Jahowa do na Mambahen Hita “Marlas ni Roha Situtu”

1-2. (a) Situasi na songon dia do na diadopi akka halak saonari? (b) Aha do na lao tabahas di artikel on?

SAONARI, godang do halak na berupaya mangulahon manang aha pe asa boi marlas ni roha. Alai dang soal aha upaya ni nasida, tong do dang marlas ni roha nasida. Bahkan godang do halak na lungun rohana jala kesepian. Adong do tong piga-piga naposo ni Jahowa na merasa songon i. Boasa? Alana, mangolu “di ari parpudi” na gok “hasusaan” do hita. Alani i, boi do terjadi godang masalah na mambahen marsak hita manang lungun rohatta.—2 Tim. 3:1.

² Di artikel on, lao tabahas ma aha do na boi mambahen mago las ni rohatta, jala songon dia carana asa mulak muse las ni rohatta i. Alai na parjolo, tabahas ma jo ise na boi mangurupi hita asa tahilala las ni roha na sasittongna.

SILEHON LAS NI ROHA

3. Aha do na taparsiajari taringot Jahowa sian akka toppaanna? (Ida gambar.)

³ Sai marlas ni roha do Jahowa. Jala lomo do tong rohana asa marlas ni roha hita. I do alana dibahen Ibana akka toppaan na mambahen las rohatta. Misalna, las do rohatta tikki mangida tano na massai uli on, mangida marragam warna, mangida akka binatang na marmeami, jala las hian do rohatta tikki taallang sipanganon na tahalomohon. Sudena i gabe bukti na holong do roha ni Debata tu hita, jala lomo rohana asa marlas ni roha hita.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Boasa boi toktong marlas ni roha Jahowa nang pe godang sitaonon diida Ibana? (b) Aha do na dilehon Jahowa tu hita? (Psalmen 16:11)

⁴ Didok di Bibel, “Debata na marlas ni roha” do Jahowa. Alai, lungun do rohana mangida akka halak na marsitaonon. (1 Tim. 1:11) Nang pe songon i, dang gabe mago las ni roha ni Jahowa. Boasa? Alana diboto Ibana holan parsatokkinan do i jala nungnga ditottuhon Ibana andigan lao salpuhononna sude sitaonon dohot masalah. Sahat tu na dapot tikkina pasautonna sakkapna i, sabar do Ibana. Jala diattusi Jahowa do songon dia situasitta, jala rade do Ibana mangurupi hita. Aha do na diulahon Ibana lao mangurupi hita? Dilehon Ibana do las ni roha tu hita. (Jaha Psalmen 16:11.) Saonari, tabahas ma songon dia Jahowa mangalehon las ni roha i tu Anakna, Jesus.

5-6. Boasa toktong Jesus marlas ni roha?

⁵ Jesus ma na paling marlas ni roha sian sude toppaan ni Jahowa. Boasa? Adong dua alasanna. (1) “Ibana do gombaran ni Debata na so tarida i” jala sempurna do ibana maniru sifat ni Bapakna. (Kol. 1:15) (2) Jesus ma na ulleleng rap dohot Jahowa, Debata na mangalehon las ni roha.

⁶ Asing ni i, torus do diulahon Jesus lomo ni roha ni Bapakna. I do na mambahen ibana toktong marlas ni roha. (Poda 8:​30, 31; Joh. 8:29) Ala toktong setia ibana, las situtu ma roha ni Jahowa mangida ibana.—Mat. 3:17.

7. Boha do carana asa boi tahilala las ni roha na sasittongna?

⁷ Molo toktong jonok hita tu Jahowa, boi ma tahilala las ni roha na sasittongna. Alana Ibana do Silehon las ni roha. Molo lam godang tikki talehon lao marsiajar taringot Jahowa jala tatiru akka sifatna, lam tamba ma las ni rohatta. Asing ni i, las do rohatta tikki taulahon na dipangido Jahowa sian hita jala tikki taboto nungnga tabahen las rohana.a (Ps. 33:12) Memang olo do sipata lungun rohatta. Molo songon i tahilala, unang ma didok rohatta na so lomo roha ni Jahowa tu hita. Diattusi Jahowa do dang sempurna dope hita. Jala akka situasi di portibi on boi do sipata mambahen lungun rohatta jala marsak. (Ps. 103:14) Saonari, tabahas ma akka aha do na boi mambahen mago las ni rohatta, jala songon dia carana asa boi mulak muse las ni rohatta i.

