Tikki Marsahit na Posi Hamu

“Tikki huboto na adong kanker di paru-paru dohot di usushu, didok rohakku mate nama au tokkin nai. Alai dung mulak au sian rumah sakit, didok rohakku ma muse, ‘Memang parah do sahitton. Alai ikkon berupaya do au asa boi sabar manaon i.’”—Si Linda, na marumur 71 taon.

“Hona gangguan saraf ma au di bohikku na sabola kiri. Ala haccit hian huhilala, gabe depresi ma au. Jotjot do au merasa dang adong na parduli tu au, bahkan hea do ro tu pikkiranku lao bunu diri.”—Si Elise, na marumur 49 taon.

Sahalak bawa na marsahit hundul di kursi roda, didongani keluargana do ibana

MOLO hea hamu manang halak na dihaholongi hamu marsahit na posi, pasti diboto hamu do songon dia borat ni situasi i. Ikkon berupaya do hamu mangubati sahit i, jala ikkon berupaya do hamu mengendalihon perasaanmuna. Alana boi do gabe mabiar manang gabe marsak hita ala ikkon torus marubat, maol mandapot parubatan na denggan, dang adong biaya lao marubat, manang adong efek samping ni akka ubat i. Pasti susa do hamu alani sudena i.

Aha ma na boi mangurupi hamu? Godang do halak na tarapul rohana ala martangiang tu Debata dohot manjaha Bibel. Boi do muse keluarga dohot akka dongan mangurupi hamu ala holong do roha ni nasida tu hamu.

NA BOI DIULAHON HAMU

Si Robert na marumur 58 taon mandok, “Asa boi hita sabar tikki marsahit, pos ma rohamuna pasti urupan ni Debata do hamu. Martangiang ma tu Jahowa jala paboa ma pakkilalaanmuna tu Ibana. Pangido ma gogo sian Debata, asa boi hamu dohot keluargamuna tetap tenang di situasi i.”

“Godang hian do manfaatna molo adong keluarga na mangapuli jala na patoguhon hita. Songon i ma na huhilala. Ganup ari sai adong do donganku na manelepon au, lao manukkun kabarhu termasuk sian inganan na dao. Alani i gabe tamba ma semangathu.”

Molo naeng lao hamu mamereng dongan na marsahit ingot ma hata ni si Linda on, “Pasti lomo do roha ni halak na marsahit boi mangulahon ulaon na somal diulahon ibana. Jala dang lomo rohana molo holan taringot sahitna i na sai disukkuni. Jadi na somal dihatai hamu ma hatai.”

Molo tapangido gogo sian Debata, tajaha Bibel, jala adong keluarga dohot dongan na patoguhon hita, pos ma rohatta pasti boi do hita semangat muse nang pe posi sahitta.

Ayat ni Bibel na Boi Mangurupi

Pos ma roham tu Debata.

“Martangiang ma au tu Jahowa, dung i dialusi Ibana ma au. Dipalua Ibana do au sian sude na mambahen au mabiar. Jou-jou do halak na dangol on, dung i ditangihon Jahowa ma ibana.”—Psalmen 34:4, 6.

Si Linda na dipaboa nakkin mandok, “Dang hea hutangiakkon asa dipamalum sahitton. Gogo do na hupangido asa boi au sabar mangadopi sahitton.”

Jaha ma Bibel Asa Tongtong Togu.

“Dang adong nanggo sahalak pe na maringanan disi na mandok, ‘Marsahit do au.’”—Jesaya 33:24.

Rimangi ma janji ni Debata taringot ari na naeng ro. Boi do i mangurupi hamu asa toktong semangat.

Pangido ma asa diurupi keluarga dohot dongan hamu.

“Sai dipatudu ale-ale do holong ni roha, jala songon haha anggi do i tikki masa sitaonon.”—Poda 17:17.

Si Elise na dipaboa nakkin mandok, “Olo do ra dihilala hamu dang adong na parduli tu hamu jala dang ditangihon Debata tangiangmuna. Nang pe songon i, unang ma mandao sian akka dongan asa boi nasida mangurupi hamu.”