Martahan Sahat tu Salelengna do Holong ni Debata

1-2. Tikki masa sitaonon tu hita, boha do biasana perasaanta?

BAYAKKON ma adong sada kapal na hona badai di tonga ni laut. Ala gogo badai i jala gogo ombak, gabe diboan ma kapal i tusan tuson. Asa boi hot kapal i, ikkon didabuhon do jangkarna. Jangkar boi mambahen hot jala stabil kapal i, gabe dang diboan arus be.

² Tikki masa sitaonon tu hamu, songon kapal i do ra hamu. Olo do gabe dang stabil perasaanmuna. Ragu do ra hamu, diparrohahon Jahowa do hamu manang na dang. Hape sebelumna, pos do rohamuna na holong roha ni Jahowa tu hamu jala urupanna hamu. (Ps. 10:1; 13:1) Adong do ra dongan na mangapuli rohamuna, jala gabe lubbang ma pakkilalaanmuna. (Poda 17:17; 25:11) Alai ragu do ra muse hamu tu holong ni Jahowa i. Attong tikki masa sitaonon, boha do carana asa boi hamu stabil songon kapal na mamakke jangkar i? Jala boha do carana asa toktong pos rohamuna na holong do roha ni Jahowa tu hamu jala urupanna hamu?

3. (a) Aha do lapatan ni “holong na manoktong”? (Psalmen 31:7; 136:​1, dohot surat na di toru.) (b) Boasa cocok Jahowa gabe sitiruon lao patuduhon holong na manoktong? (Ida gambar.)

³ Sada cara na boi diulahon hamu asa toktong stabil, i ma ingot ma holong ni Jahowa na manoktong i. (Jaha Psalmen 31:7; 136:​1, dohot surat na di toru.) “Holong na manoktong” lapatanna holong na dipatudu ala setia tu sasahalak jala ala naeng toktong marale-ale tu sasahalak. Jahowa do sitiruon di hita taringot patuduhon holong na manoktong. Alana didok di Bibel, ‘Gok holong na manoktong do Jahowa i.’ (2 Mus. 34:​6, 7) Di ayat na asing didok do muse, “Sai dipatudu Ho do holong na manoktong tu sude halak na jou-jou tu Ho.” (Ps. 86:​5, surat na di toru) Aha do lapatan ni akka ayat i? Dang hea ditinggalhon Jahowa akka naposona na setia! Jadi molo taingot holong ni Jahowa na manoktong i, boi ma hita toktong stabil nang pe adong sitaononta, dos songon kapal na hot alani jangkar.—Ps. 23:4.

AJARAN DASAR NI BIBEL DO HOLONG NI JAHOWA

4. Paboa ma contoh akka ajaran dasar ni Bibel, jala patorang ma boasa gomos tatiop akka ajaran i.

⁴ Cara na asing na boi diulahon hamu asa toktong stabil, i ma ingot ma molo holong ni Jahowa i sada sian ajaran dasar ni Bibel. Tikki didok “ajaran dasar ni Bibel”, gabe diingot hamu do ra akka ajaran na diparsiajari hamu sian Hata ni Debata. Misalna nungnga diboto hamu molo goar ni Debata, i ma Jahowa. Anak ni Debata do Jesus. Dang diboto na mate be agia aha. Lao bahenon ni Debata ma tano on gabe Paradeiso jala boi ma jolma mangolu saleleng ni lelengna. (Ps. 83:18; Pjm. 9:5; Joh. 3:16; Pgk. 21:​3, 4) Dung porsea hamu tu akka ajaran i, pasti tioponmuna do i gomos, dang soal aha didok halak taringot i. Boasa? Alana pos do rohamuna, sittong do ajaran i jala adong buktina. Saonari, tabahas ma boasa porlu diingot hamu molo holong ni Jahowa i sada sian ajaran dasar ni Bibel. Jala songon dia do i boi mangurupi hamu tikki ragu hamu tu holong ni Jahowa manang tikki masa sitaonon na borat.