CARA ASA MULAK MUSE LAS NI ROHATTA

8. Tikki adong masalah, songon dia do perasaanta?

⁸ Molo adong masalahta. Adong do masalah na diadopi hamu saonari? Ra dianiaya do hamu ala gabe Saksi Jahowa. Asing ni i, susa do ra dihilala hamu ala hona bencana alam, kelaparan, sahit, manang ala nungnga lam matua hamu. Sude situasi i boi do mambahen lungun situtu rohatta, tarlumobi molo dang adong na boi taulahon lao manguba situasitta. Didok di Bibel, “Gabe mandele do molo lungun roha.” (Poda 15:13) I ma na dihilala sahalak sintua na margoar si Charalambos. Di bagasan opat taon, mate do abangna dohot duassa natua-tuana. Didok ibana, “Kesepian do au, jala huhilala dang adong na boi mangurupi au. Sipata, marsak hian do hurasa. Alana, dang godang tikki na boi hulehon tu keluargakku tikki mangolu dope nasida.” Dos songon i ma hita saonari. Sipata ala borat hian masalah na taadopi, olo do loja hita tahilala jala marsak.

9. Songon dia do carana asa mulak muse las ni rohatta? (Jeremia 29:​4-7, 10)

⁹ Songon dia do carana asa mulak muse las ni rohatta? Unang ma pamarsakku hita mamikkiri situasi na so boi tauba, jala puas ma hita tu na adong di hita. Godang do halak di portibi on na mandok, molo denggan ngolutta jala situasitta songon na taharappon, baru pe boi las rohatta. Alai dang toho i. Boasa tadok songon i? Misalna, dipangido Jahowa do tu akka halak Jahudi na diboan tu Babel asa berupaya nasida menikmati parngoluonna disi nang pe maol. (Jaha Jeremia 29:​4-7, 10.) Aha do parsiajaranna tu hita? Berupaya ma hita mangida akka na denggan na adong di ngolutta jala tanikmati ma sudena i. Taingot ma, sai donganan ni Jahowa do hita, jala pasti urupanna do hita. (Ps. 63:7; 146:5) Adong sada pengalaman sian si Effie, na lumpuh alani kecelakaan. Didok ibana, “Diurupi Jahowa do au jala dipatogu keluarga dohot akka dongan di huria do au. Lomo do rohakku patuduhon na massai huargai do bantuan ni nasida. Alana molo menyerah au saonari, hira na dang marguna sude bantuan ni nasida i. Jadi, berupaya do au asa toktong marlas ni roha.”

10. Nang pe adong masalahta, boasa boi toktong marlas ni roha hita?

¹⁰ Tikki adong masalahta manang masa sitaonon na borat tu hita dohot tu keluargatta, boi do toktong marlas ni roha hita.b (Ps. 126:5) Boasa? Alana. Las ni rohatta dang bergantung tu situasitta. Sahalak perintis na margoar si Maria mandok, “Tikki adong masalahta, boi do toktong marlas ni roha hita ala taingot janji ni Jahowa. Alai, dang na berarti dang boi hita tangis manang dang tapatudu na lungun rohatta. Boi do diurupi Bapakta hita asa toktong marlas ni roha dang soal aha sitaonon na taadopi.” Jadi taingot ma, manang sadia borat pe sitaonon na taadopi saonari, holan parsatokkinan do i. Satokkin nai, lao salpuhonon ni Jahowa ma sude na mambahen hita marsitaonon dohot marlungun ni roha.

