Diattusi Debata do Pakkilalaanmuna?

CARA NI DEBATA MANOPPA HITA

Pikkirhon ma jolma na paling kompak di portibi on, i ma halak na kembar identik. Boi do nasida masiattusan. Sahalak direktur Pusat Penelitian Anak Kembar na margoar si Nancy Segal mandok, “Piga-piga halak na kembar boi do mangattusi na di bagasan roha ni kembaranna, nang pe dang dipaboa kembaranna i tu ibana.” Si Nancy on pe adong do kembaranna. Sahalak borua na asing na adong kembaranna pe mandok, “Dang adong na so huboto taringot ibana. Ibana pe songon i do tu au.”

Boasa boi songon i? Sada penelitian mandok boi do lingkungan dohot cara ni natua-tua pagodang-godangkon halak na kembar mambahen nasida gabe lam kompak jala masiattusan. Alai na paling penting ala na sarupa do gen ni na kembar i umbahen boi nasida kompak.

PIKKIRHON MA: Ala Debata do na manoppa gen na adong di diritta, pasti ditanda Ibana do hita lobi sian manang ise pe. Didok si Daud do songon on, “Dijaga Ho do au tikki di bortian ni omakku. Tikki ditoppa Ho au di inganan na buni, tikki di bortian ni omakku dope au, dang buni holi-holikku sian Ho. Nungnga diida Ho au andorang so tubu dope au. Andorang so adong dope au, disurat Ho do i di bukkum.” (Psalmen 139:13, 15, 16) Alai dang holan i na diboto Ibana. Diboto Ibana do tong sude na masa di ngolutta na mambahen gabe adong sifat na denggan manang na so denggan di diritta. Jadi pos ma rohatta pasti diboto jala diattusi Debata do sude taringot hita.

NA DIDOK BIBEL

Tikki martangiang tu Jahowa, didok si Daud do, “Ale Jahowa, ditanda Ho do au jala manat do au diparrohahon Ho. Diida Ho do pikkiranku sian na dao, diboto Ho do tikki hundul jala tikki jongjong au. Dang adong dope hudok manang aha, nungnga takkas diboto Ho i, ale Jahowa.” (Psalmen 139:1, 2, 4) Diboto Jahowa do muse na di bagasan rohatta dohot “sude na tapikkiri”. (1 Kronika 28:9; 1 Samuel 16:6, 7) Sian akka ayat i, aha do na taboto taringot Debata?

Nang pe dang boi tapaboa na di roha dohot di pikkiranta tu Debata tikki martangiang, diboto Ibana do aha na taulahon jala diattusi Ibana do boasa taulahon i. Asing ni i, diboto Ibana do na lomo rohatta naeng mangulahon akka na denggan nang pe sipata maol mangulahon i. Asing ni i ala nungnga dibahen Debata adong holong ni roha di diritta, pasti las do rohana molo denggan cara marpikkirta jala ias na di bagasan rohatta.—1 Johannes 4:7-10.

Akka Ayat na boi patoguhon rohatta

• “Diparrohahon Jahowa do halak na mangulahon na sittong jala ditangihon do pangidoan ni nasida.”—1 PETRUS 3:12.

• Marjanji do Debata, “Bahenokku ma ho marbisuk jala paboaokku ma tu ho dalan na ikkon sidalananmu. Lehonokku ma poda tu ho jala parrohahonokku do ho.”—PSALMEN 32:8.

PARASI ROHA DO DEBATA

Tikki marsitaonon hita, aha do manfaatna mamboto na diattusi Debata do situasitta dohot perasaatta? Parrohahon ma pengalaman ni si Anna, sian Nigeria. Didok ibana, “Godang hian do sitaonokku. Nungnga mabalu au, jala ikkon huurus do borukku di rumah sakit ala marsahit hidrosefalus (penumpukan cairan di otak). Au pe hona kanker payudara jala ikkon dioperasi, kemoterapi, dohot radioterapi. Massai borat do di au mangurus borukku huhut mangurus dirikku sandiri. Alani i gabe mandele ma au.”

Aha ma na diulahon si Anna? Didok ibana, “Hurimangi ma Pilippi 4:6, 7 na mandok, ‘Lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.’ Tikki hurimangi ayat i, gabe lam holong ma rohakku tu Jahowa. Alana umbotoan do Ibana taringot dirikku sian au sandiri. Asing ni i, godang do dongan di huria na patoguhon au.”

Didok ibana muse, “Nang pe haccit hian dope huhilala alani sahitton. Alai lam leleng lam sehat do au dohot borukku. Ala marhaposan tu Jahowa hami, dang sai marsak be hami nang pe adong sitaonon. Alana didok di Jakobus 5:11, ‘Hudok hami do marlas ni roha halak na martahan manaon hasusaan. Nungnga dibege hamu, martahan do si Job manaon hasusaan jala nungnga diboto hamu songon dia Jahowa mamasu-masu ibana. Sian i ma diboto hamu na parholong do Jahowa jala parasi roha.’ Diattusi Jahowa do songon dia perasaan ni si Job tikki marsitaonon. Jadi pos ma rohatta, diattusi Jahowa do songon dia perasaatta tikki adong sitaononta.”