5. Patorang ma songon dia sasahalak boi maninggalhon akka ajaran na sala.

⁵ Tikki baru marsiajar Bibel hamu, aha do na mangurupi hamu maninggalhon akka ajaran na sala? Ra dibandingkon hamu do na diboto hamu saleleng on tu na diparsiajari hamu sian Bibel. Misalna, najolo porsea do ra hamu molo Jesus i Debata Pargogo na So Hatudosan. Alai dung marsiajar Bibel hamu, gabe tubu ma sukkun-sukkun on di rohamuna, ‘Sittong do na huhaporseai saleleng on?’ Dung diida hamu akka bukti sian Bibel, diboto hamu ma sala do hape ajaran i. Jadi ditinggalhon hamu ma ajaran na sala i, jala porsea ma hamu tu na didok Bibel: Jesus i do “na parjolo ditoppa sian saluhutna”, jala ibana do “Anak ni Debata na sasada i”. (Kol. 1:15; Joh. 3:18) Memang, dipatudos do ajaran na sala i songon inganan “naung togu dipajongjong” jala maol diruppakkon. (2 Kor. 10:​4, 5) Alai dung diboto hamu hasittongan, tottu dang olo be hamu porsea tu akka ajaran na sala i.—Plp. 3:13.

6. Boasa pos rohamuna sai dipatudu Jahowa “holong na manoktong sahat tu saleleng ni lelengna”?

⁶ Songon i ma tong taringot holong ni Jahowa. Sada sian ajaran dasar ni Bibel do i. Tikki diadopi hamu sitaonon na mambahen ragu hamu tu holong ni Jahowa, rimangi ma sukkun-sukkun on, ‘Sittong do cara marpikkirhon?’ Molo ragu dope hamu tu holong ni Jahowa, bandingkon ma perasaanmuna tu ayat tema ni artikel on, i ma Psalmen 136:1. Boasa didok di ayat i “manoktong” holong ni Jahowa? Boasa sappe 26 hali mulak-ulak dipaboa “dipatudu [Jahowa] holong ni rohana sahat tu saleleng ni lelengna”? Songon naung tabahas, sada sian ajaran dasar ni Bibel do holong ni Jahowa na manoktong i. Sarupa do i songon akka ajaran dasar na asing na dihaporseai hamu. Jadi molo tubu di rohamuna dang arga hamu di Jahowa manang dang holong rohana tu hamu, sala do i. Bolokkon ma pikkiran sisongon i, songon hamu naung maninggalhon akka ajaran na sala!

7. Paboa ma piga-piga ayat na patuduhon na holong roha ni Jahowa tu hita.

⁷ Godang do akka bukti di Bibel na patuduhon na holong roha ni Jahowa tu hita. Misalna didok Jesus do tu akka siseanna, “Ummarga do hamu sian godang amporik.” (Mat. 10:31) Didok Jahowa do muse tu akka naposona, “Jagaokku do ho jala urupanku, tiopokku do ho gomos marhite tangan kananku na mangulahon na sittong.” (Jes. 41:10) Parrohahon ma di ayat i dang didok Jesus songon on, ‘Ummarga do ra hamu.’ Jala dang didok Jahowa, ‘Urupanku do ra ho annon.’ Alai takkas do didok nasida, “Ummarga do hamu” jala ‘Urupanku do ho’. Molo dijaha hamu akka ayat sisongon i, boi ma dihilala hamu holong ni Jahowa, jala pos ma rohamuna holong do rohana tu hamu. Ingot ma, sittong do na dipaboa di akka ayat i. Jadi molo ragu hamu tu holong ni Jahowa tikki masa sitaonon, tangiakkon ma i jala rimangi ma akka ayat i. Molo diulahon hamu i, boi ma didok hamu songon na dipaboa di 1 Johannes 4:16. Didok disi, “Nungnga taboto be jala nungnga tahaporseai na holong do roha ni Debata tu hita.”a