11. Aha do na taparsiajari sian pengalaman ni Apostel Paulus?

¹¹ Alai sipata tikki adong masalahta, olo do ra tadok di rohatta dang lomo roha ni Jahowa tu hita. Molo songon i do perasaanta, marsiajar ma hita sian akka naposo ni Jahowa na hea mangadopi sitaonon na borat. Misalna, Apostel Paulus. Dipillit Jesus do ibana asa pasahatton barita na uli “tu akka bangso, tu akka raja, dohot tu halak Israel”. (Ul. 9:15) Tugas na massai penting do i. Alai, godang do masalah na diadopi si Paulus. (2 Kor. 11:​23-27) Nang pe songon i, dang na berarti dang lomo roha ni Jahowa mangida ibana. Gariada, boi pe diadopi si Paulus sude sitaononna i ala diurupi Jahowa do ibana. (Rom 5:​3-5) Saonari, pikkirhon ma taringot situasimuna. Dang soal sitaonon aha na diadopi hamu, toktong do hamu setia melayani Jahowa. On patuduhon na diurupi Jahowa do hamu, jala lomo rohana mangida hamu.

12. Boha do perasaanta molo dang boi tacapai cita-cita rohanitta?

¹² Molo dang boi tacapai cita-cita rohanitta. (Poda 13:12) Ala holong rohatta tu Jahowa jala taargai sude pasu-pasuna, lomo do rohatta mangalehon unggodang tikkitta tu Ibana. Alani i, tabahen do ra cita-cita rohani. Alai, molo dang boi tacapai cita-citatta i alani situasitta, olo do gabe metmet rohatta. (Poda 17:22) Songon i ma na dihilala sahalak perintis na margoar si Holly. Didok ibana, “Lomo do rohakku asa boi dohot tu Sikkola tu Parbarita Harajaon, melayani di luar negeri, manang mangurupi ulaon pembangunan di Ramapo. Alai ala muba situasikku, dang boi hucapai cita-citakki. Gabe lungun hian ma rohakku.” Saonari pe, godang do naposo ni Jahowa na merasa songon i ala dang boi dicapai cita-cita rohani ni nasida.

13. Dang soal songon dia situasitta saonari, aha do na boi taulahon?

¹³ Songon dia do carana asa mulak muse las ni rohatta? Ingot ma, dang hea dipangido Jahowa hita mangulahon lobi sian na tolapta. Jala dang hea dibanding-bandingkon Jahowa aha na taulahon dohot na diulahon halak na asing. Na dipangido Jahowa sian hita, i ma asa serep rohatta jala toktong setia. (Mik. 6:8; 1 Kor. 4:2) Taingot ma, molo berupaya hita mambahen las roha ni Jahowa sian nasa pikkiranta, sian nasa rohatta, jala tapatudu akka sifat na denggan, las hian do rohana disi. Alani i, unang ma tapaksahon diritta mangulahon na so tolap taulahon.c Molo dang boi diulahon hamu tugas na dihalomohon hamu saonari, pikkirhon ma akka aha do na boi diulahon hamu. Misalna, boi do dilatik hamu akka donganta na poso, manang dipatogu hamu roha ni akka donganta naung matua. Asing ni i, boi do ra dipatogu hamu halak na asing marhite telepon, mangirim surat, manang manjuppangi ibana tu jabuna. Las hian do roha ni Jahowa mangida sude upayamuna i. Jala pasti dipasu-pasu Ibana do hamu asa toktong marlas ni roha. Ingot ma muse annon di tano na imbaru, boi do diulahon hamu akka tugas na luar biasa na dilehon Jahowa. On ma na patoguhon roha ni si Holly na dipaboa nakkin. Didok ibana, “Tikki metmet rohakku, huingot ma janji ni Jahowa. Boi do annon au mangolu salelengna. Pasti diurupi Jahowa do au mangulahon akka tugas na huhalomohon di tano na imbaru.”

