diihutton hamu prinsip ni Bibel. Molo diulahon hamu songon i, pasti boi do dibahen hamu keputusan na denggan.