1925​—Saratus Taon Naung Salpu

DANG SAUT NA DIHARAPPON NASIDA

Godang do Akka Parsiajar Bibel berharap asa ro Paradeiso di taon 1925. Boasa songon i? Didok Donganta si Albert Schroeder, na gabe anggota ni Punguan na Mangaradoti Organisasi, “Di taon i, porsea do hita na lao diboan nama sude na miniahan tu surgo. Jala akka halak na setia songon si Abraham, si Daud, dohot akka na asing, lao dipahehe jala nasida ma na gabe pamimpin di tano on.” Hape dang saut na diharappon nasida i. Gabe kecewa ma piga-piga donganta.—Poda 13:12.

Nang pe kecewa nasida, godang do sian Akka Parsiajar Bibel i na toktong ringgas marbarita. Gabe diboto nasida ma massai penting do paboahon taringot Jahowa. Saonari, taida ma aha na diulahon nasida asa boi sahat barita na uli tu godang jolma.

AKKA STASIUN RADIO NA BARU

Di taon 1924, godang do akka halak na manangihon stasiun radio WBBR. Alani i di taon 1925, dibahen Akka Parsiajar Bibel ma stasiun radio na asing na jonok tu Chicago, Illinois. Digoari ma stasiun i WORD. Si Ralph Leffler, na dohot mangurupi pembangunan ni stasiun i mandok, “Tikki borngin jala tikki musim dingin, godang do akka halak na manangihon stasiun radio i, bahkan akka halak na tinggal di inganan na massai dao.” Misalna, sada keluarga na tinggal di Pilot Station, Alaska. Dao ni nasida sian stasiun WORD, i ma 5.000 kilometer. Dohot do nasida manangihon acara na parjolo sahali disiarhon sian stasiun i. Dung ditangihon nasida i, dikirim nasida ma surat tu akka halak na karejo di stasiun i. Mandok mauliate do nasida ala nungnga diparade acara na mambahen nasida lam mamboto taringot Debata dohot Bibel.

Di The Watch Tower 1 Desember 1925, dipaboa ma boasa akka halak na tinggal di inganan na massai dao boi mambege stasiun radio on. Didok di majalah i, “Stasiun radio WORD on termasuk stasiun na balga di Amerika Serikat. Godang do akka halak na tinggal di bagian timur dohot barat di Amerika Serikat na boi mambege stasiun radio on. Bahkan akka halak na tinggal di Kuba dohot di bagian utara ni Alaska. Jala godang do halak na gabe olo manangihon hasittongan ala mambege acara sian stasiun radio on.”

Di tikki i, berupaya do tong Akka Parsiajar Bibel paboahon barita na uli di Kanada marhite radio. Alani i di taon 1924, dibangun nasida ma stasiun radio CHUC di Saskatoon, Saskatchewan. Di Kanada, stasiun on ma sada sian akka stasiun na parjolo na acarana taringot agama. Alai di taon 1925, dipapinda organisasi ma stasiun radio on tu sada bangunan teater di Saskatoon. Nungnga dituhor organisasi bangunan i jala direnovasi.

Alani stasiun on, gabe godang ma akka halak na mambege barita na uli di akka kota na gelleng dohot akka huta di Saskatchewan. Misalna, adong pengalaman ni sahalak borua na tinggal di sada kota na dao sian inganan i. Dung dibege borua i acara sian stasiun radiotta, dikirim ibana ma surat lao mangido publikasitta. Didok Donganta si George Naish, “Di surat ni borua i, hira na didokkon ibana ma tu hami, ‘Tolong ma jo urupi au marsiajar Bibel!’ Alani i, dikirim hami ma sada set bukku Studies in the Scriptures.” Dang leleng dukkon i, dipaboa borua i ma barita na uli tu akka halak, bahkan sahat tu inganan na massai dao.

PANGATTUSION NA DISESUAIHON

Di The Watch Tower 1 Maret 1925, adong ma sada artikel na massai penting, judulna “Kehadiran Bangsa Itu”. Boasa massai penting artikel on? Alana saleleng piga-piga tikki, diboto Akka Parsiajar Bibel do Sibolis na mangorganisasi akka suru-suruan na jahat. Ibana do tong na mangorganisasi akka agama na so sittong, akka pamaretta, dohot sistem perdagangan di tano on. Alai sian artikel i, diurupi “naposo haposan jala na marbisuk” ma akka dongan mangattusi molo Jahowa pe adong do organisasina. Ibana do na mangorganisasi akka naposona na di surgo dohot na di tano on. Organisasina i dang bagian sian portibi na dirajai Sibolis. Marsitutu do akka naposona lao mendukung Jahowa jala mangalo Sibolis dohot na mangihutton ibana. (Mat. 24:45) Asing ni i, dipaboa naposo haposan do muse nungnga jongjong Harajaon ni Debata di taon 1914. Di taon i, “masa ma porang di banua ginjang”. Didabuhon ma Sibolis dohot akka suru-suruanna tu tano on, jala dang boi be mulak nasida tu surgo.—Pgk. 12:​7-9.

Alai, adong do piga-piga sian Akka Parsiajar Bibel na so setuju tu pangattusion na baru on. Alani i, didok ma di artikel i, “Molo adong na so setuju tu pangattusion na baru on, sabar ma hamu, toktong ma marhaposan tu Jahowa jala toktong ma setia melayani Ibana.”