8. Aha do na boi taulahon molo ragu muse hita tu holong ni Jahowa?

⁸ Alai, boha do molo di sada tikki ragu muse hamu tu holong ni Jahowa? Bandingkon ma perasaanmuna tu na diboto hamu taringot Jahowa. Alana molo perasaanta boi do sala. Alai na didok Bibel taringot holong ni Jahowa pasti sittong do i. Jadi molo dang porsea hita na holong roha ni Jahowa tu hita, berarti na taparsoada do sifatna na umbalga, i ma holong.—1 Joh. 4:8.

‘HOLONG DO ROHA NI JAHOWA TU HAMU’

9-10. Tikki didok Jesus, “holong do roha ni Damang i tu hamu”, aha do maksudna disi? (Johannes 16:​26, 27) (Ida gambar.)

⁹ Asa taboto taringot holong ni Jahowa, tarimangi ma hata ni Jesus na mandok, “Holong do roha ni Damang i tu hamu.” (Jaha Johannes 16:​26, 27.) Didok Jesus pe songon i tu akka siseanna, dang holan lao mambahen las roha ni nasida. Sian dia taboto? Molo tajaha akka ayat na sebelumna, dang taringot perasaan ni akka siseanna na dihatai Jesus disi. Alai ibana lao mangajarhon taringot topik na asing, i ma tangiang.

¹⁰ Didok Jesus tu akka siseanna, ikkon marhite ibana do nasida martangiang, alai dang tu ibana tangiang i dipasahat. (Joh. 16:​23, 24) Penting do on diboto nasida. Boasa? Dung hehe Jesus, adong do ra akka sisean na naeng martangiang tu ibana. Alana didok roha ni nasida, ale-ale ni nasida do Jesus. Jala ala holong roha ni Jesus tu nasida, pasti tangihononna do pangidoan ni nasida jala dipasahat tu Bapakna. Alai dang lomo roha ni Jesus molo songon i cara marpikkir ni nasida. Nungnga dipaboa Jesus tu nasida, “Holong do roha ni Damang i tu hamu.” Hata ni Jesus on patuduhon na massai holong do roha ni Jahowa tu hita. Alani i, lomo do roha ni Jahowa manangihon tangiangta. Hasittongan on termasuk sada sian ajaran dasar ni Bibel taringot martangiang. Aha do lapatan ni on di hamu? Dung marsiajar Bibel hamu, gabe ditanda hamu ma Jesus jala holong ma rohamuna tu ibana. (Joh. 14:21) Alai songon akka sisean di abad na parjolo, ala diboto hamu na “holong do roha ni [Jahowa] tu hamu”, gabe pos ma rohamuna lao martangiang tu Jahowa. Jadi tikki martangiang hamu tu Jahowa, on patuduhon na porsea do hamu tu hata ni Jesus i.—1 Joh. 5:14.

PIKKIRHON MA AHA NA MAMBAHEN HAMU RAGU

11. Boasa marsitutu Sibolis mambahen ragu hita tu holong ni Jahowa?

¹¹ Aha do na mambahen ragu hita tu holong ni Jahowa? Ra didok hamu do alani Sibolis, jala tutu do i. Marsitutu do Sibolis lao ‘mamboddut’ hita, jala las do rohana molo ragu hita tu holong ni Jahowa. (1 Ptr. 5:8) Taboto do nungnga dilehon Jahowa tobusan tu hita. Alai, lomo do roha ni Sibolis asa tadok di rohatta dang tama hita manjalo tobusan i. (Heb. 2:9) Ingot ma, ise do na marlas ni roha molo ragu hita tu holong ni Jahowa? Sibolis. Ise do na marlas ni roha molo metmet rohatta jala dang tasomba be Jahowa? Sibolis. Lomo do roha ni Sibolis asa tadok di rohatta dang dihaholongi Jahowa hita. Hape sasittongna ibana do na so dihaholongi Jahowa. Marsitutu do ibana mambahen hita merasa dang lomo roha ni Jahowa tu hita. Alai taingot ma, sada sian akka ‘joratna’ do i. (Eps. 6:11) Jadi molo sai taingot on, pasti lam bertekad do hita lao ‘mangalo Sibolis’.—Jak. 4:7.