14. Aha do muse na boi mambahen mago las ni rohatta?

¹⁴ Molo las ni rohatta bergantung tu hepeng dohot tu akka na asing. Molo taida di internet, godang do halak idaon hira na las hian rohana ala boi mangulahon akka ulaon na dihalomohon rohana. Gabe tadok do ra di rohatta, molo tatiru nasida, taulahon ulaon na tahalomohon, tatuhor barang na tahalomohon, jala mardalani hita tu godang inganan, pasti las hian ma tong rohatta. Memang dang sala mangulahon ulaon na tahalomohon, jala lomo do roha ni Jahowa asa tanikmati akka toppaanna na massai uli. Alai didok roha ni godang jolma saonari, aha na dihalomohon roha ni nasida i do na boi mambahen nasida toktong marlas ni roha. Hape ujungna, disadari nasida ma dang boi sudena i mambahen nasida toktong marlas ni roha. Sahalak perintis na margoar si Eva mandok, “Molo holan hasonangan ni rohamuna do na sai dipikkiri hamu, pasti dang marnapuas hamu.” Jadi molo holan lao pasonakkon diritta do hita, ujungna boi do lungun rohatta jala kecewa.

15. Aha do na taparsiajari sian Raja Salomo?

¹⁵ Adong do na boi taparsiajari sian Raja Salomo. Berupaya do si Salomo asa toktong las rohana. Diulahon ibana do akka ulaon na dihalomohon rohana. Misalna, diallang ibana do akka sipanganon na tabo, dibege ibana do akka musik na tabo begeon, jala dituhor ibana do akka barang na arga. Alai, tong do dang marnapuas ibana. Gariada didok ibana, “Sai na hurang do idaon ni mata, jala sai na hurang do begeon ni pinggol.” (Pjm. 1:8; 2:​1-11) Saonari pe, adong do piga-piga halak na merasa songon i. Molo godang hepengna jala boi diulahon ibana manang aha na dihalomohon rohana, pasti las do rohana. Alai dang toho i. Dang boi sudena i mambahen hita toktong marlas ni roha. Jadi molo holan lao pasonakkon diritta do hita, dang boi toktong las rohatta.

16. Boasa boi mulak muse las ni rohatta molo taurupi na asing? (Ida gambar.)

¹⁶ Songon dia do carana asa mulak muse las ni rohatta? Didok Jesus, “Umlas do roha ni halak na mangalehon sian na manjalo.” (Ul. 20:35) I ma na dihilala sahalak sintua na margoar si Alekos. Didok ibana, “Berupaya do au mangurupi akka halak marhite cara na sederhana. Tikki huurupi nasida, dang sai hupikkiri be na huhalomohon jala hasilna gabe las ma rohakku.” Aha do na boi diulahon hamu lao mangurupi halak na asing? Tikki diida hamu adong sasahalak na lungun rohana, patogu ma ibana. Nang pe dang boi dilehon hamu solusi tu ibana, alai rade ma hamu manangihon ibana jala patudu ma haburjuon. Papos ma rohana diattusi Jahowa do perasaanna jala parduli do Jahowa tu ibana. (Ps. 55:22; 68:19) Asing ni i, paboa ma tong tu ibana dang hea ditadikkon Jahowa ibana. (Ps. 37:28; Jes. 59:1) Jala boi do ra dilehon hamu bantuan na asing, misalna paradehon sipanganon manang diboan hamu ibana mardalani. Togihon ma ibana marbarita na uli asa lam tamba las ni rohana. Jadi, rade ma hamu dipakke Jahowa lao patoguhon roha ni na asing. Molo dilehon hamu tikkimuna lao mangurupi halak na asing, pasti marlas ni roha do hamu!—Poda 11:25.

17. Asa boi tahilala las ni roha na sasittongna, aha do na ikkon taulahon? (Psalmen 43:4)

¹⁷ Molo lam jonok hita tu Jahowa jala taulahon lomo ni rohana, boi ma tahilala las ni roha na sasittongna. Didok di Bibel, Jahowa do na mambahen hita “marlas ni roha situtu”. (Jaha Psalmen 43:4.) Jadi dang soal sitaonon aha na diadopi hamu saonari, unang ma pamarsakhu manang mabiar. Ingot ma, sai donganan ni Jahowa do hita jala urupanna do hita asa marlas ni roha saleleng ni lelengna!—Ps. 144:15.