Adong ma sahalak donganta na margoar si Tom Eyre. Sahalak kolportir (manang saonari didok perintis) sian Inggris do ibana. Dipaboa ibana do songon dia perasaan ni Akka Parsiajar Bibel dung manjaha artikel i. Didok ibana, “Las hian do roha ni akka dongan dung manjaha penjelasan taringot Pangungkapon 12 i. Dung diattusi hami nungnga jongjong Harajaon ni Debata di surgo, gabe lam semangat ma hami paboahon barita na uli on. Asing ni i, gabe bertekad ma hami asa lam ringgas marbarita na uli. Jala on mambahen pos rohanami pasti bahenon ni Jahowa do akka na luar biasa di ari na naeng ro.”

PABOAHON TARINGOT JAHOWA

Saonari, jotjot do Saksi Jahowa mambahas Jesaya 43:10 na mandok, “‘Hamu do akka saksikku,’ ninna Jahowa, ‘Tutu, hamu do naposokku na hupillit.’” Andorang so taon 1925, jarang do ayat i dibahas di publikasitta. Alai di taon 1925, dibahas do Jesaya 43:10 dohot 12 di 11 edisi majalah The Watch Tower!

Di ujung ni bulan Agustus 1925, marpungu ma Akka Parsiajar Bibel di sada kebaktian di Indianapolis, Indiana. Dibagihon ma tu nasida program acarana. Di program i, adong ma pesan na dibahen Donganta si Joseph F. Rutherford. Didok ibana, “Tujuanta ro tu kebaktian on, i ma asa . . . dapotta gogo sian Tuan i jala asa lam semangat hita marbarita na uli.” Saleleng ualu ari kebaktian i, dijujui ma sude na ro asa paboahon taringot Jahowa manang sadihari pe.

Di ari Sabtu tanggal 29 Agustus, dipasahat Donganta si Rutherford ma jamita na marjudul “Seruan untuk Bertindak”. Di jamitana i, dipaboa ibana ma na massai penting do marbarita na uli. Didok ibana, “Dipaboa Jahowa do tu akka naposona . . . , ‘Hamu ma akka saksikku . . . jala Au do Debata na sittong.’ Dung i, takkas ma dipaboa Ibana tu nasida, ‘Angkat hamu ma tanda tu akka bangso.’ Lapatanna, holan akka halak na ditogu-togu tondi parbadia do na boi mangangkat tanda manang paboahon hasittongan taringot Jahowa di tano on. Alana, nasida do akka naposona.”—Jes. 43:12; 62:10.

Dung sae Donganta si Rutherford marjamita, dijaha ibana ma sada dokumen na marjudul “Berita Harapan”. Di dokumen i, dipaboa do holan Harajaon ni Debata “na boi mambahen sude jolma sehat, makkilala hadameon, jala marlas ni roha mangolu salelengna”. Setuju do sude na ro tu na dipaboa di dokumen i. Di pudian ni ari, diterjemahon ma dokumen on tu piga-piga bahasa jala dicetak gabe risalah. Dung i, adong ma hira-hira 40 juta risalah on na dibagihon.

Memang piga-piga taon dukkon i, dang pittor digatti Akka Parsiajar Bibel goar ni nasida gabe Saksi Jahowa. Alai, diattusi nasida do na massai penting tugas ni nasida gabe saksina.

MANJUPPANGI MUSE AKKA NA BERMINAT

Ala lam martamba godang ni Akka Parsiajar Bibel di liat portibi on, dijujui organisasi ma nasida asa manjuppangi muse akka halak na berminat naung dikabari nasida, dang holan mambagihon akka publikasi. Dung sae kegiatan khusus mambagihon risalah Berita Harapan, didok di Bulletin,a “Lao ma hamu, juppangi ma muse akka halak naung manjalo risalah Berita Harapan.”

Di Bulletin edisi bulan Januari 1925, adong ma laporan ni sahalak sian Akka Parsiajar Bibel na di Plano, Texas. Didok ibana, “Olo do ra denggan tanggapan ni akka halak tikki marbarita hita parjolo sahali tu nasida. Alai undenggan do hasilna molo tajuppangi muse nasida. Buktina, adong ma sada huta na gelleng di daerahnami naung lima hali dikunjungi di bagasan sappulu taon na parpudi on. . . . Baru-baru on, Donganta si Hendrix dohot omakku manjuppangi muse akka halak na disi. Unggodang do bukku na dibagihon nasida disi sian na sebelumna. Las hian do rohanami mangida i.”

Jala di Panama, adong ma sahalak kolportir na paboahon, “Tikki parjolo sahali au marbarita tu sada daerah, godang do halak na so olo manjakkon. Alai tikki ro muse au tusi paduahalihon manang patoluhalihon, nga denggan be tanggapan ni nasida. Jadi sataon na parpudi on, jotjot do hujuppangi akka halak naung hea hukabari. Jala godang do dapottu pengalaman na denggan sian i.”

NA LAO DIULAHON DI TAON NA MANGIHUT

Di ujung ni taon 1925, dikirim Donganta si Rutherford ma surat tu sude kolportir. Dipaboa ibana ma aha naung dicapai nasida di bagasan sataon i, jala aha na ikkon diulahon nasida di taon na mangihut. Didok ibana, “Di taon on, marsitutu do hamu mangapuli roha ni akka na susa. Jala parohon las ni roha do ulaon i di hamu . . . Di taon na mangihut, godang nai dope kesempatan lao paboahon taringot Debata dohot Harajaonna, jala lao patuduhon tu akka halak ise do sasittongna naposo ni Debata. . . . Jadi beta ma, tapasada ma soaratta jala marende ma hita mamuji Debatatta dohot Rajatta.”

Di ujung ni taon 1925, dibahen organisasi ma rencana lao merenovasi Betel na di Brooklyn asa lam balga. Jadi di taon 1926, naeng dimulai nasida ma proyek pembangunan na umbalga na hea diulahon organisasi.