12-13. Ala mardosa hita, aha do pengaruh ni i tu perasaanta taringot holong ni Jahowa?

¹² Adong do muse na asing na boi mambahen ragu hita tu holong ni Jahowa, i ma ala nungnga mardosa hita. (Ps. 51:5; Rom 5:12) Ala nungnga mardosa hita, gabe sega do hubunganta tu Debata. Sega do tong pikkiranta, rohatta, dohot pamatangta.

¹³ Tikki taulahon dosa, gabe merasa bersalah do hita, marsak, maila, jala merasa dang aman. Alai boi do tong toppu adong perasaan sisongon i di rohatta ala dang sempurna hita. Jala situasitta on dang sesuai tu sakkap ni Debata tikki manoppa jolma. (Rom 8:​20, 21) Boi ma dipatudos situasitta songon mobil na kempes banna. Pasti dang boi mobil i denggan mardalan. Dos songon i ma hita. Ala dang sempurna hita, jotjot do taulahon na sala. I do sipata na mambahen ragu hita dihaholongi Jahowa do hita manang na daong. Alai molo songon i perasaanta taingot ma, ‘Debata na marhuaso jala na sangap do Jahowa. Sai dipasaut Ibana do janjina, jala dipatuduhon Ibana do holong ni rohana tu akka halak na makkaholongi Ibana jala na mangulahon parettana’.—Neh. 1:5.

14. Aha do manfaatna molo tarimangi taringot tobusan? (Rom 5:8) (Ida kotak “Unang ma Olo ‘Dioto-otoi Dosa’”.)

¹⁴ Memang olo do sipata tahilala dang tama hita dihaholongi Jahowa. Tutu do i. Sasittongna manang aha pe na taulahon, dang tama hita dihaholongi Ibana. Alani i ma arga hian do di hita holong ni Jahowa i. Ala massai holong rohana tu hita, rade do Ibana mangalehon tobusan lao manesa dosatta. (1 Joh. 4:10) Asing ni i, taingot ma ro pe Jesus tu tano on lao paluahon akka halak na mardosa do. (Jaha Rom 5:8.) Jadi molo ragu hita tu holong ni Jahowa, berupaya ma hita mambolokkon i sian pikkiranta. Alana dang adong nanggo sada pe sian hita na boi sempurna saonari, jala dang dipangido Jahowa hita asa sempurna.—Rom 7:​24, 25.

TOKTONG MA SETIA

15-16. Aha do pasu-pasuna molo toktong hita setia tu Jahowa? (2 Samuel 22:26)

¹⁵ Lomo do roha ni Jahowa asa ‘toktong hita setia tu Ibana’. (5 Mus. 30:​19, 20) Molo taulahon i, pos ma rohatta Jahowa pe pasti toktong do setia tu hita. (Jaha 2 Samuel 22:26.) Molo torus hita setia tu Jahowa, pos ma rohatta pasti urupanna do hita mangadopi akka sitaonon na masa tu hita.

¹⁶ Nungnga tabahas be akka aha do na porlu taulahon asa boi toktong stabil tikki masa sitaonon. Taboto do na holong do roha ni Jahowa tu hita jala sai urupanna do hita. I ma na taparsiajari sian Bibel. Molo tahilala dang holong roha ni Jahowa tu hita, unang ma holan perasaanta i na sai tapikkirhon. Alai taingot ma akka naung taboto taringot holong ni Jahowa. Jadi songon naung taboto sian Bibel, pos ma rohatta sai dipatudu Jahowa do holongna na manoktong i sahat tu saleleng ni lelengna.